ޔަމަނަކީ އީރާނުގެ މަސްލަހަތު ހިމާޔަތްކުރާ "ބާގެއިނިންގ ޗިޕެއް" ނޫން: އަލް-ޒޫބާ
20 ސެޕްޓެމްބަރު 2026 | އާދީއްތަ 05:27ޔަމަނުގެ ދައުލަތުގެ މުއައްސަސާތައް އިއާދަކުރުމަކީ ސަރަހައްދީ ހަމަޖެހުމާއި ކަނޑު ދަތުރުފަތުރުގެ ރައްކާތެރިކަމަށް ކޮންމެހެން ބޭނުންތެރި ކަމެއް ކަމަށް އެ ގައުމުގެ ޚާރިޖީ ވަޒީރު ވިދާޅުވި. ހޫޘީންނާ ދެމެދު ކުރިމަތިލުންތައް ވަރުގަދަވެފައިވާ މި ދަނޑިވަޅުގައި، ގައުމުގެ ސިޔާދަތީ ބާރު ދަމަހައްޓައި ދިފާއީ ސިޔާސަތުތައް ވަރުގަދަކުރުމަށް ސަރުކާރުން އިސްކަންދޭކަން ވަޒީރު ފާހަގަކުރެއްވި
ޔަމަނުގެ ޚާރިޖީ ވަޒީރު އަފްރާޙް އަލް-ޒޫބާ ބައްދަލުވުމެއްގައި ވާހަކަފުޅު ދައްކަވަނީ | އޭޕީ
ޔަމަނަކީ އީރާނުގެ މަސްލަހަތުތައް ހިމާޔަތްކުރުމަށް ބޭނުންކުރެވޭނެ "ބާގެއިނިންގ ޗިޕް" އެއް ނުވަތަ "މަޝްވަރާތަކުގައި ބޭނުންކުރެވޭނެ ހަތިޔާރެއް" ނޫން ކަމަށާއި، ސަރަހައްދީ ހަމަނުޖެހުންތަކުގެ ބަދަލުހިފާ މައިދާނަކަށް އެ ގައުމު ނުވާނެ ކަމަށް ޔަމަނުގެ ޚާރިޖީ ވަޒީރު އަފްރާޙް އަލް-ޒޫބާ ވިދާޅުވެއްޖެ އެވެ. އަދި، ސައުދީ އަރަބިއްޔާއާއެކު ޔަމަނުން ގާއިމުކޮށްފައިވާ އިސްތިރާތީޖީ ގުޅުމަކީ ވަރަށް ވަރުގަދަ އަދި ބަދަލުނުވާނެ ގުޅުމެއްގެ ގޮތުގައި ވަޒީރު ސިފަކުރެއްވި އެވެ.
ޔަމަނުގެ ރަސްމީ ނޫސް އޭޖެންސީ 'ސަބާ' އަށް ދެއްވި އިންޓަވިއުއެއްގައި އަލް-ޒޫބާ ވަނީ، ސަރުކާރުގެ ފައުޖުތަކާއި އީރާނުގެ މަދަދުލިބޭ ހޫޘީންނާ ދެމެދު އެކި ޕްރޮވިންސްތަކުގައި ވަރުގަދައަށް ހިނގަމުންދާ ކުރިމަތިލުންތަކާ ގުޅޭގޮތުން ވާހަކަފުޅު ދައްކަވާފަ އެވެ. ވަޒީރު ވިދާޅުވީ، ދައުލަތުގެ މުއައްސަސާތައް އަލުން އިއާދަކުރުމަކީ ޔަމަނުގެ ސަލާމަތާއި، ސަރަހައްދީ ހަމަޖެހުމާއި، ކަނޑުދަތުރުފަތުރުގެ ރައްކާތެރިކަމަށް ޓަކައި ކޮންމެހެން ކުރަންޖެހޭ ކަމެއް ކަމަށެވެ. އަދި، ފަހަކަށް އައިސް ހިނގަމުންދާ ކަންތައްތަކުގެ ސަބަބުން ކުރިމަތިވާ ނަތީޖާތަކާ ސަރުކާރުން ކުރިމަތިލަމުން ދަނީ ވަރަށް ޒިންމާދާރުކަމާއެކު، ގައުމީ ވާޖިބު އަދާކުރުމުގެ ރޫހުގައި ކަމަށް ވެސް އޭނާ ވިދާޅުވި އެވެ.
ޔަމަނުގެ އިސްވާރުން މިހާރު ގެންގުޅެނީ 'އިންޓެގްރޭޓެޑް ޑިޓަރެންސް' ނުވަތަ ހުރިހާ ދާއިރާއަކުން ދިފާއުވުމުގެ ސިޔާސަތެއް ކަމަށް އަލް-ޒޫބާ ތަފްސީލުކޮށްދެއްވި އެވެ. މި ސިޔާސަތުގެ ތެރޭގައި އަސްކަރީ ހަރަކާތްތަކާއި، އާންމު ރައްޔިތުން ހިމާޔަތްކުރުމާއި، ދައުލަތުގެ މުއައްސަސާތައް އަލުން ބިނާކުރުމުގެ އިތުރުން، ޑިޕްލޮމެސީއާއި އިންސާނީ އެހީތެރިކަން ފުޅާކުރުން ހިމެނެ އެވެ.
