ސެޕްޓެންބަރު މަހުން ނޮވެމްބަރު މަހުގެ ނިޔަލަށް ރާއްޖޭގެ ހުރިހާ ސަރަހައްދެއްގެ ފިނިހޫނުމިން ހުންނާނީ މަތީގައި، ކަރަންޓު އުފައްދާ ނިޒާމުތަކަށް ބާރުބޮޑުވާނެ!
28 އޯގަސްޓު 2026 | ހުކުރު 14:14ޕެސިފިކް ކަނޑުގެ ހޫނުމިން މަތިވުމުގެ ސަބަބުން އުފެދޭ "އެލްނީނޯ" އިތުރަށް ވަރުގަދަވަމުންދާތީ، ރާއްޖޭގެ މަސްވެރިކަމާއި ފަތުރުވެރިކަމުގެ އިތުރުން ދަނޑުވެރިކަމަށް ބޮޑެތި ގޮންޖެހުންތަކެއް ކުރިމަތިވެދާނެ ކަމަށް މޫސުމާ ބެހޭ ގައުމީ އިދާރާއިން ވަނީ އިންޒާރު ދީފައި. މި ބަދަލުތަކާއެކު ކުރިއަށް އޮތް މަސްތަކުގައި ވާރޭވެހޭ މިންވަރަށް ބަދަލު އައިސް، ކަރަންޓު ބޭނުންކުރާ މިންވަރު އިތުރުވުމުގެ ސަބަބުން އިގްތިސާދަށް ނޭދެވޭ އަސަރުތަކެއް ކޮށްފާނެ ކަމަށް އެ އިދާރާއިން ލަފާކުރޭ
ސިނަމާލެ ބްރިޖު ކައިރިން ނަގާފައިވާ ފޮޓޯއެއް: ސެޕްޓެންބަރު މހުން ނޮވެމްބަރު މަހުގެ ނިޔަލަށް ވާރޭ ވެހުން މަދުވެ ހޫނު ގަދަވާނެކަމަށް މެޓް އޮފީހުން ލަފާކުރޭ | ހުސެއިން ފިޔާޒް މޫސާ
ކުރިއަށް އޮތް ސެޕްޓެންބަރު މަހުން ފެށިގެން ނޮވެމްބަރު މަހުގެ ނިޔަލަށް ރާއްޖޭގެ ހުރިހާ ސަރަހައްދެއްގެ ފިނިހޫނުމިން ވެސް ހުންނާނީ އާންމު މިންވަރަށްވުރެ މަތީގައި ކަމަށް މޫސުމާ ބެހޭ ގައުމީ އިދާރާ އިން ބުނެފި އެވެ.
ޕެސިފިކް ކަނޑުގައި އުފެދިފައިވާ "އެލްނީނޯ" އިތުރަށް ވަރުގަދަވަމުން ދާކަން ހާމަކޮށް އެ އިދާރާ އިން ނެރުނު އެލްނީނޯއާ ބެހޭ ބުލެޓިންގައިވާ ގޮތުން، އެންމެ ފަހުގެ ހިސާބުތަކުން ދައްކާ ގޮތުގައި އިރުމަތީ އިކުއެޓޯރިއަލް ޕެސިފިކް ސަރަހައްދުގެ ކަނޑުގެ މަތީ ފަށަލައިގެ ހޫނުމިން ވަނީ އާންމު މިންވަރަށްވުރެ 2.0 ޑިގްރީ ސެލްސިއަސްއަށް މައްޗަށް ގޮސްފަ އެވެ. އަދި ނީނޯ 3.4 އިންޑެކްސްއަށް ބަލާއިރު، އޮގަސްޓް މަހުގެ މެދުތެރޭގައި މި މިންގަނޑު ވަނީ 1.8 ޑިގްރީ ސެލްސިއަސް އަށް އުފުލިފަ އެވެ.
ކްލައިމެޓް ޕްރެޑިކްޝަން ސެންޓަރު (ސީޕީސީ) އާ ހަވާލާދީ މެޓް އޮފީހުން ލަފާކުރާ ގޮތުގައި، 2026 ވަނަ އަހަރުގެ ނިޔަލަށް އެލްނީނޯގެ ބާރު ދާނީ ގަދަވަމުންނެވެ. މިކަމުގެ ސަބަބުން ދުނިޔޭގެ މޫސުމަށް ބޮޑެތި ބަދަލުތަކެއް އަންނާނެ ކަމަށް ބެލެވޭއިރު، އޭގެ ތެރޭގައި ވާރޭވެހޭ މިންވަރާއި ފިނިހޫނުމިނާއި ތޫފާންތައް އުފެދޭ މިންވަރަށް ބަދަލު އައުން ހިމެނޭ ކަމަށް އެ އިދާރާ އިން ބުނެ އެވެ.
