ހުޅަނގު އައްސޭރިން ރިޕޯޓުކުރަމުންދިޔަ އެމެރިކާގެ ނޫސްވެރިއަކު ހައްޔަރުކޮށްފި
16 ސެޕްޓެމްބަރު 2026 | ބުދަ 03:29އީރާނުގެ މީޑިއާއަކަށް މަސައްކަތްކުރާ އެމެރިކާގެ ނޫސްވެރިޔާ ނަގާ ހާމިދު، ޖާސޫސްކުރުމުގެ ތުހުމަތުގައި އިސްރާއީލް ސިފައިން ހުޅަނގު އައްސޭރިން ހައްޔަރުކޮށްފި. މި އޮޕަރޭޝަންތަކުގައި ފަލަސްތީނުގެ އިތުރު ތިން ނޫސްވެރިންވެސް ހައްޔަރުކޮށްފައިވާއިރު، މިއީ ނޫސްވެރިކަމުގެ މަސައްކަތަށް ހުރަސްއެޅުމަށް ހިންގި އަމަލެއްކަމަށް އާއިލާއިން ތުހުމަތުކުރޭ
އީރާނުގެ ޕްރެސް ޓީވީގައި މަސައްކަތްކުރާ އެމެރިކާގެ ނޫސްވެރިޔާ ނަގާ ހާމިދު ހައްޔަރުކޮށްފައިވާ ކަމުގެ ރިޕޯޓު ޕްރެސް ޓީވީން ކުރަނީ | އެކްސް
އިސްތިއުމާރު ކޮށްފައިވާ ފަލަސްތީނުގެ ހުޅަނގު އައްސޭރީގެ ދެކުނުގެ ސަރަހައްދުތަކުގައި އިސްރާއީލް ސިފައިން އަންގާރަ ދުވަހު ހިންގި ވަކިވަކި އޮޕަރޭޝަންތަކެއްގައި، އެމެރިކާގެ ނޫސްވެރިއަކު ހައްޔަރުކޮށްފި އެވެ. މި އޮޕަރޭޝަންތަކުގައި އެ ނޫސްވެރިޔާގެ އިތުރުން ފަލަސްތީނުގެ ތިން ނޫސްވެރިން ވެސް ހައްޔަރުކޮށްފައިވާ ކަމަށް މަންޒަރު ފެނުނު މީހުން ވަނީ ބުނެފަ އެވެ.
ރާމަﷲގެ އިރުއުތުރުން އޮންނަ ސިލްވާދުގައި ދިރިއުޅޭ އެމެރިކާގެ ރައްޔިތެއް ކަމަށްވާ ފްރީލާންސް ނޫސްވެރިޔާ ނަގާ ހާމިދު ހައްޔަރުކޮށްފައިވަނީ، އަލް-ޚަލީލްގައި އިސްރާއީލު ސިފައިން ހިންގާފައިވާ ޖަރީމާތަކެއްގެ ވީޑިއޯތަކެއް ރެކޯޑުކުރުމަށްފަހު އެނބުރި ދަނިކޮށެވެ. ބަޔިތުލަހްމުގެ ދެކުނުން އޮންނަ ތަގޫޢު ކައިރީގައި ގާއިމުކޮށްފައިވާ އަސްކަރީ ޗެކްޕޮއިންޓަކުން އިސްރާއީލް ސިފައިން މީޑިއާ ޓީމެއް ހުއްޓުވައި ހާމިދު ހައްޔަރުކުރި ނަމަވެސް، އެ ޓީމުގައި ހިމެނޭ އެހެން މީހުން ވަނީ ދޫކޮށްލާފަ އެވެ.
