ފަލަސްތީނު ރައްޔިތުން ގަދަބާރުން ގައުމުން ބޭލުމާ އަރަބި ލީގުން ދެކޮޅު!

ފަލަސްތީނުގެ ރައްޔިތުން ހިމާޔަތްކުރުމަށް ބައިނަލްއަގުވާމީ މުޖުތަމައުން ވަގުތުން ފިޔަވަޅު އަޅަންޖެހޭ ކަމަށް ބުނެ، ފަލަސްތީނުގެ ބިމުން އެ ގައުމުގެ ރައްޔިތުން ގަދަކަމުން ބޭރުކޮށްލަން ކުރާ އެއްވެސް މަސައްކަތަކަށް ތާއީދު ނުކުރާނެ ކަމަށް އަަރަބި ގައުމުތަކުގެ ޚާރިޖީ ވަޒީރުން ވިދާޅުވެއްޖެ އެވެ. މި ގޮވާލުންތައް ހިމަނާފައި ވަނީ މިސްރުގެ ވެރިރަށް ގާހިރާގައި ބޭއްވި އަރަބި ލީގުގެ ވަޒީރުންގެ ފެންވަރުގެ ބައްދަލުވުމުގަ އެވެ. އެ ބައްދަލުވުން ނިންމާލުމަށްފަހު ވަނީ މިކަމާ ގުޅޭ ގަރާރުތަކެއް ފާސްކޮށްފަ އެވެ.

އިސްރާއީލުން ދެމުންދާ ޢުދުވާނީ ހަމަލާތަކުން ފަލަސްތީނުގެ ރައްޔިތުން ސަލާމަތްކުރަން ޖެހޭ ކަމަށް ވަޒީރުންގެ ގުޅިފައިވާ ގަރާރުގައި ވިދާޅުވި އެވެ. އަދި، އެ އިސްރާއީލުގެ އިސްތިއުމާރީ ބާރުތަކުން ހިންގާ އަނިޔާވެރި އަމަލުތަކުން ފަލަސްތީނުގެ ރައްޔިތުން ރައްކާތެރިކުރަން ޖެހޭނެ ކަމަށް ވަޒީރުން ވިދާޅުވި އެވެ. އެހެންކަމުން، އދ. އާއި ސަލާމަތީ މަޖިލިސް ހިމެނޭހެން ބައިނަލްއަގުވާމީ މުޖުތަމައުން ވަގުތުން ފިޔަވަޅު އެޅުމަށް ވެސް ގަރާރުގައި ވަނީ ބާރުއަޅާފަ އެވެ.

ޣައްޒާ އަލުން އާރާސްތު ކުރުމަށާއި އެ ސަރަހައްދުގެ ހާލަތު ރަނގަޅުކުރުމަށް އަރަބި-އިސްލާމީ ޕްލޭނެއް މީގެ ކުރިން ވަނީ އެކުލަވާލާފަ އެވެ. މި ޕްލޭނަށް ސިޔާސީ، މާލީ އަދި ގާނޫނީ އެހީތެރިކަން ދިނުމަށް ވެސް އަރަބި ގައުމުތަކުގެ ޚާރިޖީ ވަޒީރުން ގޮވާލެއްވި އެވެ. އަދި، މި ޕްލޭނަށް ބޭނުންވާ ފައިސާ ހޯދުމަށް ގާހިރާގައި ބައިނަލްއަގުވާމީ ކޮންފަރެންސެއް ބޭއްވުމަށް ވެސް ވަޒީރުން ވަނީ ތާޢީދު ކުރައްވާފަ އެވެ.

