އީރާނުން ހަނގުރާމަކުރަން ބޭނުމެއް ނޫން، އެއްބަސްވުމެއް ހަދަން ތައްޔާރު: ޕީޒިޝްކިއާން
25 ސެޕްޓެމްބަރު 2026 | ހުކުރު 02:10އެމެރިކާއާއެކު މަޝްވަރާގެ މަގުން އެއްބަސްވުމަކަށް ދިޔުމަށް އީރާނުން އަދިވެސް ތައްޔާރަށް އޮތްކަން ހާމަކުރައްވައި، ބައިނަލްއަގުވާމީ ގާނޫނުތަކުގެ ތެރެއިން ނިއުކްލިއާ ޒިންމާތަކަށް ތަބާވާނެ ކަމުގެ ޔަގީންކަން ރައީސް މަސްޢޫދު ޕީޒިޝްކިއާން ދެއްވި. ފޮކްސް ނޫހަށް ދެއްވި ބަސްދީގަތުމެއްގައި އޭނާ ވިދާޅުވީ އީރާނުން ހަނގުރާމައަކަށް ނޭދޭ ކަމަށާއި، ނަމަވެސް ހޫޘީން ފަދަ ޖަމާއަތްތަކުން އަމަލުކުރަނީ އަމިއްލަ މިނިވަންކަމާއެކު ކަމަށް
އީރާނުގެ ރައީސް މަސްޢޫދު ޕީޒިޝްކިއާން އެމެރިކާގެ ފޮކްސް ނޫހަށް ދެއްވި ބަސްދިގަތުމެއްގައި ވާހަކަފުޅު ދައްކަވަނީ | އެކްސް
އެމެރިކާއާ ދެމެދު އުފެދިފައިވާ ނުތަނަވަސްކަން މެދުކެނޑުމެއްނެތި ކުރިއަށްދާ މި ދަނޑިވަޅުގައި ވެސް، އީރާނުން އެމެރިކާއާއެކު ހަނގުރާމައެއް ކުރަން ބޭނުންނުވާ ކަމަށާއި މަޝްވަރާގެ މަގުން އެއްބަސްވުމަކަށް ދިޔުމަށް އަދިވެސް އޮތީ ތައްޔާރަށް ކަމަށް އީރާނުގެ ރައީސް މަސްޢޫދު ޕީޒިޝްކިއާން ބުރާސްފަތި ދުވަހު ވިދާޅުވެއްޖެ އެވެ.
ފޮކްސް ނޫހަށް ދެއްވި ޚާއްސަ ބަސްދީގަތުމެއްގައި، އީރާނުން އިޚްތިޔާރު ކުރަނީ ހަނގުރާމަތޯ ނުވަތަ އެއްބަސްވުމެއްތޯ ސުވާލު ދެންނެވުމުން، "އަޅުގަނޑުމެން ހަނގުރާމައެއް އިޚްތިޔާރެއް ނުކުރަން. ހަނގުރާމައަކީ އަޅުގަނޑުމެންގެ މައްޗަށް މަޖުބޫރުކުރެވުނު ކަމެއް. އަޅުގަނޑުމެން ހަނގުރާމައަކަށް ނޭދެން،" ޕީޒިޝްކިއާން ވިދާޅުވި އެވެ.
ހުރްމުޒް ކަނޑުއޮޅިން ދަތުރުފަތުރު ކުރުމާ ގުޅޭ ގޮތުން އުފެދުނު ޚިޔާލުތަފާތުވުންތަކާ ހުރެ ނާކާމިޔާބުވި، 60 ދުވަހުގެ ތެރޭގައި ސުލްހައިގެ އެއްބަސްވުމަކަށް އައުމަށް ގޮވާލާފައިވާ ޖޫން މަހުގެ ފަހުމުނާމާއަށް އިޝާރާތް ކުރައްވަމުން، ވޮޝިންގޓަނާއެކު އެއްބަސްވުމަކާ ދިމާއަށް ކުރިއަށް ދިޔުމުގެ ޝައުގުވެރިކަން އަދިވެސް އީރާނުގެ އެބައޮތް ކަން އޭނާ ފާހަގަކުރެއްވި އެވެ.
"އަޅުގަނޑުމެން ތިޔަ ޤައުމުގެ ރައީސާއެކު [ޑޮނަލްޑް ޓްރަމްޕް] އެއްބަސްވުމަކާ ހަމައަށް ދިޔައިން،" އޭނާ ވިދާޅުވި އެވެ. "އޭގެ މައްޗަށް ބިނާކޮށް، އަޅުގަނޑުމެން މި ތިބީ އަދިވެސް ކުރިއަށްދާން ތައްޔާރަށް، އަދި، އެދެނީ އެ ގޮތަށް." ހަމަމިއާއެކު، ހަނގުރާމަ ނިމުމަކަށް ގެންނަން ބޭނުންވޭތޯ ނުވަތަ ނޫންތޯ އިޚްތިޔާރު ކުރަންޖެހޭނީ އެމެރިކާއިން ކަމަށް ވެސް އީރާނުގެ ރައީސް ވިދާޅުވި އެވެ.
