ޤުދުސްގައި ހުންނަ އިނގިރޭސިވިލާތުގެ ކޮންސިއުލޭޓް ބަންދުކުރަން އިސްރާއީލުން އަންގައިފި

އިސްރާއީލުން އިސްތިއުމާރުކޮށްފައިވާ އިރުމަތީ ޤުދުސްގައި ހުންނަ އިނގިރޭސިވިލާތުގެ ކޮންސިއުލޭޓް، 30 ދުވަހުގެ ތެރޭގައި ބަންދުކުރުމަށް އަންގާފައިވާ ކަމަށް އިސްރާއީލުގެ ދައުލަތުގެ މީޑިއާއިން ރިޕޯޓުކޮށްފި އެވެ. އިސްރާއީލުން މި ފިޔަވަޅު އަޅާފައި މި ވަނީ، އިސްތިއުމާރުކޮށްފައިވާ ހުޅަނގު އައްސޭރީގައި އިސްރާއީލުގެ ޣައިރުގާނޫނީ ވަޒަންވެރިންނާއި ކުންފުނިތަކުން އުފައްދާ މުދާ އިނގިރޭސިވިލާތަށް އެތެރެކުރުން މަނާކުރަން ނިންމާފައިވާ ކަން އިނގިރޭސިވިލާތުގެ ޚާރިޖީ ވަޒީރު އެޑް މިލިބެންޑް އިއުލާނު ކުރެއްވުމުން އެ ކަމާ ހިތްހަމަނުޖެހިގެންނެވެ.

މީގެ އިތުރުން، އިސްރާއީލުގެ ޣައިރުގާނޫނީ އާބާދީތައް ފުޅާކުރުމުގައި ބައިވެރިވާ ކުންފުނިތަކާއި ފަރުދުންނާ ދެކޮޅަށް ދަތިކުރުމުގެ ފިޔަވަޅު އެޅުމަށް ވެސް އިނގިރޭސިވިލާތުން ވަނީ ނިންމާފަ އެވެ. އިސްރާއީލުގެ ދައުލަތުގެ މީޑިއާއިން ބުނީ، ޤުދުސްގައި ހުންނަ އިނގިރޭސިވިލާތުގެ ކޮންސިއުލޭޓް ބަންދުކުރުމަށް ދީފައިވާ 30 ދުވަހުގެ މުއްދަތު ހަމަވުމުން، އެ ތަނުގައި ތިބޭ އިނގިރޭސިވިލާތުގެ ޑިޕްލޮމޭޓުންނަށް ދީފައިވާ ހުއްދަތައް ނުވަތަ އެކްރެޑިޓޭޝަން ވެސް ބާތިލުވާނެ ކަމަށެވެ.

އަންގާރަ ދުވަހު އިނގިރޭސިވިލާތުގެ ގާނޫނުހަދާ މަޖިލީހުގެ ތިރިގޭގައި ވާހަކަފުޅު ދައްކަވަމުން މިލިބެންޑް ވަނީ، ހުޅަނގު އައްސޭރީގެ ޣައިރުގާނޫނީ އާބާދީތަކުގައި ދިރިއުޅޭ ވަޒަންވެރިންނާ އެ ބިންތަކުގައި ހަރަކާތްތެރިވާ ކުންފުނިތަކުން އުފައްދާ ތަކެތި އިނގިރޭސިވިލާތަށް އެތެރެކުރުން މަނާކުރުމުގެ އިތުރުން، ފަލަސްތީނުގެ ރައްޔިތުންނާ ދެކޮޅަށް އަނިޔާވެރި ޖަރީމާތައް ހިންގުމަށް ހިތްވަރުދޭ އިސްރާއީލުގެ ހަރުކަށި ރައްޔިތުންނާ ދެކޮޅަށް ވެސް ދަތިކުރުމުގެ ފިޔަވަޅުތައް އެޅުމަށް ނިންމާފައިވާ ކަމަށެވެ.

މީގެ އިތުރުން، އިސްރާއީލުން ހިންގާ އިސްތިއުމާރީ ޖަރީމާތަކަށް އެހީތެރިވެދޭ ފަދަ ހަތިޔާރު އެކްސްޕޯޓްކުރުމުގެ އާ ހުއްދަތައް ދޫނުކުރާނެ ކަމަށާއި، މިހާރު ވެސް ސަސްޕެންޑްކޮށްފައިވާ ހަތިޔާރު އެކްސްޕޯޓްކުރުމުގެ 30 ލައިސަންސް އެ ގޮތުގައި ދަމަހައްޓާނެ ކަމަށް ވެސް އޭނާ ވިދާޅުވި އެވެ. އަދި، އިސްތިއުމާރު ކޮށްފައިވާ ހުޅަނގު އައްސޭރީގައި އިސްރާއީލުގެ ސިފައިންނާއި "ޓެރަރިސްޓް ވަޒަންވެރިން" ފަލަސްތީނުގެ ރައްޔިތުންނާ ދެކޮޅަށް "ނަސްލު ނައްތާލުމުގެ" ނަސްލުހޭދެއް ހިންގަމުންދާ ކަމަށް އިނގިރޭސިވިލާތުގެ ސަރުކާރުން ގަބޫލުކުރާ ކަމަށް ވެސް މިލިބެންޑް އިއުލާނު ކުރެއްވި އެވެ.

