އެލްނީނޯއާ ގުޅިގެން ރާއްޖެއަށް ކުރިމަތިވެދާނެ ނުރައްކާތަކަށް ސަމާލުވުމަށް އެންޑީއެމްއޭ އިން އިލްތިމާސްކޮށްފި!
9 ސެޕްޓެމްބަރު 2026 | ބުދަ 10:18އެލްނީނޯގެ ސަބަބުން ކާބޯތަކެތީގެ އަގު އުފުލި، ފެނާއި ހަކަތައަށް އޮތް ޑިމާންޑް ބޮޑުވުމުގެ އިތުރުން މަސްވެރިކަމާއި ފަތުރުވެރިކަމަށް ނޭދެވޭ އަސަރުތަކެއް ކޮށްފާނެ ކަމަށް އެންޑީއެމްއޭ އިން ލަފާކުރޭ. އެހެންކަމުން، މުހިންމު ޚިދުމަތްތައް މެދުނުކެނޑި ފޯރުކޮށްދިނުމަށްޓަކައި ދައުލަތުގެ ހުރިހާ އިދާރާތަކުން ގުޅިގެން ދުރާލައި ތައްޔާރުވުމަށް އެ އޮތޯރިޓީން ވަނީ އިލްތިމާސްކޮށްފައި
މާލެއަށް ބޯކޮށް ވާރޭ ވެހެނީ | ރާއްޖެއެމްވީ
އެލްނީނޯ ކްލައިމެޓް ފެނޯމިނާ ނުވަތަ މޫސުމީ ބަދަލާ ގުޅިގެން ރާއްޖެއަށް ކުރިމަތިވެދާނެ ނުރައްކާތަކަށް ސަމާލުވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފި އެވެ.
އެލްނީނޯގެ ސަބަބުން ދުނިޔޭގެ މޫސުމަށާއި ކަނޑުތަކުގެ ފިނިހޫނުމިނަށް އަންނަ ބަދަލުތަކުގެ ސަބަބުން، ރާއްޖޭގެ އިގްތިސާދީ އަދި އިޖުތިމާއީ އެކި ދާއިރާތަކަށް ބޮޑެތި ގޮންޖެހުންތަކެއް ކުރިމަތިވެދާނެ ކަމަށް އެ އޮތޯރިޓީން ވަނީ ލަފާކޮށްފަ އެވެ.
އެންޑީއެމްއޭ އިން އާންމުކޮށްފައިވާ މައުލޫމާތުތަކަށް ބަލާއިރު، އެލްނީނޯގެ ސަބަބުން ރާއްޖެއަށް އެންމެ ބޮޑު އަސަރެއް ކުރާނެ އެއް ދާއިރާއަކީ ކާބޯތަކެތީގެ ރައްކާތެރިކަމެވެ. އެގޮތުން ހަނޑޫ، ތަރުކާރީ އަދި ކައްކާ ތެޔޮ ފަދަ ޒަރޫރީ ތަކެތީގެ އަގު އުފުލި، ތަކެތި ލިބުމުގައި ދަތިތަކެއް ކުރިމަތިވެދާނެ ކަމަށް ބެލެވެ އެވެ. މީގެ އިތުރުން ދުނިޔޭގެ ޝިޕިންގް ރޫޓުތަކަށް ބަދަލު އައުމާއި މުދާ އުފުލުމުގެ ހަރަދު ބޮޑުވުމުގެ ސަބަބުން ރާއްޖެއަށް މުދާ އެތެރެކުރުމުގައި ލޮޖިސްޓިކަލް ގޮންޖެހުންތަކެއް ކުރިމަތިވުމަކީ އެކަށީގެންވާ ކަމެކެވެ.
ފެނާއި ހަކަތައިގެ ދާއިރާއަށް ބަލާއިރު، ހޫނުގަދަވުމުގެ ސަބަބުން ފެނުގެ ޑިމާންޑް އިތުރުވެ، ފެން އުފެއްދުމަށްޓަކައި ޑީސެލިނޭޝަން ޕްލާންޓްތަކަށް ކުރާ ބާރު ބޮޑުވާނެ ކަމަށް އެންޑީއެމްއޭ އިން ވަނީ ބުނެފަ އެވެ. މީގެ ސަބަބުން ކަރަންޓު ބޭނުންކުރާ މިންވަރު އިތުރުވެ، ތެޔޮ އެތެރެކުރުމަށް ކުރަންޖެހޭ ހޭދަ ބޮޑުވެގެންދާނެ ކަމަށް އެންޑީއެމްއޭ އިން ފާހަގަކުރެ އެވެ. ހަމައެއާއެކު، ކަނޑުގެ ފިނިހޫނުމިނަށް އަންނަ ބަދަލުތަކުގެ ސަބަބުން މަސްވެރިކަމަށް ނޭދެވޭ އަސަރުކޮށް، މަސް ފެންނަ ސަރަހައްދުތަކަށް ބަދަލު އައުމަކީ އެކަށީގެންވާ ކަމެކެވެ.
ރާއްޖޭގެ އިގްތިސާދުގެ މައިނާރު ކަމަށްވާ ފަތުރުވެރިކަމުގެ ދާއިރާއަށް ވެސް މިކަމުގެ ސަބަބުން އަސަރުތަކެއް ކުރާނެ ކަމަށް ބެލެވެ އެވެ. ޚާއްސަކޮށް ރިސޯޓުތަކަށް ބޭނުންވާ ފެނާއި ކާބޯތަކެތި ސަޕްލައި ކުރުމުގައާއި، ދަތުރުފަތުރުގެ ނިޒާމަށް ބުރޫއެރުމުގެ ފުރުސަތު އޮތްކަން އެންޑީއެމްއޭ އިން ވަނީ ހާމަކޮށްފައެވެ. އަދި ހޫނުގަދަވުމުގެ ސަބަބުން ސިއްހީ އެކި މައްސަލަތައް ކުރިމަތިވުމުގެ ނުރައްކާ ބޮޑުވުމާއެކު، ބަނދަރުތަކާއި އެއާޕޯޓުތައް ފަދަ މުހިންމު އިންފްރާސްޓްރަކްޗާތަކުގެ ޚިދުމަތް މެދުނުކެނޑި ކުރިއަށް ގެންދިއުމަށް ދުރާލައި ތައްޔާރުވުމަކީ މުހިންމު ކަމެއްގެ ގޮތުގައި އެ އޮތޯރިޓީން ފާހަގަކުރެ އެވެ.
އެންޑީއެމްއޭ އިން ބުނެފައިވަނީ އެލްނީނޯއަށް ތައްޔާރުވުމަކީ ހަމައެކަނި މޫސުމަށް ބަލައިގެން ކުރަންޖެހޭ ކަމެއް ނޫން ކަމަށާއި، މިއީ މުޅި ދައުލަތުގެ ހުރިހާ ދާއިރާއަކުން ގުޅިގެން މަސައްކަތް ކުރަންޖެހޭ ކަމެއް ކަމަށެވެ. އެގޮތުން މުހިންމު ޚިދުމަތްތައް މެދުނުކެނޑި ފޯރުކޮށްދިނުމަށްޓަކައި މިހާރުން ފެށިގެން ރޭވުންތައް ބައްޓަންކުރުމަށް އެ އޮތޯރިޓީން ވަނީ ކަމާބެހޭ އިދާރާތަކަށް އިރުޝާދު ދީފަ އެވެ.