ވާރޭވެހޭނެ ކަމަށް ލަފާކުރާ މިންވަރަށް ބަލާއިރު، ސެޕްޓެންބަރު މަހު ރާއްޖޭގެ އުތުރުގެ އަތޮޅުތަކަށް އާންމުކޮށް ވާރޭވެހޭ މިންވަރަށްވުރެ މަދުވާނެ ކަމަށް ބެލެވުނު ނަމަވެސް، މެދުރާއްޖެތެރެ އާއި ދެކުނުގެ އަތޮޅުތަކަށް އާންމު މިންވަރަށްވުރެ އިތުރަށް ވާރޭވެހޭނެ ކަމަށް ލަފާކުރެވެ އެވެ. ނަމަވެސް އޮކްޓޯބަރު އަދި ނޮވެމްބަރު މަހު އުތުރާއި މެދުރާއްޖެތެރޭގެ ބައެއް އަތޮޅުތަކަށް އާންމުކޮށް ވެހޭ މިންވަރަށްވުރެ ގިނައިން ވާރޭވެހޭނެ ކަމަށާއި، އެންމެ ދެކުނުގެ އަތޮޅުތަކަށް ވާރޭވެހޭނެ ކަމަށް ބެލެވެނީ އާންމު މިންވަރަށްވުރެ މަދުން ކަމަށް މެޓް އޮފީހުގެ ބުލެޓިންގައި ބަޔާންކޮށްފައިވެ އެވެ.
އެލްނީނޯގެ ސަބަބުން ރާއްޖޭގެ ތިމާވެއްޓަށާއި އިގްތިސާދީ މުހިންމު ދާއިރާތަކަށް ބޮޑެތި ނުރައްކާތަކެއް ކުރިމަތިވެދާނެ ކަމަށް މެޓް އޮފީހުން އިންޒާރުދެ އެވެ. އެގޮތުން ކަނޑުގެ ލޮނުގަނޑު އާދަޔާ ޚިލާފަށް ހޫނުވުމުގެ ސަބަބުން ފަރުތަކުގެ ދިރުމަށް ނުރައްކާވެ، މުރަކަ ހުދުވުމުގެ މައްސަލަ ކުރިމަތިވެދާނެ އެވެ. މީގެ ސަބަބުން ފަރުތަކަށް ބަރޯސާވާ ފަތުރުވެރިކަމުގެ ދާއިރާއަށް ނޭދެވޭ އަސަރުކޮށް، އާމްދަނީ ލިބޭ ވަސީލަތްތަކަށް ހުރަސް އެޅިދާނެ ކަމަށް ބެލެވޭ ކަމަށް އެ އިދާރާ އިން ވަނީ ބުނެފަ އެވެ.
މީގެ އިތުރުން މަސްވެރިކަމުގެ ސިނާއަތަށް ވެސް ބޮޑެތި ގޮންޖެހުންތަކެއް ކުރިމަތިވާނެ ކަމަށް ލަފާކޮށްފައިވެ އެވެ. އެގޮތުން ކަނޑުގެ ހޫނުމިނަށް އަންނަ ބަދަލުތަކާއެކު ކަޅުބިލަމަހާއި ރީނދޫއުރަހަ ކަންނެލި އުޅޭ ސަރަހައްދުތައް ބަދަލުވެ، މަސްވެރިކަން ދަށްވުމަކީ އެލްނީނޯ އަހަރުތަކުގައި ތާރީޚީގޮތުން ފާހަގަކުރެވިފައިވާ ކަމެއް ކަމަށް މެޓް އޮފީހުން ބުނެ އެވެ. އަދި ކަނޑުގެ ފުން ހިސާބުތަކުން މައްޗަށް އަރާ ފިނިފެނާއި ކާނާ މަދުވުމުގެ ސަބަބުން މަސްމަހާމެހީގެ އާބާދީ ދަށްވުމުގެ ފުރުސަތު އޮތްކަން ވެސް މެޓް އޮފީހުން ފާހަގަކުރެ އެވެ.
އެލްނީނޯއާ ގުޅިގެން ހޫނުމިން މަތިވުމުގެ ސަބަބުން ތަންތަން ފިނިކުރުމަށް ބޭނުންވާ ހަކަތައިގެ މިންވަރު އިތުރުވެ، ކަރަންޓު އުފައްދާ ނިޒާމުތަކަށް ބާރުބޮޑުވާނެ ކަމަށް ވެސް ބުލެޓިންގައިވެ އެވެ. ހަމައެއާއެކު، ވާރޭވެހޭ މިންވަރަށް އަންނަ ބަދަލުތަކުގެ ސަބަބުން ދަނޑުވެރިކަމަށް ބުރޫއަރައި، ގަސްގަހާގެހިން ކާނާ ލިބޭ މިންވަރު މަދުވެދާނެ ކަމަށް މެޓް އޮފީހުން ލަފާ ކޮށްފައިވެ އެވެ. މިކަންކަމުން ހާމަވަނީ މޫސުމީ ބަދަލުތަކުގެ ކުރިމަތީގައި ރާއްޖެ އޮތް ނާޒުކު މިންވަރު ކަމަށާއި، މިފަދަ ބަދަލުތަކަށް ދުރާލާ ތައްޔާރުވުމަކީ މުހިންމު ކަމެއް ކަމަށް މެޓް އޮފީހުން ބުނެ އެވެ.
