ވަރލްޑް ކަޕަށް ފަހު ރޮނާލްޑޯ ރިޓަޔާ ކުރާނެ ކަމަށް، އޭނާގެ ދައްތަ ބުނެފި

މިހާރު ކުރިއަށްދާ ފީފާ ވަރލްޑް ކަޕަށް ފަހު، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ޤައުމީ ޓީމުން ރިޓަޔާ ކުރާނެ ކަމަށް އޭނާގެ ދައްތަ ކަޓިއާ އަވެއިރޯ ބުނެފި އެވެ.

ރޮނާލްޑޯގެ ދައްތަ މިހެން ބުނެފައި ވަނީ ފީފާ ވަރލްޑް ކަޕްގައި ޕޯޗުގަލް އިން ކްރޮއޭޝިއާ އާއި ދެކޮޅަށް ކުޅުނު މެޗުގެ ކުރިންނެވެ. ސްޕޯޓް ޓީވީއާ ވާހަކަ ދައްކަމުން ކަޓިއާ ބުނެފައި ވަނީ، ރޮނާލްޑޯ ޤައުމީ ޓީމަށް ކުޅޭ އެންމެ ފަހުގެ ފެނިލުންތައް ބަލައިގެން، އެންމެން ވެސް ހިތްހަމަ ޖައްސާލުމަށް އެދޭ ކަމަށެވެ. 

ކަޓިއާ ބުނީ އޭނާ އަށް ލިބިފައިވާ އެންމެ ފަހުގެ މައުލޫމާތަށް ބަލާއިރު، މިއީ ރޮނާލްޑޯ ޤައުމީ ޓީމަށް ކުޅޭ އެންމެ ފަހު މުބާރާތެވެ. އެގޮތުން ކަޓިއާ ބުނެފައި ވަނީ، މިއީ ރޮނާލްޑޯގެ "ދި ލާސްޓް ޑާންސް" ކަމަށެވެ. އަދި އެއީ ވަރަށް އިތުބާރު ހުރި މައުލޫމާތު ތަކެއް ކަމަށް ވެސް ކަޓިއާ ވަނީ ބުނެފައި އެވެ.

އުމުރުން މިހާރު 41 އަހަރު ވެފައިވާ ރޮނާލްޑޯ އަކީ ދުނިޔޭގައި އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާ އެވެ. މިފަހަރުގެ ވަރލްޑް ކަޕަކީ، ރޮނާލްޑޯގެ ކެރިއަރުގައި އޭނާ ކުޅޭ ހަ ވަނަ ވަރލްޑް ކަޕް އެވެ. ރޮނާލްޑޯ އަކީ ހަ ވަރލްޑް ކަޕެއްގައި ލަނޑު ޖެހި ފުރަތަމަ ކުޅުންތެރިޔާގެ އިތުރުން، ޕޯޗުގަލްގެ ޤައުމީ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ.

ޕޯޗުގަލްއާ އެކު މިހާތަނަށް ތިން ތައްޓެއް ކާމިޔާބު ކޮށްފައިވާ ރޮނާލްޑޯ، މީގެ ކުރިން ބުނެފައި ވަނީ އޭނާގެ ކެރިއަރުގެ ފަހު ދުވަސްތައް ގުނަމުންދާ ކަމުގެ އިޙުސާސް ކުރެވޭ ކަމަށެވެ. ނަމަވެސް، ރިޓަޔަރ ކުރާނެ ސީދާ ތާރީޚެއް ނުވަތަ އަހަރެއް ރޮނާލްޑޯ ބުނެފައި ނުވެ އެވެ. ކްރޮއޭޝިއާ އާއި ދެކޮޅަށް ކުޅެ ޕޯޗުގަލް މޮޅުވި މެޗަށް ފަހު ވެސް ރޮނާލްޑޯ ބުނެފައި ވަނީ، މުބާރާތަށް ފަހު އޭނާ މުސްތަޤުބަލާ މެދު ގޮތެއް ނިންމާނެ ކަަމަށެވެ. އަދި އަވަސް އަރުވާލައިގެން އެއްވެސް ނިންމުމެއް ނުނިންމާނެ ކަމަށް ވެސް ރޮނާލްޑޯ ވަނީ ބުނެފައި އެވެ. 

ދުނިޔޭގެ އެންމެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ފަސް ފަހަރު ކާމިޔާބު ކޮށްފައިވާ ރޮނާލްޑޯ އަކީ، ޕޯޗުގަލް ޤައުމީ ޓީމުގައި ހިމެނޭ އެންމެ މުހިންމު އެއް ކުޅުންތެރިޔާ އެވެ. ޕޯޗުގަލް އާއެކު ރޮނާލްޑޯ ވަނީ މިހާތަނަށް ޔޫރޯ ފުޓުބޯޅަ މުބާރާތުގެ އިތުރުން، ޔުއެފާ ނޭޝަންސް ލީގުގެ ދެ މުބާރާތެއް ކާމިޔާބު ކޮށްފައި އެވެ.