ރަތް ކަނޑަށް އިތުރު މަނަވަރުތައް ފޮނުވައިދޭން އީޔޫއިން ގޮވާލައިފި

ރަތް ކަނޑުގައި ހިންގަމުންދާ ކަނޑުގެ ސަލާމަތީ މިޝަން ވަރުގަދަކުރުމަށް ޓަކައި، އިތުރު މަނަވަރުތަކާއި ވައިގެ އަސްކަރީ ވަސީލަތްތައް ފޮނުވައިދިނުމަށް ވިލާތުގެ އިއްތިހާދުގެ (އީޔޫ) މެންބަރު ޤައުމުތަކަށް އެ އިއްތިހާދުގެ ޚާރިޖީ ސިޔާސަތާ ބެހޭ އިސް މުޝީރު ކާޔާ ކައްލާސް ގޮވާލައްވައިފި އެވެ. އަދި، މިހާރު އޮތް އަސްކަރީ ބާރަކީ އިތުރުވަމުންދާ ނުރައްކާތަކާ ކުރިމަތިލުމަށް އެކަށީގެންވާ މިންވަރެއް ނޫން ކަމުގެ އިންޒާރު ވެސް އޭނާ ވަނީ ދެއްވާފަ އެވެ.

ބާބު އަލް-މަންދަބު ކަނޑުއޮޅި ސަރަހައްދުގައި އުޅަނދުފަހަރަށް އޮތް ނުރައްކާތައް އިތުރުވަމުންދާތީ 'އޮޕަރޭޝަން އާސްޕިޑީސް' ފުޅާކުރަން ޖެހޭ ކަމަށް، އދ. ގެ ޢާންމު މަޖިލީހުގެ ހަވާސާގައި އަންގާރަ ދުވަހު ބޭއްވި އީޔޫގެ ޚާރިޖީ ވަޒީރުންގެ ބައްދަލުވުމަކަށް ފަހު ނިއު ޔޯކުގައި ވާހަކަފުޅު ދައްކަވަމުން ކައްލާސް ވިދާޅުވި އެވެ.

Advertisement

"ސަރަހައްދުގައި އޮތް ނުރައްކާތަކުގެ މިންވަރު މަތިވަމުންދާތީ، އެ ކަމަށް އިޖާބަދިނުމަށް މި އޮޕަރޭޝަނަށް އިތުރު ކަނޑުގެ ވަސީލަތްތަކާއި ވައިގެ އަސްކަރީ ވަސީލަތްތައް ބޭނުންވޭ،" ނޫސްވެރިންނާ ވާހަކަފުޅު ދައްކަވަމުން ކައްލާސް ވިދާޅުވި އެވެ.

ކަޅު ކަނޑާއި، ހުރްމުޒް ކަނޑުއޮޅި އަދި ބާބު އަލް-މަންދަބަކީ ކަނޑު ދަތުރުފަތުރުގެ ނާޒުކު މުހިންމު މަގުތަކެއް ކަމަށާއި، އެ ތަންތަނުގެ ދަތުރުފަތުރަށް ބުރޫއަރައިފިނަމަ އޭގެ ނޭދެވޭ އަސަރު އެ ސަރަހައްދުތަކުން ބޭރަށް ވެސް ވަރަށް ބޮޑަށް ފޯރާނެ ކަމަށް އޭނާ ފާހަގަކުރެއްވި އެވެ.

އީޔޫގެ އަސްކަރީ މިޝަނަށް ކުރިމަތިވެފައިވާ ފިއްތުންތައް ބޮޑުވަނީ

ޔަމަނުގެ ހޫޘީ ޖަމާއަތުން ދެމުންދާ ހަމަލާތަކުން ވިޔަފާރި އުޅަނދުފަހަރު ހަމާޔަތްކުރުމަށް އެހީތެރިވުމުގެ ގޮތުން 'އޮޕަރޭޝަން އާސްޕިޑީސް' ފެށީ 2024 ވަނަ އަހަރު އެވެ. ދިފާއީ މި މިޝަނުން ރަތް ކަނޑާއި އެ ސަރަހައްދުގެ ކަނޑުތަކުގައި ހަރަކާތްތެރިވަމުން އަންނަނީ ވިޔަފާރި އުޅަނދުތަކަށް ފާރަވެރިވެ، ރައްކާތެރިކަން ފޯރުކޮށްދިނުމުގަ އެވެ.