2025 ވަނަ އަހަރުގެ ޝަރްމުއްޝައިޚް ސުލްހައިގެ ސަމިޓުގައި ޣައްޒާގައި އިސްރާއީލުން ހިންގަމުންދާ ގަތުލުއާންމު ހުއްޓާލުމުގެ އެއްބަސްވުމެއް އެކުލަވާލި އެވެ. މި އެއްބަސްވުމުގެ ހުރިހާ މަރުހަލާތަކެއް ފުރިހަމައަށް ތަންފީޒުކުރުމަށް އަރަބި ގައުމުތަކުގެ ޚާރިޖީ ވަޒީރުން ވަނީ އަލުން ގޮވާލައްވާފަ އެވެ. މީގެ ތެރޭގައި އިސްރާއީލުގެ ޢުދުވާނީ ހަމަލާތައް ހުއްޓާލުމާއި ޣައްޒާ އަލުން އާރާސްތުކުރުމުގެ މަޝްރޫއުތައް ފެށުން ހިމެނެ އެވެ.

ފަލަސްތީނުގެ ރައްޔިތުން އެ މީހުންގެ ވަޒަނުން ބޭރުކުރަން ކުރާ އެއްވެސް ކަމެއް ބަލައިނުގަންނާނެ ކަމަށް ވެސް ވަޒީރުން އިއްތިފާގުވެ ވަޑައިގެންނެވި އެވެ. އަދި، އިސްތިއުމާރުކޮށްފައިވާ ފަލަސްތީނުގެ ބިންތަކުގެ އާބާދީގެ ތަރުތީބު ބަދަލުކުރަން އިސްރާއީލުން ކުރާ މަސައްކަތްތައް ބަލައިނުގަނެވޭނެ ކަމަށް ވެސް އެ ބޭފުޅުން ވިދާޅުވި އެވެ. މީގެ އިތުރުން، "އަމިއްލަ އިޚްތިޔާރުގައި ހިޖުރަކުރުމުގެ" ނަމުގައި، ޣައްޒާގެ ރައްޔިތުން އެ މީހުންގެ ބިމުން ބޭލުމަށް އިސްރާއީލުން ފަށާފައިވާ ސިޔާސަތު އަރަބި ޤައުމުތަކުގެ ޚާރިޖީ ވަޒީރުން ވަނީ ކުށްވެރި ކުރައްވާފަ އެވެ. ފަލަސްތީނުގެ ރައްޔިތުން އެ މީހުންގެ އަމިއްލަ ބިމުން ގަދަކަމުން ބޭރުކުރުމަކީ ނަސްލު ނައްތާލުމުގެ އަމަލެއް ކަމަށް ވަޒީރުން ސިފަ ކުރެއްވި އެވެ. އަދި، އެއީ ބައިނަލްއަގުވާމީ ގާނޫނުތަކާ ޚިލާފު ބޮޑު ޖަރީމާއެއް ކަމަށް ވެސް އެ ބޭފުޅުން ވިދާޅުވި އެވެ.

މީގެ އިތުރުން، އިސްރާއީލުން ޣައްޒާގައި ނަސްލު ނައްތާލުމުގެ ޖަރީމާއެްއ ހިންގާތީ ވަޒީރުން ވަނީ ހަރުކަށި އިބާރާތުން އެ ކަން ކުށްވެރިކުރައްވާފަ އެވެ. އަދި، މީހުން ބަނޑަށް ޖެއްސުމާއި، ފަލަސްތީނުގެ ބިންތައް ހިސާރުކުރުމާއި، ހަނގުރާމައިގެ ކުށްތަކާއި އިންސާނިއްޔަތާ ޚިލާފު ޖަރީމާތައް ވެސް ވަޒީރުން ކުށްވެރިކުރެއްވި އެވެ. އިސްރާއީލު ސިފައިންގެ އަނިޔާވެރި ގަތުލުއާންމުގައި މިހާތަނަށް 73,000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުކޮށްލާފަ އެވެ. އަދި، 174,000 އަށްވުރެ ގިނަ މީހުން ވަނީ ޒަޚަމްކޮށްލާފަ އެވެ. މި ގަތުލުއާންމުގެ ތެރެއިން ޣައްޒާގެ އާންމު ޚިދުމަތްތަކަށް ބޭނުންވާ ގިނަ ވަސީލަތްތަކެއް ވެސް ވަނީ ސުންނާފަތިކޮށްލާފަ އެވެ.