ހޫޘީން އަނެއްކާ ވެސް ރިޔާޟަށް ހަމަލާދީފި، ސައުދީން ވަނީ ޑްރޯންތައް ވައްޓާލާފައި
26 ސެޕްޓެމްބަރު 2026 | ހޮނިހިރު 02:51ޔަމަނުގެ ހޫޘީންނާއި ސައޫދީގެ ތާއީދު އޮންނަ ސަރުކާރުގެ ސިފައިންނާ ދެމެދު ކުރިމަތިލުންތައް ވަރުގަދަވެ، ތައީޒު ޕްރޮވިންސްގައި ހުރި ހޫޘީންގެ މަގާމުތަކަށް ސަރުކާރު ސިފައިން ވަރުގަދަ ހަމަލާތަކެއް ދީފިއި. މި ހަމަލާތަކަކީ ހޫޘީން ކަނޑުމަގުން ދަތިކުރުމުގެ ފިޔަވަޅުތަކެއް އެޅުމާ ގުޅިގެން ދިން ހަމަލާތަކެއް ކަމަށްވާއިރު، ސައޫދީ ކޯލިޝަނުން ވެސް ދަނީ ޔަމަނުގެ އެކި ސަރަހައްދުތަކަށް ވައިގެ ހަމަލާތައް ދެމުން
ސައުދީ އަރަބިއްޔާއިން ވާގިދޭ ޔަމަނުގެ އަސްކަރިއްޔާގެ ސިފައިން ހޫޘީ ޖަމާއަތުގެ ހަނގުރާމަވެރިންގެ އަމާޒުތަކަށް ހަމަލާދެނީ | އޭއެފްޕީ
ޔަމަނުގެ ހޫޘީ ހަނގުރާމަވެރިން ހޮނިހިރު ދުވަހުގެ ފަތިހުގެ ވަގުތެއްގައި ސައޫދީ އަރަބިއްޔާގެ ވެރިރަށް ރިޔާޟުގެ ސަރަހައްދަށް އަމާޒުކޮށް ފޮނުވާލި ދެ ޑްރޯން ދިފާއުކޮށް ވައްޓާލާފައިވާނެ ކަމަށް ސައުދީ ދިފާއީ ބާރުތަކުން ހާމަކޮށްފި އެވެ. ސައޫދީ އަރަބިއްޔާއަށް އަމާޒުވާ މިސައިލާއި ޑްރޯންގެ ނުރައްކާތައް އެ ގައުމުގެ އަސްކަރިއްޔާއިން ވަރަށް ގާތުން މޮނިޓަރު ކުރަމުންދާ ކަމަށް، ޔަމަނުގައި ހަރަކާތްތެރިވާ ސައޫދީ އަސްކަރީ ކޯލިޝަނުގެ ތަރުޖަމާނު ތުރުކީ އަލް-މާލިކީ ވިދާޅުވި އެވެ. އަދި، ރިޔާޟުގެ ސަރަހައްދަށް އަމާޒުކޮށް ފޮނުވާލި ދެ ޑްރޯން ވައިގެ ދިފާއީ ނިޒާމުން ދެނެގަނެ، ގޮއްވާލައި ހަލާކުކޮށްލާފައިވާ ކަމަށް ވެސް އޭނާ ވިދާޅުވި އެވެ.
ހޫޘީން ރިޔާޟާ ދެކޮޅަށް ކަނޑުމަގުން ދަތިކުރުމުގެ ފިޔަވަޅުތަކެއް އަޅައި، ހިސާރެއް އިއުލާނުކުރުމާ ގުޅިގެން ޔަމަނުގެ ދާޚިލީ ހަނގުރާމަ މިދިޔަ ޖުލައި މަހު އަލުން ހޫނުވި ފަހުން، ސައޫދީގެ ތާއީދު އޮންނަ ސަރުކާރުގެ ސިފައިންނާއި ހޫޘީންނާ ދެމެދު ވަނީ ކުރިމަތިލުންތައް ވަރުގަދަވެފަ އެވެ.
