ކުޅުން ހުއްޓާލާނެ ވަގުތެއް ނިންމާނީ މެސީ އަމިއްލަ އަށް: ޓަޕިއާ

އާޖެންޓީނާގެ ކެޕްޓަން ލިއޮނަލް މެސީ ކުޅުން ހުއްޓާލާނެ ވަގުތެއް ނިންމާނީ އޭނާ އަމިއްލަ އަށް ކަމަށާއި، އެކަމާ އެއްވެސް ފަރާތަކުން އަވަސް އަރުވާ ނުލާނެ ކަމަށް އާޖެންޓީނާ ފުޓުބޯޅަ އެސޯސިއޭޝަން (އޭއެފްއޭ)ގެ ރައީސް ކްލައުޑިއޯ ޓަޕިއާ ވިދާޅުވެއްޖެ އެވެ. 

އާޖެންޓީނާގެ ޓީވީ ޗެނަލް އަކަށް ދެއްވި އިންޓަވިޔުއެއްގައި ޓަޕިއާ ވިދާޅުވީ، މެސީ އަކީ އޭނާގެ ކެރިއަރާ މެދު އޮތް ނިންމުމުގެ ފުރިހަމަ އިޚުތިޔާރު އޮތް ހަމައެކަނި ފަރާތް ކަމަށެވެ. 

ޓަޕިއާ ވިދާޅުވި ގޮތުގައި، މެސީ އަށް މިވަގުތު ބޭނުން ވަނީ ހަމަޖެހިލައިގެން ފުޓުބޯޅައިގެ އުފާ ހޯދުމުގެ ފުރުސަތެވެ. 2022 ވަނަ އަހަރުގެ ފީފާ ވޯލްޑް ކަޕް ކާމިޔާބު ކުރުމަށް ފަހު، 2026 ވަނަ އަހަރުގެ މުބާރާތުގައި މެސީ ފެންނާނެ ކަމުގެ ޔަޤީން ކަމެއް އޭރު ނެތް ނަމަވެސް، މެސީ ވަނީ މިދިޔަ މަހު އެމެރިކާގައި ނިމުނު ވޯލްޑް ކަޕްގައި މޮޅު ކުޅުމެއް ދައްކާފައި އެވެ. 

މިފަހަރުގެ މުބާރާތުގައި މެސީ ވަނީ ޖުމްލަ އަށް ލަނޑު ޖަހައި، ހަތަރު ލަނޑު ޖަހަން ފުރުސަތު ތަނަވަސްކޮށްދީފައި އެވެ. މިއަހަރުގެ މުބާރާތުގެ ފައިނަލްގައި އާޖެންޓީނާ ވަނީ ސްޕެއިން އަތުން ބަލިވެފައި އެވެ. ވޯލްޑް ކަޕަށް ފަހު މެސީގެ މުސްތަޤުބަލާ މެދު ގިނަ ސުވާލުތަކެއް އުފެދިފައި ވީ ނަމަވެސް، މުސްތަޤުބަލާ ގުޅޭ ގޮތުން މެސީ ވަކި އެއްޗެއް ބުނެފައި ނުވެ އެވެ. 

ޓަޕިއާ އިތުރަށް ވިދާޅުވީ، މެސީ އަކީ މުޅި ޓީމުގެ ނަމޫނާ ކަމަށާއި، ކޮންމެ މެޗަކަށް ފަހު އޭނާ އައީ އައު ރެކޯޑުތަކެއް ޤާއިމު ކުރަމުން ކަމަށެވެ. 2030 ވަނަ އަހަރުގެ ވޯލްޑް ކަޕް ސްޕެއިން އާއި ޕޯޗުގަލް އަދި މޮރޮކޯގައި ބާއްވާއިރު، އެ މުބާރާތް އަންނައިރު މެސީގެ އުމުރުން ވާނީ 43 އަހަރެވެ. 

ފީފާގެ ތަފާސްހިސާބުތަކަށް ބަލާއިރު، ވޯލްޑް ކަޕެއްގައި ކުޅުނު އެންމެ އުމުރުން ދުވަސްވީ ކުޅުންތެރިޔަކީ ކެމަރޫންގެ ރޮޖާ މިލާ އެވެ. އޭނާ ވަނީ އުމުރުން 42 އަހަރުގައި ވޯލްޑް ކަޕްގައި ކުޅެފައި އެވެ. މީގެ އިތުރުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވެސް ވަނީ އުމުރުން 41 އަހަރުގައި މިފަހަރުގެ ވޯލްޑް ކަޕްގައި ކުޅެފައި އެވެ. 

އާޖެންޓީނާގެ ގައުމީ ޓީމަށް ދެން އޮތީ ސެޕްޓެމްބަރު 21 އާއި 29 އާ ދެމެދު ކުޅުމަށް ހަމަޖެހިފައިވާ ބައިނަލްއަގުވާމީ މެޗު ތަކެވެ. މި މުއްދަތުގައި ކުޅޭ އެކުވެރި ކަމުގެ މެޗުތަކުގައި ވާދަކުރާނެ ޓީމެއް މިހާތަނަށް އިއުލާން ކޮށްފައެއް ނުވެ އެވެ. ބައެއް ރިޕޯޓުތަކުގައި ބުނާ ގޮތުގައި، އާޖެންޓީނާ އިން ދެން ކުޅޭ އެކުވެރިކަމުގެ މެޗަކީ ޤައުމީ ޓީމަށް މެސީ ކުޅޭނެ ފަހު މެޗަށް ވުމުގެ ފުރުސަތު ވެސް އެބަ އޮތެވެ.