ނަތަންޔާހޫގެ ލާއިންސާނީ ޖަރީމާތަކާ ގުޅިގެން އިސްރާއީލު އެކަހެރިވަނީ

އިސްރާއީލުގެ ހައްދުފަހަނައެޅި ބޮޑުވަޒީރު ބެންޖަމިން ނަތަންޔާހޫގެ ސަރުކާރުގެ ސިޔާސަތުތަކާއި ޣައްޒާގައި ހިންގަމުންދާ ގަތުލުއާންމުގެ ސަބަބުން އިސްރާއީލު ބައިނަލްއަގުވާމީ މުޖުތަމައުން އެކަހެރިވަމުންދާ ކަމަށް، އެ ގައުމުގެ އިދިކޮޅު ފަރާތްތަކުން ވެސް ދަނީ ބުނަމުންނެވެ. އަދި، އެ ފަރާތްތަކުން ދަނީ ނަތަންޔާހޫގެ ސަރުކާރަށް ފާޑުކިޔަމުންނެވެ.

މީގެ އަހަރެއްހާ ދުވަސް ކުރިން ނަތަންޔާހޫ އަމިއްލައަށް ވެސް ވަނީ، އިސްރާއީލު އެކަހެރިވަމުންދާ ކަމަށް އެއްބަސްވެފަ އެވެ. ފަލަސްތީނުގެ ތަފާސްހިސާބުތަކުން ދައްކާ ގޮތުގައި، 2022 ވަނަ އަހަރުގެ ފަހުކޮޅު ނަތަންޔާހޫގެ ސަރުކާރު ވެރިކަމާ ހަވާލުވި ފަހުން، ހުޅަނގު އައްސޭރީގައި އަލަށް 104 ޣައިރުގާނޫނީ އާބާދީއެއް ހެދުމުގެ ހުއްދަ ދީފައިވާ އިރު، ދަނޑުވެރިކަމަށް ޚާއްސަ 160 އައުޓްޕޯސްޓް ވަނީ ގާއިމުކޮށްފަ އެވެ.

ފަލަސްތީނުގެ ކޮލޮނައިޒޭޝަން އެންޑް ވޯލް ރެސިސްޓެންސް ކޮމިޝަނުން ބުނާ ގޮތުގައި، 2026 ވަނަ އަހަރުގެ ފުރަތަމަ ހަ މަސްދުވަހުގެ ތެރޭގައި އިސްރާއީލުގެ ހައްދުފަހަނައެޅި ވަޒަންވެރިން ވަނީ ހުޅަނގު އައްސޭރީގައި ދިރިއުޅޭ ފަލަސްތީނުގެ ރައްޔިތުންނަށް 3,488 ހަމަލާއެއް ދީފަ އެވެ. މި ހަމަލާތަކުގައި ފަލަސްތީނުގެ 17 މީހަކު ޝަހީދުކޮށްލާފައިވާއިރު، ބަދަވީ ދަރިކޮޅުގެ 26 އާއިލާއެއް އެ މީހުންގެ ގެދޮރުން ބޭރުކޮށްފައިވެ އެވެ. މީގެ އިތުރުން، އަލަށް 42 ޣައިރުގާނޫނީ އައުޓްޕޯސްޓް ގާއިމުކޮށްފައިވާ ކަން ވެސް އެ ކޮމިޝަނުން ވަނީ ފާހަގަކޮށްފަ އެވެ.

ފަލަސްތީނުގެ ތަފާސްހިސާބުތަކުން ދައްކާ ގޮތުގައި، އިސްތިއުމާރު ކޮށްފައިވާ އިރުމަތީ ޤުދުސް ހިމެނޭހެން ހުޅަނގު އައްސޭރީގެ 194 ޣައިރުގާނޫނީ އާބާދީއާއި 400 އައުޓްޕޯސްޓެއްގައި، އިސްރާއީލުގެ ގާތްގަނޑަކަށް 750,000 ވަޒަންވެރިން މިހާރު ދިރިއުޅެ އެވެ. 1967 ވަނަ އަހަރުން ފެށިގެން އިރުމަތީ ޤުދުސް ހިމެނޭހެން ހުޅަނގު އައްސޭރިއަށް އިސްރާއީލުން އަތްގަދަ ކޮށްފައިވާއިރު، އެ ސަރަހައްދުތަކުގައި އިސްރާއީލުން ގާއިމުކޮށްފައިވާ އާބާދީތަކަކީ ބައިނަލްއަގުވާމީ ގާނޫނުތަކާ ޚިލާފު ތަންތަން ކަމަށް ބައިނަލްއަގުވާމީ މުޖުތަމައުން ގަބޫލުކުރެ އެވެ. ނަމަވެސް، އިސްރާއީލުން މި ނިންމުންތަކަށް އިންކާރު ކުރެ އެވެ.