މިޑްޓާމް އިންތިޚާބަށްފަހު އީރާނަށް ވަރުގަދަ ހަމަލާތަކެއް ދޭން ޓްރަމްޕް ރާއްވަވަނީ
26 ސެޕްޓެމްބަރު 2026 | ހޮނިހިރު 01:52އީރާނުގެ ބަނދަރުތަކަށް އަޅާފައިވާ ފިޔަވަޅުތައް އުވާލައިފިނަމަ ހުރްމުޒް ކަނޑުއޮޅި ހުޅުވާލުމަށް ހުށަހެޅި ހުށަހެޅުމަށް އެމެރިކާއިން ވަނީ ދެކޮޅު ހަދާފައި. އިގްތިސާދީ ދަތިތަކުގެ ސަބަބުން އީރާނުން އެމެރިކާގެ ޝަރުތުތަކަށް ބޯލަނބާނެ ކަމަށް ވޮޝިންގޓަނުން ބަލާއިރު، އީރާނުގެ ރިވޮލޫޝަނަރީ ގާޑްސްއިން ބުނަނީ އެ ފަރާތްތައް އޮތީ ދިގުދެމިގެންދާ ހަނގުރާމައަކަށް ތައްޔާރަށް ކަމަށް
އެމެރިކާގެ ރައީސް ޑޮނަލްޑް ޓްރަމްޕް އދ. ގެ އާންމު މަޖިލީހުގައި ތަގުރީރު ކުރައްވަނީ | އަނަދޮލު އޭޖެންސީ
ހަތް ދުވަހަށް ހަމަލާ ބަދަލުކުރުން މެދުކަނޑާލުމަށް އީރާނުން ހުށަހެޅި ހުށަހެޅުމަށް އެމެރިކާގެ ރައީސް ޑޮނަލްޑް ޓްރަމްޕް އިންކާރު ކުރައްވާފައިވާ ކަމަށް، އެމެރިކާގެ ނޫހެއް ކަމަށްވާ ދި ވޯލް ސްޓްރީޓް ޖާނަލުން (ޑަބްލިޔުއެސްޖޭ) ހުކުރު ދުވަހު ރިޕޯޓުކޮށްފި އެވެ. އެމެރިކާ ސަރުކާރުގެ މަސްދަރުތަކާ ހަވާލާދީ އެ ނޫހުން ބުނީ، ނޮވެންބަރުގައި ބާއްވާ މިޑްޓާމް އިންތިޚާބަށްފަހު އީރާނާ ދެކޮޅަށް އާ އަދި އިހުނަށްވުރެ ވަރުގަދަ ހަމަލާތަކެއް ދޭން ޓްރަމްޕް ރާއްވަވަމުން ގެންދަވާ ކަމަށެވެ.
ހަތް ދުވަހަށް ހަމަލާތައް ހުއްޓާލަން ތެހްރާނުން ހުށަހަޅާފައި ވަނީ ގަތަރުގެ މަންދޫބުން މެދުވެރިކޮށް ކަމަށް މި ކަމުގެ މައުލޫމާތު އެނގޭ މަސްދަރުތަކުން ބުނެ އެވެ. އީރާނުގެ ބަނދަރުތަކަށް ވޮޝިންގޓަނުން އަޅާފައިވާ ކަނޑުގެ ހިސާރު ނިމުމަކަށް ގެނެސްފިނަމަ، ހުރްމުޒް ކަނޑުއޮޅި އަލުން ހުޅުވާލައި، ނިއުކްލިއާ މަޝްވަރާތައް އަލުން ފެށުމަށް ވެސް ތެހްރާނުން ވަނީ ހުށަހަޅާފަ އެވެ.
ނަމަވެސް، އެ ހިސާރު އުވާލުމުގެ އެއްވެސް ވިސްނުމެއް ނެތް ކަމަށް އެމެރިކާގެ އޮފިޝަލުން ތެހެރާނަށާއި މެދުވެރިންނަށް އަންގާފައިވާ ކަމަށް އެ ރިޕޯޓުގައި ފާހަގަކޮށްފައިވެ އެވެ. އެމެރިކާއިން މި ގޮތަށް ނިންމީ، އީރާނަށް ކުރިމަތިވަމުންދާ އިގްތިސާދީ ދަތިތަކުގެ ސަބަބުން، ވޮޝިންގޓަނުން ބޭނުންވާ ޝަރުތުތަކާ އެއްގޮތަށް އެއްބަސްވުމަކަށް އައުމަށް އީރާނަށް މަޖުބޫރުވާނެ ކަމަށް ބަލައިގެން ކަމަށް ވެސް ރިޕޯޓުގައި ބަޔާންކޮށްފައިވެ އެވެ.
ހަތް މަސްދުވަހަށް ދެމިގެން ގޮސްފައިވާ މި ހަނގުރާމައިގެ ތެރޭގައި، ޑިޕްލޮމެޓިކް ގުޅުންތަކާއި، އަސްކަރީ ފިޔަވަޅުތަކުގެ އިތުރުން ދަތިކުރުމުގެ ފިޔަވަޅުތަކުގެ ބޭނުން ޓްރަމްޕް އެކި ފަހަރު މަތިން ހިއްޕަވަމުން ގެންދަވާ ކަމަށް އެ ނޫހުން ފާހަގަކުރި އެވެ. އަދި, އިންތިޚާބު ނިމުމުން އެއްބަސްވުމަކަށް އައުމަށް އީރާނުން ވަރަށް ބޮޑަށް ބޭނުންވާ ކަމަށް ފާޅުގައި ޓްރަމްޕް ވިދާޅުވަމުން ގެންދެވި ނަމަވެސް، އެ ގައުމުގެ ނިއުކްލިއާ ޕްރޮގްރާމް އެއްކޮށް ހުއްޓާލުމަށް ތެހެރާނުން އެއްބަސްވާނެ ކަމާމެދު ޓްރަމްޕް ޝައްކު އުފައްދަވާފައިވާ ކަމަށް އެ ރިޕޯޓުގައި ބަޔާންކޮށްފައިވެ އެވެ.
މައްސަލަ ހައްލުކުރުމަށް ހުށަހެޅި އާ ޝަރުތުތައް އީރާނުގެ ރިވޮލޫޝަނަރީ ގާޑް ކޯއިން (އައިއާރްޖީސީ) ބަލައިނުގަނެ ދޫކޮށްލާފައިވާ ކަމަށް އެ ނޫހުން ބަޔާންކުރި އެވެ. އޭގެ ބަދަލުގައި، އެ ފަރާތުން އެދެނީ މިދިޔަ ޖޫން މަހު އެކުލަވާލި ވަގުތީ އެއްބަސްވުމުގެ ބައިތަކަށް އަލުން ރުޖޫއަވުމަށް ކަމަށް އެ ނޫހުން ހާމަކޮށްފައިވެ އެވެ. އަދި, ދިގުދެމިގެންދާ ހަނގުރާމައަކަށް އެ ލަޝްކަރު އޮތީ ފުރިހަމައަށް ތައްޔާރަށް ކަމަށް އައިއާރްޖީސީން ބުނެފައިވާ ކަމަށް ވެސް ޑަބްލިޔުއެސްޖޭގައި ރިޕޯޓުކޮށްފައިވެ އެވެ.
މަސްދަރު: އަނަދޮލު އޭޖެންސީ
