ދެވަނަ ކުއާޓަރުގައި އެންމެ ބޮޑަށް ދަށްވީ މަސްވެރިކަމުގެ ދާއިރާގެ އުފެއްދުންތެރިކަން، 2025 އާ އަޅާބަލާއިރު 50.8 އިންސައްތަ ދަށް!

ދިވެހިރާއްޖޭގެ އިގުތިސާދުގެ މައިބަދަ ކަމުގައިވާ މަސްވެރިކަމުގެ ސިނާއަތަކީ ޒަމާނުއްސުރެ ދިވެހި އެތައް އާއިލާއެއްގެ ދިރިއުޅުމުގެ ވައްޓަފާޅި އާއި މާލީ ތަނަވަސްކަން ގުޅިފައިވާ އެންމެ މުހިންމު އެއް ދާއިރާ އެވެ. ނަމަވެސް، މި ސަރުކާރުގެ ނާގާބިލު ސިޔާސަތުތަކާއި އިގުތިސާދީ ގޮތުން އަޅަމުންދާ ގޯސް ފިޔަވަޅުތަކުގެ ސަބަބުން، ދިވެހި މަސްވެރިކަމުގެ ސިނާއަތް މިއަދު ވަނީ މުޅިން ފުނޑިގޮސް، ނުރައްކާތެރި ފުން ވަޅުގަނޑަކަށް ވެއްޓިފަ އެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަދި ކަމާބެހޭ އިދާރާތަކުން ނެރެފައިވާ ތަފާސްހިސާބުތަކުން މިކަން ވަރަށް ސާފުކޮށް ފެންނަން އޮތް އިރު، މިއީ ސަރުކާރުން މި ސިނާއަތަށް އަޅައިނުލާ ދޫކޮށްލާފައިވާ މިންވަރު ހާމަކޮށްދޭ ހެއްކެކެވެ. 2026 ވަނަ އަހަރުގެ ދެވަނަ ކުއާޓަރުގައި ރާއްޖޭގެ އިގުތިސާދުގެ ބައެއް ދާއިރާތަކުން ދަށްވުމެއް ފާހަގަކުރެވިފައިވާއިރު، އެންމެ ބޮޑު އަދި އެންމެ ބިރުވެރި ދަށްވުމެއް އައިސްފައި ވަނީ މަސްވެރިކަމުގެ ދާއިރާއިންނެވެ. އެގޮތުން މަސްވެރިކަމުގެ ދާއިރާގެ އުފެއްދުންތެރިކަން ވޭތުވެދިޔަ އަހަރުގެ ދެވަނަ ކުއާޓަރާ އަޅާބަލާއިރު 50.8 އިންސައްތަ ވަނީ ދަށްވެފަ އެވެ. 

މަސްވެރިންނަށް ގަވާއިދުން ފައިސާ ނުދިނުމާއި، މަސްކިރާ މިންވަރު މަދުވުމުގެ ސަބަބުން ކަނޑުމަހާއި ރީނދޫ އުރަހަ ކަންނެލީގެ ވިޔަފާރި ވަނީ މުޅިން ހުއްޓުމަކަށް އައިސްފަ އެވެ. ތަފާސްހިސާބުތަކަށް ބަލާއިރު، 2025 ވަނަ އަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް 53,426.3 މެޓްރިކް ޓަނުގެ މަސް ގަނެފައިވާއިރު، 2026 ވަނަ އަހަރުގެ އެ މުއްދަތުގައި މި އަދަދު ވަނީ ބޮޑުތަނުން ދަށްވެ 21,438.5 މެޓްރިކް ޓަނަށް ވެއްޓިފަ އެވެ. މިއީ ގާތްގަނޑަކަށް 59.9 އިންސައްތައިގެ ބޮޑު ދަށްވުމެކެވެ.

ވަކިން ހާއްސަކޮށް، ކަނޑުމަސް ނުވަތަ ސްކިޕްޖެކް ޓޫނާ ގަތް މިންވަރު 65.2 އިންސައްތަ ދަށަށް ގޮސްފައިވާއިރު، 2025 ވަނަ އަހަރުގެ ފުރަތަމަ ހަ މަސްދުވަހު 46,610.6 މެޓްރިކް ޓަނުގެ ކަނޑުމަސް ގަނެފައިވާއިރު 2026 ވަނަ އަހަރުގެ އެ މުއްދަތުގައި ގަނެފައިވަނީ އެންމެ 16,230.4 މެޓްރިކް ޓަނުގެ މަހެވެ. މަސް އެކްސްޕޯޓްކުރާ މިންވަރާއި ލިބޭ އާމްދަނީއަށް އައިސްފައިވާ ވެއްޓުމަކީ މުޅި ގައުމުގެ އިގުތިސާދަށް ލިބުނު ފޫނުބެއްދޭވަރުގެ ބޮޑު ގެއްލުމެކެވެ.

އެގޮތުން 2026 ވަނަ އަހަރުގެ ފުރަތަމަ 6 މަސްދުވަހު ރާއްޖެއިން ބޭރުކޮށްފައިވަނީ ޖުމްލަ 16,991.1 މެޓްރިކް ޓަނުގެ މަސް ކަމަށްވާއިރު، މިއީ 2025 ވަނަ އަހަރުގެ އެ މުއްދަތުގައި ބޭރުކުރި 44,791.3 މެޓްރިކް ޓަނާ އަޅާބަލާއިރު 62.1 އިންސައްތައިގެ ދަށްވުމެކެވެ. 2025 ވަނަ އަހަރުގެ ފުރަތަމަ 6 މަސްދުވަހު މަސް އެކްސްޕޯޓް ކޮށްގެން 74.5 މިލިއަން އެމެރިކާ ޑޮލަރު ލިބިފައިވާއިރު، 2026 ވަނަ އަހަރު މި އަދަދު ވަނީ 37.5 މިލިއަން ޑޮލަރަށް ދަށްވެފަ އެވެ. މިއީ ސަރުކާރުގެ ސިޔާސަތުތައް ބައްޓަންކުރެވިފައިވާ ގޮތުގެ ސަބަބުން ބޭރު ފައިސާ ލިބޭ މިންވަރު މަދުވެ، ގައުމުގެ ބޭރު ފައިސާގެ ރިޒާވަށް ކޮށްފައިވާ ނޭދެވޭ އަސަރު ވަރަށް ރަނގަޅަށް ހާމަކޮށްދޭ ކަމެކެވެ. ސަރުކާރުގެ އިހުމާލުގެ ސަބަބުން، 2026 ވަނަ އަހަރުގެ ފެބްރުއަރީ އަދި މާޗު މަހަކީ ދިވެހި މަސްވެރިކަމުގެ ތާރީހުގައި ވެސް މަސް ގަތް މިންވަރާއި އެކްސްޕޯޓް ކުރި މިންވަރު އެންމެ ބޮޑަށް ދަށްވި ދެ މަހެވެ.

ސަރުކާރުގެ ސިޔާސަތުތަކުގެ ސަބަބުން ރާއްޖޭގެ މި މުޅި ސިނާއަތް ނުރައްކަލަކާ ކުރިމަތިލާން ޖެހިފައިވާއިރު ސަރުކާރުގެ ނާގާބިލުކަމުގެ ސަބަބުން މި މުހިއްމު ސިނާއަތް ފުނޑިގެންދާ މަންޒަރު ބަލަން މަސްވެރިން ނުތެބޭނެ ކަމަށް މަސްވެރިން ދަނީ ބުނަމުންނެވެ.