ވޯލްޑް ކަޕް ތެރޭގައި މެސީ މަރާލަން ރޭވިކަމުގެ ތަފްސީލު ހާމަވެއްޖެ
9 އޯގަސްޓު 2026 | އާދީއްތަ 06:27އެ ރިޕޯޓުގައިވާ ގޮތުން، މުބާރާތުގެ ގުރޫޕު ސްޓޭޖުގައި އާޖެންޓީނާ އާއި އުރުދުން ބައްދަލު ކުރި މެޗުގެ ކުރިން، މީހަކު ވަނީ އެމެރިކާގެ ޑަލަސް އެއާޕޯޓަށް ފޯނުން ގުޅައި އިންޒާރު ދީފައި. އެ މީހާ ބުނެފައި ވަނީ، އޭނާ އާއި އިތުރު ދެ މީހަކު ހަތިޔާރާއި އަމިއްލަ އަށް ތައްޔާރުކޮށްފައިވާ ގޮވާ ތަކެތި ހިފައިގެން ސްޓޭޑިއަމް އަށް ވަންނާނެ ކަަމަށް. އަދި އެ މީހުންގެ މައިގަނޑު އަމާޒަކީ މެސީ ކަމަށް ވެސް، އެ ފޯނު ކޯލުގައި އޭނާ ބުނެފައިވާ ކަމަށް ފުލުހުންގެ ރިޕޯޓުގައި ވަނީ ބުނެފައި
އާޖެންޓީނާގެ ކެޕްޓަން ލިއޮނަލް މެސީ | ގެޓީ އިމޭޖަސް
މިއަހަރުގެ ފީފާ ވޯލްޑް ކަޕްގެ ތެރޭގައި އާޖެންޓީނާގެ ކެޕްޓަން ލިއޮނަމް މެސީ މަރާލުމަށް ރޭވިކަމުގެ ތަފްސީލު އެމެރިކާާގެ ފުލުހުންގެ ރިޕޯޓަކުން ހާމަވެއްޖެ އެވެ.
އެމެރިކާގެ ފުލުހުން އާންމު ކުރި ރިޕޯޓުގައިވާ ގޮތުން، މުޅި މުބާރާތުގެ ތެރޭގައި ވެސް އެންމެ ގިނަ މަރުގެ އިންޒާރު ލިބިފައި ވަނީ މެސީ އަށެވެ. މީގެ ތެރޭގައި ޖާނުން ފިދާވެގެން ދިނުމަށް ރާވާފައިވާ ހަމަލާއެއްގެ އިންޒާރު ވެސް ހިމެނޭ ކަމަށް، ފުލުހުންގެ ރިޕޯޓުގައި ބުނެފައިވެ އެވެ.
އެ ރިޕޯޓުގައިވާ ގޮތުން، މުބާރާތުގެ ގުރޫޕު ސްޓޭޖުގައި އާޖެންޓީނާ އާއި އުރުދުން ބައްދަލު ކުރި މެޗުގެ ކުރިން، މީހަކު ވަނީ އެމެރިކާގެ ޑަލަސް އެއާޕޯޓަށް ފޯނުން ގުޅައި އިންޒާރު ދީފައި އެވެ. އެ މީހާ ބުނެފައި ވަނީ، އޭނާ އާއި އިތުރު ދެ މީހަކު ހަތިޔާރާއި އަމިއްލަ އަށް ތައްޔާރުކޮށްފައިވާ ގޮވާ ތަކެތި ހިފައިގެން ސްޓޭޑިއަމް އަށް ވަންނާނެ ކަަމަށެވެ. އަދި އެ މީހުންގެ މައިގަނޑު އަމާޒަކީ މެސީ ކަމަށް ވެސް، އެ ފޯނު ކޯލުގައި އޭނާ ބުނެފައިވާ ކަމަށް ފުލުހުންގެ ރިޕޯޓުގައި ވަނީ ބުނެފަ އެވެ.
މީގެ އިތުރުން މުބާރާތުގެ ގަދަ 16 ގައި އާޖެންޓީނާ އާއި މިޞްރު ބައްދަލު ކުރި މެޗުގެ ކުރިން ވެސް، މިފަދަ ނުރައްކާތެރި އިންޒާރުތަކެއް ލިބިފައިވާ ކަމަށް ފުލުހުން ބުނެފައިވެ އެވެ. އެގޮތުން ސްޓޭޑިއަމްގެ ތެރޭގައި ހުރި ކުނި ވަށިގަނޑުތަކުގެ ތެރޭގައި ގޮވާތަކެތި ހަރުކޮށްފައިވާ ކަމަށް ބުނެ، ފުލުހުންނަށް ވަކިން ބޮމުގެ އިންޒާރެއް ވެސް ލިބިފައިވެ އެވެ.
މި އިންޒާރުތަކާ ގުޅިގެން ކަމާ ބެހޭ ފަރާތްތަކުން ވަނީ ވަގުތުން ހާއްސަ ފިޔަވަޅުތަކެއް އަޅާފައި އެވެ. އެގޮތުން ގޮވާ ތަކެތި ހޯދުމަށް ޚާއްސަ ތަމުރީނު ދީފައިވާ ކުއްތާ ބޭނުންކޮށްގެން މުޅި ސްޓޭޑިއަމް ބަލައި ފާސްކުރި ކަމަށް ފުލުހުން ބުނެ އެވެ. ނަމަވެސް، ބަލައި ފާސް ކުރުމުން އެއްވެސް ގޮވާ އެއްޗެއް ފެނިފައި ނުވާތީ، އެއީ ދޮގު އިންޒާރެއްކަން ފުލުހުން ވަނީ ކަށަވަރު ކޮށްދީފައި އެވެ.
މި ހާދިސާތަކާ ގުޅިގެން މުބާރާތުގެ ސަލާމަތީ ކަންކަން އިތުރަށް ވަރުގަދަކުރި ނަމަވެސް، މެސީ އަށް އަމާޒުކޮށް މިހާ ގިނަ އިންޒާރުތަކެއް ލިބިފައިވާކަން ހާމަވުމުން ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. އެމެރިކާގެ ތަހުގީގީ އިދާރާތަކުން މިހާރު ދަނީ މި އިންޒާރުތަކުގެ ފަހަތުގައި ތިބި މީހުން ހޯދުމުގެ މަސައްކަތް ކުރަމުންނެވެ.
