މައްކާ ދިފާއީ އެއްބަސްވުން: ސައޫދީއަށް އެހީވާން ދިފާއީ އޮފިޝަލުންގެ ކުއްލި ބައްދަލުވުމެއް ބާއްވަނީ
25 ސެޕްޓެމްބަރު 2026 | ހުކުރު 02:37ސައޫދީ އަރަބިއްޔާގެ ސަލާމަތާއި ރައްކާތެރިކަން ކަށަވަރުކުރުމަށް 'މައްކާ ދިފާއީ އެއްބަސްވުމުގެ' ދަށުން އެހީތެރިކަން ފޯރުކޮށްދެވޭނެ ގޮތްތަކާ ގުޅޭގޮތުން ސައޫދީ، ޕާކިސްތާން އަދި ތުރުކީގެ ޚާރިޖީ ވަޒީރުން ނިއުޔޯކުގައި މަޝްވަރާކުރެއްވި. މި ބައްދަލުވުމުގައި ސައޫދީގެ އާންމުންނާއި އިގުތިސާދީ ވަސީލަތްތަކަށް އަމާޒުކޮށްދޭ ހަމަލާތައް ކުށްވެރިކޮށް، ސަރަހައްދީ ހަމަޖެހުމާއި ކަނޑު ދަތުރުފަތުރުގެ ރައްކާތެރިކަން ދެމެހެއްޓުމަށް ގުޅިގެން މަސައްކަތްކުރުމަށް އެއްބަސްވި
މައްކާ ދިފާއީ އެއްބަސްވުމުގެ ބައިވެރިން ކަމަށްވާ ޕާކިސްތާނާއި، ސައުދީ އަރަބިއްޔާ އަދި ތުރުކީވިލާތުގެ ޚާރިޖީ ވަޒީރުން ނިއު ޔޯކުގައި ބޭއްވެވި ބައްދަލުވުމުގެ ތެރެއިން | އަނަދޮލު އޭޖެންސީ
މައްކާ ދިފާއީ އެއްބަސްވުމުގެ ދަށުން ސައޫދީ އަރަބިއްޔާއަށް އެހީތެރިކަން ފޯރުކޮށްދެވޭނެ ގޮތްތައް ދިރާސާކުރުމަށް ޓަކައި، ސައޫދީ އަރަބިއްޔާއާއި ޕާކިސްތާން އަދި ތުރުކީގެ ޗީފްސް އޮފް ސްޓާފުންގެ ކުއްލި ބައްދަލުވުމެއް ބޭއްވުމުގެ އިންތިޒާމުތަކާ ގުޅޭގޮތުން އެ ތިން ގައުމުގެ ޚާރިޖީ ވަޒީރުން މަޝްވަރާކުރައްވައިފި އެވެ. މި ކަން ފުރަތަމަ ރިޕޯޓު ކޮށްފައި ވަނީ ސައުދީ ގެޒެޓު ނޫހުންނެވެ.
ނިއު ޔޯކުގައި ހުންނަ ސައުދީ އަރަބިއްޔާގެ މިޝަނުގައި ބޭއްވެވި މި މަޝްވަރާތަކުގައި ބައިވެރިވެވަޑައިގެންނެވީ، ސައޫދީ އަރަބިއްޔާގެ ޚާރިޖީ ވަޒީރު އަމީރު ފައިސަލް ބިން ފަރްހާންއާއި، ޕާކިސްތާނުގެ ޚާރިޖީ ވަޒީރު އިސްހާގު ދާރު އަދި ތުރުކީވިލާތުގެ ޚާރިޖީ ވަޒީރު ހަކާން ފިދާން އެވެ.
މި ބައްދަލުވުމުގައި ވަޒީރުން ވަނީ، ދިފާއީ އެއްބަސްވުމުގެ ދަށުން ވެފައިވާ ވައުދުތަކާ އެއްގޮތްވާ ގޮތުގެ މަތިން ސައޫދީ އަރަބިއްޔާއަށް އެހީތެރިކަން ފޯރުކޮށްދެވޭނެ ނިޒާމުތައް ދިރާސާކުރުމަށް ބާއްވާ އަސްކަރީ ވެރިންގެ ބައްދަލުވުމުގެ ތައްޔާރީތައް މުރާޖާ ކުރައްވާފަ އެވެ. މައްކާ އެއްބަސްވުމުގެ އެއްވެސް ބައިވެރިއަކަށް ދެވޭ ހަމަލާއަކީ ހުރިހާ ބައިވެރިންނަށް ވެސް ދެވޭ ހަމަލާއެއް ކަމަށް އެ އެއްބަސްވުމުގައި ބަޔާންކުރެ އެވެ.
މި ބައްދަލުވުމުގައި ވަޒީރުން ވަނީ، މައްކާގެ އިތުރުން ސައޫދީ އަރަބިއްޔާގެ އާންމުން ދިރިއުޅޭ ތަންތަނަށާއި އިގުތިސާދީ ވަސީލަތްތަކަށް އަމާޒުކޮށް ޔަމަނުގެ ހަތިޔާރުއެޅި ހޫޘީ ޖަމާއަތުން ދޭން އުޅުނު ހަމަލާތައް "ހަރުކަށި އިބާރާތުން ކުށްވެރިކުރައްވާ" ކަމަށް ވިދާޅުވި އެވެ.
ސަރަހައްދުގެ އެންމެ ފަހުގެ ހާލަތާ ގުޅޭގޮތުން މަޝްވަރާކުރައްވަމުން ވަޒީރުން ވަނީ، ބައިނަލްއަގުވާމީ ގާނޫނުތަކަށް ހުރުމަތްތެރިކޮށް ހިތުމަށާއި، އަވައްޓެރިކަމުގެ ރަނގަޅު ގުޅުން ދެމެހެއްޓުމަށާއި، ދައުލަތްތަކުގެ ސިޔާދަތަށް އެއް ގައުމުން އަނެއް ގައުމަށް އިހުތިރާމުކުރުމުގެ އިތުރުން، އެތެރޭގެ ދާޚިލީ ކަންކަމުގެ ތެރެއަށް އަތްނުބޭނުމުގެ މުހިންމުކަމުގެ މައްޗަށް ބާރުއަޅުއްވާފަ އެވެ. އަދި, ކަނޑު ދަތުރުފަތުރުގެ ރައްކާތެރިކަމާއި މިނިވަންކަން ކަށަވަރުކުރުމުގެ މުހިންމުކަން ވެސް ވަޒީރުން ފާހަގަކުރެއްވި އެވެ.
މިއާއެކު, މި ސަރަހައްދުގައި ދެމެހެއްޓެނިވި ސުލްހައާއި ހަމަޖެހުން ގާއިމުކުރުމަށް މަސައްކަތްކުރުމަށާއި، މަސްރަހުގެ ނުތަނަވަސްކަން ކުޑަކުރުމަށް ކުރެވޭ މަސައްކަތްތަކަށް އެއްބާރުލުން ދިނުމުގެ އިތުރުން، މިހާރު ހިނގަމުންދާ ކާރިސާތަކަށް ސުލްހަވެރި ހައްލުތައް ހޯދުމަށް މަސައްކަތްކުރުމަށް ވެސް ވަޒީރުން ވަނީ ވެވަޑައިގެންފައިވާ އަހުދު އާކުރައްވާފަ އެވެ.
މަސްދަރު: އަނަދޮލު އޭޖެންސީ