މިހާރު އޮތް ސަލާމަތީ މަސްރަހަށް އެކަށީގެންވާ ގޮތެއްގައި އިޖާބަދިނުމަށް ޓަކައި، މި އޮޕަރޭޝަނަށް 10 އަށްވުރެ ގިނަ މަނަވަރު ބޭނުންވާނެ ކަމަށް ކައްލާސް ވިދާޅުވި އެވެ. މި މިޝަންގައި މިހާރު ހަރަކާތްތެރިވަނީ ހަ މަނަވަރު ކަމަށާއި، މި މިޝަނަށް މައިގަނޑު ގޮތެއްގައި އެހީތެރިކަން ފޯރުކޮށްދޭ ޤައުމުތަކުގެ ތެރޭގައި އިޓަލީވިލާތާއި ގްރީސް ހިމެނޭ ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.

ކައްލާސްގެ އިލްތިމާސް އައިސްފައި ވަނީ، އީޔޫގެ މިޝަނަށް ދޭ އެހީތެރިކަން އިތުރުކުރުމަށް އިޓަލީވިލާތުން ވެސް ވަކިން އީޔޫގެ ބައިވެރިންނަށް ބާރުއަޅަމުންދާ ދަނޑިވަޅެއްގަ އެވެ. ވިޔަފާރި އުޅަނދުތަކުން އެދޭ ރައްކާތެރިކަން ފޯރުކޮށްދިނުމަށް މިހާރު ހުރި ވަސީލަތްތައް އެކަށީގެން ނުވާ ކަމަށް އިންޒާރު ދެއްވައި، އިތުރު މަނަވަރުތަކަށް އެދިވަޑައިގެންފައިވަނީ އިޓަލީވިލާތުގެ ދިފާޢީ ވަޒީރު ގުއިޑޯ ކްރޮސެއްޓޯ އެވެ. މިޝަން ވަރުގަދަކުރުމަށް މި ފަދަ ގޮވާލުންތަކެއް އޮތް ނަމަވެސް، މި އޮޕަރޭޝަން ފުޅާކުރުމަށް އީޔޫގެ މެންބަރު ޤައުމުތަކުން އަދި އެއްބަސްވެފައެއް ނުވެ އެވެ.

އާސްޕިޑީސް މިޝަން ފުރަތަމަ ރޭވި އިރު މަދުވެގެން 10 މަނަވަރު ބޭނުންވާނެ ކަމަށް ލަފާކުރެވުނު ކަމަށް ކައްލާސް ވިދާޅުވި އެވެ. އަދި، އޭގެ ފަހުން ސަލާމަތީ މަސްރަހު އިތުރަށް ގޯސްވެފައިވާ ކަމަށް ވެސް އޭނާ ފާހަގަކުރެއްވި އެވެ.

ސުވައިސް ކޯރު މެދުވެރިކޮށް އިންޑިއާ ކަނޑާއި މެޑިޓެރޭނިއަން ކަނޑު ގުޅުވައިދޭ މަގުގެ ނާޒުކުކަމާމެދު ވިލާތުގެ ކަންބޮޑުވުންތައް އިތުރުވަމުންދާ މިންވަރު، މި މަސައްކަތް އަލުން ވަރުގަދަކުރުމުން ހާމަވެގެން ގޮސްފައިވާކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. މި މަގުގެ ދަތުރުފަތުރަށް ބުރޫއަރައިފިނަމަ، އޭގެ ނޭދެވޭ އަސަރު މުދާ އުފުލުމަށާއި، ސަޕްލައި ޗެއިންތަކަށާއި، ހަކަތައިގެ ބާޒާރުތަކަށް ފޮރާނެކަމަށް އެ ފަރާތްތަކުން ބުނެ އެވެ.