މުއްދަތު އިތުރުކޮށް ނުދިނުމުން ސްޓޭޓް ބޭންކް އޮފް އިންޑިއާ އަށް ދައްކަންޖެހޭ 50 މިލިއަން ޑޮލަރުގެ އެންމެ ފަހު ޓްރެޜަރީ ބިލް ދައްކައިފި
17 ސެޕްޓެމްބަރު 2026 | ބުރާސްފަތި 11:15އިންޑިއާ ސަރުކާރުގެ އެހީގައި އެސްބީއައި މެދުވެރިކޮށް ނަގާފައިވާ 150 މިލިއަން ޑޮލަރުގެ ފެސިލިޓީ، ތާވަލާ އެއްގޮތަށް ދިވެހި ސަރުކާރުން އެއްކޮށް އަނބުރާ ދައްކައި ނިންމައިފި. މި ފައިސާ ދެއްކުމުން ރިޒާވަށް ބާރުބޮޑުވި ނަމަވެސް، ޒަރޫރީ މުދާ އިމްޕޯޓްކުރުމަށް ބޭނުންވާ ބޭރު ފައިސާގެ އިންތިޒާމުތައް ހަމަޖެހިފައިވާ ކަމުގެ ޔަގީންކަން ފައިނޭންސް މިނިސްޓްރީން ދޭ
އިންޑިއާގެ ވެރިރަށް ނިއު ދިއްލީގައި ހުންނަ ރާޝްތުރަޕަތީ ބަވަންގައި 2024 އޮކްޓޫބަރު 7 ވީ ހޯމަ ދުވަހު ބޭއްވި ރަސްމީ މަރުހަބާ ދެންނެވުމުގެ ރަސްމިއްޔާތުގެ ތެރެއިން، އިންޑިއާގެ ރައީސް ދުރޫޕަދީ މުރުމޫ އާއި ބޮޑުވަޒީރު ނަރެންދުރަ މޯދީ، ރައީސް ޑރ. މުޙައްމަދު މުޢިއްޒުއާއެކު. | ގެޓީ އިމޭޖަސް
ސްޓޭޓް ބޭންކް އޮފް އިންޑިއާ (އެސްބީއައި) އަށް ދައްކަންޖެހޭ 50 މިލިއަން ޑޮލަރުގެ އެންމެ ފަހު ޓްރެޜަރީ ބިލް ދައްކައި، އިންޑިއާ ސަރުކާރުގެ އެހީތެރިކަމާއެކު ބަޖެޓް ސަޕޯޓުގެ ގޮތުގައި ހަމަޖެއްސި 150 މިލިއަން ޑޮލަރުގެ ފެސިލިޓީ ދިވެހި ސަރުކާރުން އެއްކޮށް އަނބުރާ ދައްކާ ނިންމައިފި އެވެ.
މި ފެސިލިޓީއަކީ ކޮންމެ ބިލެއްގައި 50 މިލިއަން ޑޮލަރު ހިމެނޭހެން ތިން ޓްރެޜަރީ ބިލެއްގެ މައްޗަށް އެކުލެވިގެންވާ ފެސިލިޓީއެކެވެ. 2019 ވަނަ އަހަރު ހަމަޖެއްސި މި އެހީގެ ދަށުން، އިންޑިއާ ސަރުކާރުގެ އެހީތެރިކަމާއެކު އެސްބީއައި އިން ވަނީ ދިވެހި ސަރުކާރުގެ ސެކިއުރިޓީތަކަށް އިންވެސްޓްކޮށްފަ އެވެ. އަދި ކޮންމެ އަހަރަކުވެސް މި ބިލްތައް ދެއްކުމުގެ މުއްދަތު އިތުރުކުރަމުން ގޮސްފައިވެ އެވެ.
ސަރުކާރުން މި ފެސިލިޓީގެ ފުރަތަމަ 50 މިލިއަން ޑޮލަރުގެ ބިލް އަނބުރާ ދައްކާފައިވަނީ 2024 ވަނަ އަހަރުގެ ޖެނުއަރީ މަހުގަ އެވެ. ދެވަނަ ބިލްގެ ފައިސާ މިއަހަރުގެ މެއި މަހުގެ 11 ވަނަ ދުވަހު ދައްކާފައިވާއިރު، އެންމެ ފަހު ބިލްގެ ފައިސާ މި ސެޕްޓެމްބަރު މަހުގެ 17 ވަނަ ދުވަހު ދައްކައި، ޖުމްލަ 150 މިލިއަން ޑޮލަރުގެ މި ފެސިލިޓީ މިހާރު ވަނީ އެއްކޮށް ދައްކާފަ އެވެ.