އީރާނުން 60 އިންސައްތައަށް މުއްސަނދިކޮށްފައިވާ ޔުރޭނިއަމް ދޫކޮށްލާނަންތޯ ސުވާލު ދެންނެވުމުން، ބައިނަލްއަގުވާމީ ޤާނޫނުތަކާއި ނިއުކްލިއާ ނަން-ޕްރޮލިފެރޭޝަން މުއާހަދާގެ ދަށުން އެ ޤައުމުން އަދާކުރަންޖެހޭ ޒިންމާތަކަށް އީރާނުން ތަބާވާނެ ކަމަށް ޕީޒިޝްކިއާން ހާމަކުރެއްވި އެވެ. "ލައްބަ،" އޭނާ ވިދާޅުވި އެވެ. "ބައިނަލްއަގުވާމީ ޤާނޫނުގެ އިމުގެ ތެރެއިން، ނަން-ޕްރޮލިފެރޭޝަން ޓްރީޓީގެ މައްޗަށް ބިނާކޮށް، އަޅުގަނޑުމެން ތަބާވާންޖެހޭ ކޮންމެ ކަމަކަށް ވެސް އަޅުގަނޑުމެން ތަބާވާނަން."
މި ބަސްދީގަތުމުގައި އީރާނުގެ ސަރަހައްދީ ގުޅުންތަކުގެ މައްޗަށް ވެސް އަލިއަޅުއްވާލައްވާފައިވެ އެވެ. މި ގޮތުން ހިޒްބުﷲ އަދި ހޫޘީންނާއެކު އޮންނަ ގުޅުންތަކުގެ ވާހަކަ ހިމެނެ އެވެ. އެއްބަސްވުމެއްގެ ބައެއްގެ ގޮތުގައި ހިޒްބުﷲ އަދި ހޫޘީންނަށް ހަތިޔާރު ފޯރުކޮށްދިނުން އީރާނުން ހުއްޓާލާނެތޯ އަދި ސައުދީ އަރަބިއްޔާއަށް ހަމަލާދިނުން ހުއްޓާލުމަށް ޔަމަނުގެ ހަނގުރާމަވެރި ޖަމާއަތަށް އަންގާނެތޯ ސުވާލު ކުރެއްވުމުން، ހޫޘީން އަމަލުކުރަނީ އަމިއްލަ މިނިވަންކަމާ އެކުގައި ކަމަށް ޕީޒިޝްކިއާން ވިދާޅުވި އެވެ. "ހޫޘީންގެ އަމަލުތަކަށް އެ ޖަމާއަތުން އަމިއްލައަށް ޒިންމާވާނެ،" އޭނާ ވިދާޅުވި އެވެ. "އެ ޖަމާއަތުން އަޅުގަނޑުމެންގެ ކިބައިން އިރުޝާދެއް ނުހޯދާ."
މިއާއެކު، ހަނގުރާމައިގެ ކުރިން ދުނިޔޭގެ ތެލުގެ ފަސްބައިކުޅަ އެއްބައި އުފުލި، އިސްތިރާޖީ ގޮތުން މުހިންމު ކަނޑުގެ މަގެއް ކަމަށްވާ ހުރްމުޒް ކަނޑުއޮޅި އީރާނުން ބަންދުކޮށްފައިވާ ކަމަށް ދެކެވޭ ވާހަކަތައް ވެސް ޕީޒިޝްކިއާން ވަނީ ދޮގުކުރައްވާފަ އެވެ.
ފެބުރުވަރީ މަހުގެ ފަހުކޮޅު އެމެރިކާއާއި އިސްރާއީލް ގުޅިގެން ދިން ހަމަލާތަކެއްގައި އަވަހާރަވި ބައްޕާފުޅު ޢަލީ ޚާމަނާއީގެ ބަދަލުގައި މަގާމާ ހަވާލުވެވަޑައިގެންނެވި ފަހުން އާންމުކޮށް ފެނިފައިނުވާ އެ ޤައުމުގެ އެންމެ މަތީ ވެރިޔާ އާޔަތުﷲ މުޖްތަބާ ޚާމަނާއީއާ ގުޅޭ ގޮތުން ވެސް ފޮކްސް ނޫހުން ވަނީ ޕީޒިޝްކިއާންއާ ސުވާލު ކޮށްފަ އެވެ.
މި ކަމާ ގުޅިގެން ޕީޒިޝްކިއާން ވިދާޅުވީ، މީގެ ގާތްގަނޑަކަށް މަހެއްހާ ދުވަސް ކުރިން ޚާމަނާއީއާ ބައްދަލުކުރެއްވި ކަމަށާއި، އޭނާއާއެކު ގާތްގަނޑަކަށް ހަތް ގަޑިއިރު ހޭދަކުރެއްވި ކަމަށެވެ. އެންމެ މަތީ ވެރިޔާގެ ސިއްހީ ހާލުކޮޅު ރަނގަޅުތޯ އަދި ވެރިކަން ހިންގެވުމުގެ ގާބިލުކަން އެބަހުރިތޯ ސުވާލު ދެންނެވުމުން "ވަރަށް ބޮޑަށް، ފުރިހަމައަށް،" ކަމަށް ވިދާޅުވެ ޕީޒިޝްކިއާން ވަނީ ޚާމަނާއީގެ ހާލުކޮޅު ރަނގަޅު ކަމާއި، ވެރިކަން ކުރުމުގެ ފުރިހަމަ ގާބިލުކަން ހުރި ކަން ބަޔާންކޮށްދެއްވާފަ އެވެ.
މަސްދަރު: އަނަދޮލު އޭޖެންސީ