އިސްރާއީލްގެ ނޫހަކުން ރިޕޯޓުކޮށްފައިވާ ގޮތުގައި، ހާމިދަކީ އެމެރިކާގެ ރައްޔިތެއް ނަމަވެސް އޭނާއަކީ އީރާނުގެ ދައުލަތުގެ މީޑިއާ ކަމަށްވާ 'ޕްރެސް ޓީވީ' އަށް ރިޕޯޓުކޮށްދޭ ނޫސްވެރިއެއް ކަމަށެވެ. އޭނާ ހައްޔަރުކުރީ ބަޔިތުލަހްމުގެ އިރުދެކުނުގައި ގާއިމުކޮށްފައިވާ ވަގުތީ ޗެކްޕޮއިންޓެއް ކައިރިންނެވެ. އިސްރާއީލްގެ އަސްކަރީ މަސްދަރުތަކާ ހަވާލާދީ އެ ނޫހުން ބުނީ، ހާމިދު ހައްޔަރުކުރީ އީރާނުގެ މީޑިއާއަށް މަސައްކަތް ކުރާތީ ކަމަށާއި، "ދުޝްމަން ޖަމާއަތަކަށް" އެހީތެރިވުމާއި ޖާސޫސްކުރުމުގެ ތުހުމަތުގައި އޭނާގެ މައްސަލަ ތަހުގީގު ކުރަމުންދާތީ ކަމަށެވެ.
ހާމިދުގެ އާއިލާއިން ބުނީ، އޭނާ ހައްޔަރުކޮށްފައިވަނީ ހުޅަނގު އައްސޭރީގައި ނޫސްވެރިކަމުގެ މަސައްކަތެއް ނިންމާލުމަށްފަހު އެނބުރި ދަނިކޮށް ކަމަށެވެ. އަދި، މީގެ ކުރިން އިސްރާއީލްގެ އިސްތިއުމާރީ ބާރުތަކުން ހަމަލާދީފައިވާ ފަލަސްތީނުގެ ގުސްރާ އަވަށާ ގުޅޭގޮތުން އޭނާ ތައްޔާރުކުރި ރިޕޯޓުތަކާ ގުޅިގެން، އިސްރާއީލުން އޭނާއަށް އަމާޒުކޮށް ފިޔަވަޅު އަޅަމުންދާ ކަމަށް އާއިލާއިން ވަނީ ތުހުމަތުކޮށްފަ އެވެ.
އަނަދޯލް ނޫސް އޭޖެންސީއަށް މައުލޫމާތު ދިން މަންޒަރު ފެނުނު މީހުން ބުނީ، މި އޮޕަރޭޝަންތަކުގައި ހައްޔަރުކުރި ފަލަސްތީނުގެ ތިން މީހުން ހައްޔަރުކޮށްފައިވަނީ އަލް-ޚަލީލްގެ ދެކުނުން އޮންނަ އަލް-މަޖްދު އަވަށުގެ ކައިރީގައި ހުރި އެ މީހުންގެ އަމިއްލަ ބިންތަކެއްގައި ތިއްބައެވެ.
2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން އިސްރާއީލުން ޣައްޒާގައި ހިންގަމުންދާ ގަތުލުއާންމާ އެކު، އިސްތިއުމާރުކޮށްފައި އޮތް ހުޅަނގު އައްސޭރީގައި ވެސް އިސްރާއީލް ސިފައިން ވަނީ އޮޕަރޭޝަންތައް ވަރުގަދަކޮށްފަ އެވެ. މީގެ ތެރޭގައި އިރުމަތީ ގުދުސް ހިމެނޭހެން މީހުން ޝަހީދުކުރުމާއި، ހައްޔަރުކުރުމާއި، މަޖުބޫރުން މީހުން ގެދޮރުން ބޭރުކުރުމާއި، ގެދޮރު ސުންނާފަތިކުރުމުގެ އިތުރުން ޣައިރުގާނޫނީ ޔަހޫދީ ވަޒަންވެރިން ދިރިއުޅޭ އާބާދީތައް ފުޅާކުރުން ހިމެނެ އެވެ.
މަސްދަރު: އަނަދޯލް އޭޖެންސީ