ރަތް ކަނޑާއި ބާބު އަލް-މަންދަބަށް ކުރިމަތިވެފައިވާ ނުރައްކާތަކާ ގުޅޭގޮތުން ވާހަކަފުޅު ދައްކަވަމުން އަލް-ޒޫބާ ވިދާޅުވީ، ވަކި ސަރަހައްދެއްގެ އަސްކަރީ ކޮންޓްރޯލް އޮތުމަކީ ކަނޑު ދަތުރުފަތުރުގެ މިނިވަންކަމަށް ބާރުފޯރުވުމަށް ލިބޭ ހައްގެއް ނޫން ކަމަށެވެ. ޔަމަނުގެ ބިމާއި ރަށްތަކުގެ މައްޗަށް އޮތް އެ ގައުމުގެ ސިޔާދަތީ ބާރު، ބާރުގެ ބޭނުންކޮށްގެން ބަދަލުނުކުރެވޭނެ ކަމަށް ވަަޒީރު ފާހަގަކުރެއްވި އެވެ. މިއާއެކު، ބިރުވެރިކަމެއްގެ ތެރޭގައި އުޅަނދެއް ދަތުރުކުރުމަކީ ކަނޑު ދަތުރުފަތުރުގެ މިނިވަންކަން އޮތް ކަމުގެ ހެއްކެއް ނޫން ކަމަށް ވެސް އޭނާ ވިދާޅުވި އެވެ.
ސައުދީ އަރަބިއްޔާއަށް ތައުރީފު ކުރައްވަމުން އަލް-ޒޫބާ ވިދާޅުވީ، އެ ގައުމާއެކު އޮތް ބައިވެރިވުމަކީ ވަރަށް ސާބިތު ގުޅުމެއް ކަމަށެވެ. އަދި، ޔަމަނުގެ ދައުލަތް ދަމަހައްޓައިދިނުމަށް ސައުދީ އަރަބިއްޔާއިން އަދާކުރާ ދައުރަކީ ޔަމަނުގެ ސަލާމަތާއި މުޅި ސަރަހައްދުގެ ހަމަޖެހުމަށް އޮތް މުހިންމު ބިންގަލެއް ކަމަށް ވެސް އޭނާ ސިފަކުރެއްވި އެވެ. މީގެ އިތުރުން، މިސްރާއެކު އޮތް ގުޅުން ހަރުދަނާކޮށް މަސައްކަތް ކުރަމުންދާ ކަމަށާއި، އދ. ގެ ސަލާމަތީ މަޖިލީހުގައި ކަނޑު ދަތުރުފަތުރުގެ މިނިވަންކަން ދިފާއުކުރުމަށް ރަޝިޔާއިން ގެންގުޅޭ ސިޔާސަތަށް މަރުހަބާ ކިޔާ ކަމަށް ވެސް ވަޒީރު ބަޔާންކުރެއްވި އެވެ.
ހޫޘީންނަށް އީރާނުން ހަތިޔާރު ފޯރުކޮށްދޭ މައްސަލަ ކުށްވެރިކުރައްވަމުން އަލް-ޒޫބާ ވިދާޅުވީ، ޔަމަނަކީ އެހެން މައިދާނެއްގައި ބަޔަކަށް ލިބޭ ގެއްލުމެއްގެ ބަދަލު ހޯދާނެ ތަނެއް ނޫން ކަމަށެވެ. އަދި، އެއީ ބަދަލުހިފުމުގެ މައިދާނެއް ނޫން ކަމަށާއި، ސަރަހައްދީ ބާރުތަކުން އެ މީހުންގެ މަޝްވަރާތަކުގައި ބޭނުންކުރާނެ "ބާގެއިނިންގ ޗިޕް" އެއް ނޫން ކަމަށް ވެސް އޭނާ ވިދާޅުވި އެވެ.
އަލް-ޒުބާ މި މޭރުމުން ވިދާޅުވެފައި މި ވަނީ ތާއިޒް، މަޢާރިބް، އަލް-ޖައުފް، އަލް-ބައިދާ އަދި ލަހްޖް ޕްރޮވިންސްތަކުގައި ވަރުގަދަ ހަނގުރާމައެއް ހިނގަމުންދާ ދަނޑިވަޅެއްގަ އެވެ. މިއީ، 2022 ވަނަ އަހަރުގެ އޭޕްރީލް މަހު ހަމަލާބަދަލުކުރުން ހުއްޓާލުމަށް އެއްބަސްވި ފަހުން، އެ ގައުމުގައި ހިނގަމުންދާ އެންމެ ނުރައްކާތެރި ކުރިމަތިލުންތަކެވެ.
މަސްދަރު: ޓީއާރްޓީ ވަރލްޑް
