އިސްރާއީލަށް 2.8 ބިލިއަން ޑޮލަރުގެ ހަތިޔާރު ވިއްކަން ހައުސްގައި ހުރަަސްއަޅަނީ
17 ސެޕްޓެމްބަރު 2026 | ބުރާސްފަތި 02:51އިސްރާއީލަށް 2.8 ބިލިއަން ޑޮލަރުގެ ނުރައްކާތެރި ހަތިޔާރު ވިއްކުމަށް ހުއްދަ ނުދެއްވާނެކަން އެމެރިކާގެ ހައުސް ފޮރިން އެފެއާޒް ކޮމިޓީގެ މެންބަރު ގްރެގަރީ މީކްސް ހާމަކުރައްވައިފި. މީކްސް މި ނިންމެވުން ނިންމެވީ ޣައްޒާއާއި ލުބުނާނުގެ އާންމުން ދިރިއުޅޭ ސަރަހައްދުތަކުގައި މި ހަތިޔާރު ބޭނުންކޮށްފާނެ ކަމުގެ ބޮޑު ކަންބޮޑުވުމެއް އޮތުމުން، އެމެރިކާގެ ޒިންމާ އަދާކުރުމުގެ ގޮތުން
އެމެރިކާގެ ހައުސް އޮފް ރެޕްރެޒެންޓެޓިވްސްގެ މެންބަރު އަދި ފޮރިން އެފެއާޒް ކޮމިޓީގެ އިސް މެންބަރު ގްރެގަރީ މީކްސް | ގެޓީ އިމޭޖަސް
އެމެރިކާގެ ގާނޫނުތަކާއި ބައިނަލްއަގުވާމީ ގާނޫނުތަކާ ޚިލާފުވެދާނެ ކަމުގެ ކަންބޮޑުވުންތަކާ ހުރެ، ރަައީސް ޑޮނަލްޑް ޓްރަމްޕްގެ ސަރުކާރުން އިސްރާއީލް އަށް ވިއްކަން ހުށަހަޅާފައިވާ 2.8 ބިލިއަން ޑޮލަރުގެ ހަތިޔާރު ވިއްކުމަށް ހުއްދަ ނުދެއްވާނެކަން އެމެރިކާގެ ހައުސް އޮފް ރެޕްރެޒެންޓޭޓިވްސްގެ މެންބަރު ގްރެގަރީ މީކްސް ބުދަ ދުވަހު ހާމަކުރައްވައިފި އެވެ.
އެމެރިކާގެ ހަތިޔާރު ގުދަންތަކުގައި ހުރި އެންމެ ނުރައްކާތެރި ހަތިޔާރުގެ ތެރޭގައި ހިމެނޭ 2،000 ޕައުންޑްގެ 40،000 ބޮން އިސްރާއީލަށް ވިއްކުމުގެ މި މުއާމަލާތާ ގުޅޭގޮތުން، ހައުސް ފޮރިން އެފެއާޒް ކޮމިޓީގެ އިސް މެންބަރުގެ މަގާމުގައި ހުންނެވި މީކްސް ވިދާޅުވީ، އިސްރާއީލްގެ ސަލާމަތާއި ސަރަހައްދީ ނުރައްކާތަކުން ދިފާއުވުމުގެ ގާބިލުކަމަށް އޭނާ އަބަދުވެސް ތާއީދުކުރައްވާ ކަމަށެވެ. ނަމަވެސް، ޣައްޒާއާއި ލުބުނާނުގައި ގިނަ އަދަދެއްގެ އާންމުން އާބާދުވެފައިވާ ސަރަހައްދުތަކުގައި މި ފަދަ ބާރުގަދަ ހަތިޔާރު ބޭނުންކޮށްފާނެ ގޮތަކާމެދު ހައްލުނުކުރެވި ހުރި ބޮޑެތި ކަންބޮޑުވުންތަކެއް އެބަހުރިކަން އޭނާ ފާހަގަކުރެއްވި އެވެ.
