އާޖެންޓީނާ އިން ސްކަލޯނީ އަށް އައު އެއްބަސްވުމެއް ހުށަހަޅައިފި

އާޖެންޓީނާގެ ޤައުމީ ފުޓުބޯޅަ ޓީމުގެ ކޯޗު ލިއޮނަލް ސްކަލޯނީގެ އެއްބަސްވުން އައުކުރުމަށްޓަކައި، އިތުރު ދެ އަހަރު ދުވަހުގެ އައު އެއްބަސްވުމެއް އެ ޤައުމުގެ ފުޓުބޯޅަ އެސޯސިއޭޝަން (އޭއެފްއޭ) އިން އޭނާ އަށް ހުށަހަޅައިފި އެވެ.

މި ހުށަހެޅުމުގައިވާ ގޮތުން، ފުރަތަމަ ދެ އަހަރަށް ފަހު އިތުރު ދެ އަހަރަށް އެއްބަސްވުން އިތުރުކުރުމުގެ ފުރުސަތު ވެސް ސްކަލޯނީ އަށް ލިބިގެންދާނެ އެވެ.

ބައިނަލްއަޤުވާމީ މީޑިއާތަކުގައި ބުނެފައިވާ ގޮތުން އާޖެންޓީނާ އިން މިހާރު ސްކަލޯނީ އަށް ހުށަހަޅާފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ނިޔަލަށެވެ. އަދި މި އެއްބަސްވުމުގެ ދަށުން، 2030 ވަނަ އަހަރު އޮންނަ ފީފާ ވޯލްޑް ކަޕްގެ ނިޔަލަށް ވެސް ސްކަލޯނީ އާޖެންޓީނާ ޓީމުގައި ހުރުމުގެ ފުރުސަތު ވެސް އޮންނާނެ ކަމަށް ބުނެފައިވެ އެވެ.

އާޖެންޓީނާގެ ފުޓުބޯޅަ އެސޯސިއޭޝަން އާއެކު މިހާރު ސްކަލޯނީ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ މިއަހަރުގެ ޑިސެމްބަރު މަހުގެ ނިޔަލަށެވެ. މީގެ ކުރިން ސްކަލޯނީ ވަނީ، އެއްބަސްވުމުގެ މުއްދަތު ހަމަވުމުން އޭނާ ކޯޗުގެ މަޤާމުން ވަކިވާނެކަމުގެ އިޝާރާތެއް ދީފަ އެވެ. އެހެން ނަމަވެސް، މުސްތަޤުބަލާ މެދު މިހާތަނަށް ސްކަލޯނީ ވަކި ނިންމުމެއް ނިންމާފައި ނުވެ އެވެ. 

އައު އެއްބަސްވުމާ ގުޅޭ ގޮތުން ސްކަލޯނީ ވަކި ޖަވާބެއް ދީފައި ނުވި ނަމަވެސް، އޭނާގެ މަންދޫބުންނާއި އާޖެންޓީނާގެ ފުޓުބޯޅަ އެސޯސިއޭޝަންއާ ދެމެދު މިހާރު މަޝްވަރާތައް ކުރިއަށްދާ ކަމަށް ރިޕޯޓުތައް ބުނެ އެވެ. މި މަޝްވަރާތައް ކުރިއަށްދާ ގޮތުން، ސްކަލޯނީ ޓީމުގައި މަޑުކުރާނެ ކަމުގެ ބޮޑު އުންމީދެއް އާޖެންޓީނާގެ ފުޓުބޯޅަ އެސޯސިއޭޝަން އޮތް ކަމަށް ވެސް ރިޕޯޓުތައް ބުނެ އެވެ. 

ސްކަލޯނީގެ އިރުޝާދުގެ ދަށުން އާޖެންޓީނާ އިން ވަނީ ފަހަކަށް އައިސް ބޮޑެތި ކާމިޔާބީތަކެއް ހޯދާފަ އެވެ. އޭގެ ތެރޭގައި 2022 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރުމާއި، ކޮޕާ އެމެރިކާގެ ތަށި އުފުލާލުން ހިމެނެ އެވެ. އެހެންކަމުން، އޭނާ ޓީމުގައި ބެހެއްޓުމަކީ އާޖެންޓީނާގެ ފުޓުބޯޅަ ކުރިއަށް ގެންދިޔުމަށް އެ ޤައުމުން ވަރަށް ބޮޑަށް ބޭނުންވާ ކަމެކެވެ.