އެމެރިކާއާއި އީރާނުގެ ހަނގުރާމަ ހުއްޓުވަން ޕާކިސްތާނުން "ސާބިތުކަމާއެކު" މަސައްކަތް ކުރާނެ: ޝެހްބާޒް ޝަރީފް

އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް ކުޑަކޮށް، މަސްރަހު ފިނިކުރުމަށް ކުރެވެމުންދާ މަސައްކަތްތަކުން ކުރިއެރުން ހޯދުމަށް ޕާކިސްތާނުން އޮތީ "ސާބިތުކަމާއެކު" ކަމަށް އެ ޤައުމުގެ ބޮޑުވަޒީރު ޝެހްބާޒް ޝަރީފް ބުދަ ދުވަހު ވިދާޅުވެއްޖެ އެވެ.

އދ. ގެ ޢާންމު މަޖިލީހުގެ 81 ވަނަ ސެޝަނުގައި ބައިވެރިވެވަޑައިގެންނެވުމަށް ނިއު ޔޯކުގައި ހުންނަވައި، އދ. ގެ މައި މަރުކަޒުގައި ތިބި ނޫސްވެރިންނާ ވާހަކަފުޅު ދައްކަވަމުން، ޕާކިސްތާނުން އަދާކުރަމުން ދަނީ "އަޅުގަނޑުމެންގެ އަވައްޓެރި ޤައުމު ކަމަށްވާ އީރާނާއި އެމެރިކާއާ ދެމެދު އިޚްލާސްތެރި އަދި ތެދުވެރި މެދުވެރިއެއްގެ ދައުރު" ކަމަށް ޝަރީފް ވިދާޅުވި އެވެ.

Advertisement

'އިސްލާމްއާބާދު ފަހުމުނާމާ' ގައި ސޮއިކުރައްވާފައި ވަނީ އީރާނުގެ ރައީސް މަސްޢޫދު ޕެޒެޝްކިއާން އަދި އެމެރިކާގެ ރައީސް ޑޮނަލްޑް ޓްރަމްޕް ކަން ހަނދާން އާކޮށްދެއްވަމުން، އެއްބަސްވުމުގައި ސޮއިކުރުމަށްފަހު "ބަދުނަސީބަކުން، އޭގެ ފަހުން ކަންކަން ހިނގައިދިޔައީ ލަފާކުރަން ދަތި ގޮތަކަށް" ކަމަށް ޝަރީފް ހިތާމައާއެކު ވިދާޅުވި އެވެ.

"ޕާކިސްތާން އޮތީ މި ކަމަށް ފުރިހަމައަށް ސަމާލުކަން ދީގެން. އަޅުގަނޑުމެން އުންމީދު ކަނޑައެއް ނުލަން؛ މަސްރަހު ފިނިކުރުމަށް އިތުރު މަސައްކަތްތަކެއް ކޮށް، ކުރިއެރުން ހޯދުމަށް އަޅުގަނޑުމެން މި ތިބީ ސާބިތުކަމާއެކު ތައްޔާރަށް،" އޭނާ ވިދާޅުވި އެވެ.

ފެބުރުވަރީ 28 ގައި އެމެރިކާއާއި އިސްރާއީލް ގުޅިގެން އީރާނާ ދެކޮޅަށް ހަނގުރާމަ ފެށި ފަހުން، އެޕްރީލް 8 ގައި ހަނގުރާމަ ހުއްޓާލުމުގެ އެއްބަސްވުމަކަށް ވާސިލުވުމަށް ޕާކިސްތާނުން ވަނީ އެހީތެރިވެދީފަ އެވެ. އަދި، އޭގެ ފަހުން އެމެރިކާއާއި އީރާނުގެ އޮފިޝަލުންގެ މެދުގައި 20 ގަޑިއިރަށްވުރެ ދިގު ވަގުތަކަށް ދެމިގެންދިޔަ މަޝްވަރާތަކެއް ވެސް ޕާކިސްތާނުން ވަނީ އިސްލާމްއާބާދުގައި ބާއްވާފަ އެވެ.

ހަފުތާތަކަކަށް ދެމިގެންދިޔަ މަސައްކަތްތަކަށްފަހު، ޖޫން 18 ގައި ސޮއިކުރެވުނު އިސްލާމްއާބާދު ފަހުމުނާމާ ހާސިލުކުރުމަށް ޕާކިސްތާނާއި ޤަޠަރުން އެހީތެރިވި އެވެ. މި ފަހުމުނާމާގެ ދަށުން ހަނގުރާމަކުރަމުންދާ ދެ ފަރާތަށް މަސައްކަތްކުރާނެ އޮނިގަނޑެއް އެކަށައެޅިގެން ދިޔައިރު، ހަނގުރާމަ ނިމުމަކަށް ގެނައުމަށް އަމާޒުކޮށް ދާއިމީ އެއްބަސްވުމަކަށް ވާސިލުވުމުގެ މަޝްވަރާތަކަށް 60 ދުވަހުގެ މުއްދަތަކަށް ވެސް ދެ ފަރާތުން ވަނީ އެއްބަސްވެފަ އެވެ.

ނަމަވެސް، ދެ ފަރާތުން މާގިނަ ދުވަސްތަކެއް ނުވެ ބަދަލުހިފުމުގެ ހަމަލާތައް އަލުން ފަށައި، މަސްރަހުގެ ނުތަނަވަސްކަން ވަނީ ދެމިގެން ގޮސްފަ އެވެ. މި މައްސަލައަށް ސުލްހަވެރި ހައްލެއް ހޯދުމަށް ކުރަމުންދާ މަސައްކަތްތަކުގެ ދަށުން، އަންގާރަ ދުވަހު ނިއު ޔޯކުގައި ބާއްވާ އދ. ގެ އާންމު މަޖިލީހުގެ ހަވާސާގައި އީރާނާއި އެމެރިކާގެ މަންދޫބުން ވަނީ ނުސީދާ މަޝްވަރާތަކެއް ވެސް ބާއްވާފަ އެވެ.

މުސްތަގުބަލުގައި އިތުރު ބައްދަލުވުންތަކެއް ބޭއްވުމުގެ ފުރުސަތު އެބައޮތްތޯ ސުވާލު ދެންނެވުމުން، މިއީ "މެދުކެނޑުމެއްނެތި ކުރިއަށްދާ މަރުހަލާއެއް" ކަމަށް ޝަރީފް ވިދާޅުވި އެވެ. އަދި، ސުލްހަ ޤާއިމުކުރުމަށް ޓަކައި "ހުރިހާ އެކުވެރި ގައުމުތަކުން ވެސް ހިއްސާވަމުންދާ" ކަން އޭނާ ފާހަގަކުރެއްވި އެވެ.