އާންމު ރައްޔިތުން ހިމާޔަތްކުރުމާ ގުޅޭގޮތުން ނުވަތަ އިސްރާއީލް ސަރުކާރުން މި ހަތިޔާރު ބޭނުންކުރާނެ ހާލަތްތަކާ ގުޅޭގޮތުން އެމެރިކާ ސަރުކާރުން އެކަށީގެންވާ ޔަގީންކަމެއް ދީފައިނުވާކަން ފާހަގަކުރައްވައި މީކްސ ވިދާޅުވީ، "އެހެންކަމުން، މި ވަގުތު މި ވިޔަފާރިއަށް އަޅުގަނޑު ހުއްދައެއް ނުދޭނަން. މި ނިންމުމަކީ އިސްރާއީލުގެ ގާނޫނީ ދިފާއީ ބޭނުންތަކަށް ކޮންގްރެސްއިން އޮތް ތާއީދު ކުޑަވެގެން ނިންމި ނިންމުމެއް ނޫން. މިއީ، އެމެރިކާގެ ފައިސާއިން ގަންނަ ހަތިޔާރު ބޭނުންކުރަނީ ގާނޫނީ އިމުގެ ތެރެއިން، ޒިންމާދާރުކަމާއެކު، އަދި އިންސާނީ ފުރާނައަށް ރައްކާތެރިވާނެ ފަދަ އުސޫލުތަކެއްގެ ދަށުންކަން ކަށަވަރުކުރުމަށް ކޮންގްރެސްގެ މައްޗަށް އޮތް ޒިންމާ އަދާކުރުން،" ކަމަށެވެ.
މި ދަނޑިވަޅުގައި، ކައުންސިލް އޮން އެމެރިކަން-އިސްލާމިކް ރިލޭޝަންސްއިން (ކީއޭއައިއާރް) ވަނީ މީކްސްގެ ނިންމެވުމަށް މަރުހަބާ ކިޔާފަ އެވެ. ކީއޭއައިއާރްއިން ނެރުނު ބަޔާނެއްގައި ބުނީ، އެތައް އަހަރެއް ވަންދެން އާންމު ރައްޔިތުން ޝަހީދުކުރަމުން ދިއުމާއި، ނިޒާމީ ގޮތުން ރާވައިގެން ޣައްޒާ ސުންނާފަތި ކުރަމުންދާ ދިއުމަށް ބަލާއިރު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ނަސްލީ ތަފާތުކުރުން ބޮޑު އަދި ނަސްލު ނައްތާލުމަށް ފާޅުގައި މަސައްކަތްކުރާ ސަރުކާރުން މި ހަތިޔާރު ބޭނުންކުރާނެ ގޮތް ނޭނގޭ ކަމަށް ބުނެވޭނެ އެއްވެސް ބުއްދިވެރި މީހަކު ނުހުންނާނެ ކަމަށެވެ.
މީކްސްގެ ނިންމެވުމަކީ "މުހިންމު ފުރަތަމަ ފިޔަވަޅެއް" ކަމަށް ސިފަކުރި ނަމަވެސް، މި ހަތިޔާރު ފޮނުވުން ދާއިމީކޮށް ހުއްޓުވުމަށް އެ ޖަމުއިއްޔާއިން ވަނީ ކޮންގްރެސްއަށް ގޮވާލާފަ އެވެ. "ކޮންގްރެސްއިން ޖެހޭނީ ބުއްދި ގަބޫލުނުކުރެވޭ މި ހަތިޔާރު ފޮނުވުމުގެ މުއާމަލާތް ދާއިމީކޮށް ހުއްޓުވައި، އިސްރާއީލު ސަރުކާރުގެ ޖަރީމާތަކަށް އެއްވެސް ޝަރުތަކާ ނުލައި އެހީތެރިވުން ހުއްޓާލަން. އިތުރު ބޮމެއް ދީގެން ނުވާނެ،" އެ ޖަމުއިއްޔާގެ ބަޔާނުގައި ބުނެފައިވެ އެވެ.
2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޣައްޒާ ގައި ހިންގަމުންދާ ގަތުލުއާންމުގައި އިސްރާއީލަށް އެހީތެރިކަން ފޯރުކޮށްދޭތީ އެމެރިކާއަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. މި ހަނގުރާމައިގައި މިހާތަނަށް 73,000 އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. މިދިޔަ އޮކްޓޫބަރު މަހު ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު ނަމަވެސް، އެ އެއްބަސްވުމާ ތަކުރާރުކޮށް ދަނީ ޚިލާފުވަމުންނެވެ.
މަސްދަރު: އަނަދޯލް އޭޖެންސީ
