އެލްނީނޯއާ ގުޅިގެން ހާލަތު ގޯސްވެއްޖެނަމަ ބިންހިއްކުމުގެ މަޝްރޫއުތައް މެދުކަނޑާލާނެ: މިނިސްޓަރު ޝަރީފް
25 ސެޕްޓެމްބަރު 2026 | ހުކުރު 07:07އެލްނީނޯގެ ސަބަބުން ކަނޑުގެ ލޮނުގަނޑު ހޫނުވެ ފަރުތަކުގެ ގައު ހުދުވުމުގެ މައްސަލަ ކުރިމަތިވަމުންދާތީ، ތިމާވެށީގެ ހާލަތު އިތުރަށް ގޯސްވެއްޖެ ނަމަ ބިންހިއްކުމުގެ މަޝްރޫއުތައް މެދުކަނޑާލާނެ ކަމަށް އެންވަޔަރަންމަންޓް މިނިސްޓަރު ޝަރީފް ވިދާޅުވި. މިކަމުގައި ކޮންޓްރެކްޓަރުންގެ އެއްބާރުލުން ބޭނުންވާކަން ވެސް މިނިސްޓަރު ޝަރީފް ފާހަގަކުރެއްވި
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަލީ ޝަރީފް ވާހަކަ ދައްކަވަނީ | ރާއްޖެއެމްވީ
އެލްނީނޯގެ ސަބަބުން ތިމާވެއްޓަށް ކުރާ އަސަރު ބޮޑުވެ، ހާލަތު އެ ވަރަށް ގޯސްވެއްޖެ ނަމަ ބިންހިއްކުމުގެ މަޝްރޫއުތައް މެދުކަނޑާލާނެ ކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަލީ ޝަރީފް ވިދާޅުވެއްޖެ އެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޝަރީފް ވިދާޅުވީ، މިހާރު ލަފާކުރެވިފައިވާ ގޮތަށް އެލްނީނޯ ކުރިއަށް ހިނގައްޖެނަމަ، އިތުރަށް ހޫނުވުމާއެކު އަންނަ އަހަރަށް ވެސް މި ހާލަތު ދިގުލައިގެން ދިއުމުގެ ފުރުސަތު އެބައޮތް ކަމަށެވެ. އަދި އެލްނީނޯގެ އިތުރުން އިންޑިއަން އޯޝަން ޑައިޕޯލް (އައިއޯޑީ) އިން އަންނަ ބަދަލުތަކުގެ ސަބަބުން ކައުންޓަ އިފެކްޓެއް ފެނިދާނެ ކަމަށް ވެސް ފޯކާސްޓްތަކުން ދައްކާ ކަމަށާއި، މި ދެ ސިސްޓަމަށް ވާގޮތް މޫސުމާ ބެހޭ އިދާރާ (މެޓް) އިން ކެނޑިނޭޅި މޮނިޓާ ކުރަމުން އަންނަ ކަމަށް ވިދާޅުވި އެވެ.
އެލްނީނޯގެ ސަބަބުން އެންމެ ބޮޑު ނުރައްކަލެއް ކުރިމަތިވަނީ ރާއްޖޭގެ ފަރުތަކަށްކަން ފާހަގަކުރައްވައި މިނިސްޓަރު ޝަރީފް ވިދާޅުވީ، މި ދުވަސްވަރު ގައު ހުދުވުމުގެ މައްސަލަ ކުރިމަތިވާ ކަމަށެވެ. އަދި މީގެ ކުރިން ވެސް މައިނަރ އެލްނީނޯއެއްގެ ދުވަސްވަރު ބިންހިއްކުމުގެ މަސައްކަތްތައް ހުއްޓާލާފައިވާ ކަމަށް މިނިސްޓަރު ޝަރީފް ވިދާޅުވި އެވެ.
މީގެ އިތުރުން މިނިސްޓަރު ޝަރީފް ވިދާޅުވީ މަޝްރޫއުތައް ހުއްޓުވުމަކީ އެހައި ފަސޭހަ ކަމެއް ނޫން ކަމަށާއި، ބޮޑެތި އަގުބޮޑު ޑްރެޖަރުތައް ގެނެސްގެން ދުވާލަކަށް އެތައް ލައްކަ ޑޮލަރެއް ހޭދަކޮށްގެން ކުރިއަށްގެންދާ މަސައްކަތްތަކަކަށް ވާތީ ކޮންޓްރެކްޓަރުންގެ އެއްބާރުލުން މިކަމުގައި ވަރަށް ބޮޑަށް ބޭނުންވާ ކަމަށެވެ.
ނަމަވެސް އެ ގޮތަށް ހުއްޓާލަން ޖެހިއްޖެ ހާލަތެއްގައިގައި އެކަން ކުރާނެ ކަމަށް މިނިސްޓަރު ޝަރީފް ވިދާޅުވި އެވެ.
އެހެންވީމާ އެ ގޮތަށް ހުއްޓާލަން ޖެހިއްޖެ ހާލަތެއްގައި ކަމަށް ވަންޏާމުން، އެ ހާލަތު އެ ވަރަށް ގޯސްވެއްޖެ ކަމަށް ވަންޏާމުން ހަމަ ކުރިން ފަހަރެއްގައި ވެސް ހަމަ އަޅުގަނޑުމެން ވެއްޖެ މީގައި ހުއްޓާލާފައި. އެހެންވީމާ ދެންވެސް ހަމަ ހުއްޓާލަން ޖެހިއްޖެއްޔާމު އެ ހާލަތަށް ދިޔައިމާ އަޅުގަނޑުމެން ހުއްޓާލާނެއަލީ ޝަރީފް
އެލްނީނޯ އަކީ ކަނޑުގެ އޮއިވަރާއި މޫސުމަށް އަންނަ ބަދަލުތަކާ ގުޅިގެން ކޮންމެ މަދު އަހަރުތަކަކުން އެއްފަހަރު ދުނިޔެއަށް ކުރިމަތިވާ ގުދުރަތީ މޫސުމީ ބަދަލެކެވެ. މި ކަންތައްތައް މެދުވެރިވަނީ ޕެސިފިކް ކަނޑުގެ މެދުތެރެއާއި އިރުމަތީ ސަރަހައްދުގެ ލޮނުގަނޑު އާދަޔާ ހިލާފަށް ހޫނުވުމުގެ ސަބަބުންނެވެ.