މިކަމާ ގުޅިގެން މިނިސްޓްރީ އޮފް ފައިނޭންސް އިން ބުނީ، އެންމެ ފަހުން ދެއްކި ފައިސާއަކީ ދައުލަތުގެ ދަރަނިތައް ތާވަލާ އެއްގޮތަށް އަދާކުރުމަށް ސަރުކާރުން ގެންގުޅޭ ސިޔާސަތުގެ ދަށުން ދެއްކި ފައިސާއެއް ކަމަށެވެ. އަދި ރާއްޖޭގެ ބޭރު ފައިސާގެ ރިޒާވް ވަރުގަދަކުރުމަށްޓަކައި ބައިނަލްއަޤުވާމީ މާލީ އިދާރާތަކާއި ދޭދޭ ޤައުމުތަކާއެކު މަޝްވަރާތައް ކުރިއަށްދާ ކަމަށްވެސް އެ މިނިސްޓްރީން ބުންޏެވެ.
މި ފައިސާ އަނބުރާ ދައްކާފައި މިވަނީ ރާއްޖޭގެ ބޭނުންކުރެވޭ ރިޒާވަށް ބާރުބޮޑުވެފައިވާ ދަނޑިވަޅެއްގަ އެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތައް ދައްކާގޮތުން، ޖުލައި މަހުގެ ނިޔަލަށް ރަސްމީ ރިޒާވްގައި 638 މިލިއަން ޑޮލަރު ހުރިއިރު، އޮގަސްޓް މަހުގެ ނިޔަލަށް އެ އަދަދު ވަނީ 643.8 މިލިއަން ޑޮލަރަށް އިތުރުވެފަ އެވެ. ނަމަވެސް، ހަމަ އެ މުއްދަތުގައި ބޭނުންކުރެވޭ ރިޒާވް ވަނީ 221.9 މިލިއަން ޑޮލަރުން 200.6 މިލިއަން ޑޮލަރަށް، ނުވަތަ 9.6 އިންސައްތަ ދަށަށް ގޮސްފަ އެވެ.
އޮގަސްޓް މަހުގެ ތަފާސްހިސާބުތަކަކީ އެންމެ ފަހުން ދެއްކި 50 މިލިއަން ޑޮލަރުގެ ފައިސާ ދެއްކުމުގެ ކުރީގެ ހިސާބުތަކަށް ވާތީ، އެ ފައިސާ ދެއްކުމުން ރިޒާވަށް އައި ބަދަލު އެ ހިސާބުތަކުން އަދި ފެންނާކަށް ނެތެވެ.
ރިޕޯޓުތައް ބުނާ ގޮތުގައި އެންމެ ފަހުން ދެއްކި 50 މިލިއަން ޑޮލަރު އިންޑިއާގެ އެސްބީއައި އަށް ދައްކަން ޖެހުނީ ދަރަނި ދެއްކުމުގެ މުއްދަތު އިތުރަށް އިންޑިއާއިން އިތުރުކޮށް ނުދިނުމުގެ ސަބަބުން މަޖުބޫރުވެގެންނެވެ. މިކަން ފާހަގަ ކުރައްވާ ކުރީގެ ރައީސް މުޙައްމަދު ނަޝީދު ވިދާޅުވި ގޮތުގައި، މި ބިލް ދެއްކުމުގެ ސަބަބުން ބޭނުންކުރެވޭ ރިޒާވް އިތުރަށް ދަށަށް ގޮސް، ޒަރޫރީ ތަކެތި އިމްޕޯޓް ކުރުމަށް ބޭނުންވާ ފައިސާ ހޯދުމަށް ދަތިތަކެއް ކުރިމަތިވެދާނެ އެވެ.
ނަމަވެސް ފައިނޭންސް މިނިސްޓްރީން ބުނީ ކާބޯތަކެއްޗާއި، ތެލާއި އަދި ބޭސް އިމްޕޯޓް ކުރުމަށް ބޭނުންވާ ބޭރު ފައިސާގެ އިންތިޒާމުތައް ހަމަޖެހިފައިވާ ކަމަށެވެ.
"ރައްޔިތުންނަށް ބޭނުންވާ މިފަދަ ޒަރޫރީ ޚިދުމަތްތަކާއި މުދާ މެދުނުކެނޑި ލިބޭނެ ގޮތް މަގުފަހިކޮށްދިނުމަކީ މި ސަރުކާރުގެ އެންމެ އިސް އެއް އަމާޒު،" ފައިނޭންސް މިނިސްޓްރީން ބުންޏެވެ.
ދަރަނި އަދާކުރުމުގެ ސަބަބުން ޒަރޫރީ މުދާ އިމްޕޯޓް ކުރުމަށް ދަތިތަކެއް ކުރިމަތިވެދާނެ ކަމަށް ދެކެވޭ ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށްވެސް އެ މިނިސްޓްރީން ވަނީ ބުނެފަ އެވެ.
