އެއަރ ކޮލިޓީ މޮނިޓަރިންގ ސްޓޭޝަންތައް ބެހެއްޓުމުގެ މަސައްކަތްދަނީ ކުރަމުން، 4 ސްޓޭޝަނެއް މި އަހަރު ނިމުމުގެ ކުރިން ބަހައްޓާ ނިމޭނެ: މިނިސްޓަރު
24 ސެޕްޓެމްބަރު 2026 | ބުރާސްފަތި 07:03އިރުވައި މޫސުމާ ދިމާކޮށް ރާއްޖޭގެ ވައިގެ ފެންވަރު ދެނެގަތުމަށްޓަކައި، މި އަހަރު ނިމުމުގެ ކުރިން އިތުރު ހަތަރު މޮނިޓަރިންގ ސްޓޭޝަން ބެހެއްޓުމަށް ސަރުކާރުން ވަނީ ނިންމާފައި. މި ސްޓޭޝަންތަކުން ލިބޭ މައުލޫމާތު އާންމުންނަށް ފެންނާނެހެން ޑިސްޕްލޭ ކުރެވޭނެ ކަމަށާއި، މީގެ ސަބަބުން ވައި ނުސާފުވާ ވަގުތުތަކުގައި ރައްކާތެރިކަމުގެ ފިޔަވަޅު އެޅުމަށް ފަސޭހަވާނެ ކަމަށް އެންވަޔަރަންމަންޓް މިނިސްޓްރީން ބުނޭ
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަލީ ޝަރީފް ވާހަކަ ދައްކަވަނީ | ރާއްޖެއެމްވީ
ރާއްޖޭގެ އެކި ސަރަހައްދުތަކުގައި ވައިގެ ކޮލިޓީ ދެނެގަތުމަށް އެއަރ ކޮލިޓީ މޮނިޓަރިންގ ސްޓޭޝަންތައް ބެހެއްޓުމުގެ މަސައްކަތް ކުރަމުންދާ ކަމަށާއި، 4 ސްޓޭޝަނެއް މި އަހަރު ނިމުމުގެ ކުރިން ބަހައްޓާ ނިމޭނެ ކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަލީ ޝަރީފް ވިދާޅުވެއްޖެ އެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޝަރީފް ވިދާޅުވީ، ސެޕްޓެންބަރު ނިމި އޮކްޓޫބަރު އަދި ނޮވެންބަރު ފެށި އިރުވައި މޫސުމަށް އެޅުމުން ހޭޒް ނުވަތަ ދުންފިނީގެ މައްސަލަ އަނެއްކާ ވެސް އިތުރުވާން ފަށާނެ ކަމަށެވެ. އަދި މިދިޔަ އަހަރު ވެސް މި މައްސަލަ ވަރަށް ބޮޑުވެ، ވިސިބިލިޓީ ދަށްވުމާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބައެއް އެޑްވައިޒަރީތައް ނެރެފައިވާކަން ފާހަގަކުރެއްވި އެވެ.
މިނިސްޓަރު ޝަރީފް ވިދާޅުވީ، މި މައްސަލައިގައި ކުރެވޭނެ އެންމެ މުހިންމު ކަމަކީ ވައިގެ ކޮލިޓީ ހުރި މިންވަރު ބަލައި، އެއީ ކިހާ ވަރެއްގެ ރައްކާތެރި މިންގަނޑެއްގައި ހުރި އެއްޗެއްތޯ ބެލުމަށްފަހު އެ މައުލޫމާތު މެދުކެނޑުމެއްނެތި އާންމުންނަށް ފޯރުކޮށްދިނުން ކަމަށެވެ. އަދި އެ މައުލޫމާތުގެ އަލީގައި ދޭންޖެހޭ އެޑްވައިޒަރީތައް އެންމެ ފުރިހަމަ ގޮތުގައި ނެރެވޭނެ ކަމަށް ވެސް ވިދާޅުވި އެވެ.
މި މަސައްކަތުގެ ދަށުން، މި އަހަރު ނިމުމުގެ ކުރިން މޮނިޓަރ ކުރާ ހަތަރު ސްޓޭޝަނެއް ބަހައްޓައި ނިންމުމަށް މަސައްކަތް ކުރަމުންދާ ކަމަށް މިނިސްޓަރު ޝަރީފް ވިދާޅުވި އެވެ.
އެގޮތުން ގަލޮޅުގައި މިހާރު ސްޓޭޝަނެއްގެ މަސައްކަތް ފަށާފައިވާ ކަމަށާއި، މިފަހަރު ބަހައްޓާ ސްޓޭޝަންތަކުގައި، ކުރިއާ ޚިލާފަށް އާންމުންނަށް ފެންނާނެހެން އެއަރ ކޮލިޓީ ދައްކައިދޭ ޑިސްޕްލޭއެއް ހުންނާނެ ކަމަށް މިނިސްޓަރު ޝަރީފް ފާހަގަކުރެއްވި އެވެ.
ދެން މީގައި އަޅުގަނޑުމެންނަށް ކުރެވޭނެ ކަމަކީ ބޮޑަށް މި އެއާގެ ވައިގެ ކޮލިޓީ ހުރި މިންވަރު ބަލާފައި އާންމުންނަށް އޭތި އެއީ ނަގާ މި ކިހާ ސޭފްޓީ މިންގަނޑެއްގައި މިއަދުގެ ވައިގެ ކޮލިޓީ ހުރިތޯ؟ ނެތްތޯ؟ އެ މައުލޫމާތު ކޮންޓިނިއުއަސްލީ ފޯރުކޮށްދެވުނީމާ އަޅުގަނޑުމެންނަށް އޭތީގައި ދޭންޖެހޭ ބައެއް އެޑްވައިޒަރީތައް ވެސް އޭގެ އެންމެ ފުރިހަމަ ގޮތުގައި އަޅުގަނޑުމެންނަށް ނެރެވޭނީ. އެހެންވެގެން އަޅުގަނޑުމެން މިހާރު މި އެކި ސަރަހައްދުތަކުގައި ރާއްޖޭގައި މި ދަނީ އެއާކުއަލިޓީ މޮނިޓަރިންގ ސްޓޭޝަންސްތަކެއް ބަހައްޓަމުން. އެ ގޮތުން މޮނިޓަރކުރާ ހަތަރު ސްޓޭޝަނެއް މި އަހަރު ނިމުމުގެ ކުރިން ބަހައްޓާ ނިމޭތޯ މި ބަލަނީ. މި ގޮތުން ގަލޮޅުގައި މިހާރު އެއް ސްޓޭޝަން ވަނީ އަޅުގަނޑުމެން ފައްޓާފައިއަލީ ޝަރީފް
މީގެއިތުރުން، މިހާރުވެސް ރާއްޖޭގެ 6 ސަރަހައްދެއްގައި މިފަދަ ސެންޓަރުތައް ގާއިމުކުރެވިފައިވާ ކަމަށް މިނިސްޓަރު ޝަރީފް ވިދާޅުވި އެވެ. އޭގެ ތެރޭގައި ކ. ވިލިނގިލި، ށ. ފުނަދޫ، ލ. ގަން، ދ. ކުޑަހުވަދޫގެ އިތުރުން ފުވައްމުލަކު ސިޓީ، އައްޑޫ ސިޓީ އަދި ކުޅުދުއްފުށި ސިޓީ ހިމެނެ އެވެ.