މިއާއެކު، ޔަމަނުގެ ހުޅަނގު ދެކުނުގައި އޮންނަ ތައީޒު ޕްރޮވިންސްގައި ހުރި ހޫޘީންގެ މަގާމުތަކަށާއި ސަޕްލައި ލައިންތަކަށް ވަރުގަދަ ހަމަލާތަކެއް ދީފައިވާ ކަމަށް، އެ ގައުމުގެ ސަރުކާރުގެ ސިފައިން ހުކުރު ދުވަހު ވަނީ ހާމަކޮށްފަ އެވެ. ސިފައިންގެ ތަރުޖަމާނު މަޖީދު އަބްދުﷲ އަލް-ނާޒިލީ ވިދާޅުވީ، އެއީ ތައީޒުގެ އެކި ސަރަހައްދުތަކާއި ދުބާބުގައި ތިބި ހޫޘީ ހަނގުރާމަވެރިންނަށާއި އެ މީހުންގެ ސަޕްލައި މަގުތަކަށް އަމާޒުކޮށް ދިން ހަމަލާތަކެއް ކަމަށެވެ.
ދުބާބަކީ އިސްތިރާޖީ ގޮތުން މުހިންމު ބާބު އަލް-މަންދަބް ކަނޑުއޮޅީގެ އުތުރުގައި ރަތް ކަނޑުގެ އައްސޭރިފަށުގައި އޮތް އަވަށެކެވެ. މި ހަމަލާތަކުގައި އެއްވެސް މީހަކު މަރުވި ނުވަތަ ޒަޚަމްވި ކަމުގެ ތަފުސީލެއް، އަދި ލިބުނު ގެއްލުމުގެ މައުލޫމާތެއް އަލް-ނާޒިލީ ހާމަކުރައްވާފައެއް ނުވެ އެވެ.
މި ހަމަލާތަކާ ގުޅިގެން ހޫޘީން ނެރުނު ބަޔާނެއްގައި، ވޭތުވެދިޔަ 24 ގަޑިއިރުގެ ތެރޭގައި ސައޫދީ އަސްކަރީ މަތިންދާބޯޓުތަކުން ތައީޒާއި، އިމްރާނާއި، މައުރިބް އަދި ސައުދާ ޕްރޮވިންސަށް 14 ވައިގެ ހަމަލާއާއި މިސައިލް ހަމަލާ ދީފައިވާ ކަމަށް، ހޫޘީންގެ އަސްކަރީ ތަރުޖަމާނު ޔަހްޔާ ސަރީއު ބުންޏެވެ.
ޔަމަނު އަހުލީހަނގުރާމައެއްގެ ތެރެއަށް ވެއްޓިގެން ދިޔައީ 2014 ވަނަ އަހަރު ހޫޘީ ޖަމާއަތުން އެ ގައުމުގެ ވެރިރަށް ސަންއާއާއި ބައެއް ޕްރޮވިންސްތައް ހިސާރުކޮށް ހިފުމާ ގުޅިގެންނެވެ. މިއާ ގުޅިގެން، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް އެހީތެރިވުމަށް ޓަކައި، ސައޫދީ އަރަބިއްޔާއިން އިސްވެ އޮންނަ އަރަބި ކޯލިޝަނުން 2015 ވަނަ އަހަރު ވަނީ ހަނގުރާމައިގެ ތެރެއަށް ވަދެފަ އެވެ. ހޫޘީން ރިޔާޟާ ދެކޮޅަށް ކަނޑުގެ ހިސާރެއް އިއުލާނުކުރުމާ އެކު، އަލުން ހަނގުރާމަ ފެށިފައިވަނީ މިދިޔަ ޖުލައި މަހު އެވެ. މި ގޮތުން، ރަތް ކަނޑުގެ އައްސޭރިފަށާއި ބާބު އަލް-މަންދަބް ކަނޑުއޮޅީގައި ކުރިއެރުންތަކެއް ހޯދާފައިވާ ކަމަށް ހޫޘީން ދާދި ފަހުން ދައުވާކޮށްފައިވާއިރު، އެ ޖަމާއަތުން ވަނީ ސައޫދީ އަރަބިއްޔާގެ ތެލުގެ އުމްރާނީ ވަސީލަތްތަކަށް އަމާޒުކޮށް ވެސް ހަމަލާތައް ދީފަ އެވެ.
މަސްދަރު: އަނަދޮލު އޭޖެންސީ
