މަރަޑޯނާގެ "ހޭންޑް އޮފް ގޯޑް" ބޯޅަ 2.5 މިލިއަން ޕައުންޑަށް ވިއްކާލައިފި

ފުޓުބޯޅައިގެ ތާރީޚުގައި އާޖެންޓީނާގެ ލެޖެންޑު ޑިއޭގޯ މަރަޑޯނާ ޖެހި މަޝްހޫރު "ހޭންޑް އޮފް ގޯޑް" ލަނޑު ޖެހުމަށް ބޭނުންކުރި ބޯޅަ، ނީލަމެއްގައި 2.5 މިލިއަން ޕައުންޑަށް ނުވަތަ 3.3 މިލިއަން އެމެރިކާ ޑޮލަރަށް ވިއްކާލައިފި އެވެ.

މި ބޯޅަ އަކީ 1986 ވަނަ އަހަރުގެ ފީފާ ވޯލްޑް ކަޕްގެ ކުއާޓާ ފައިނަލުގައި އިންގްލެންޑްއާ ދެކޮޅަށް ކުޅުނު މެޗުގައި މަރަޑޯނާ އަތުން ޖަހައި ގޯލުގެ ތެރެއަށް ފޮނުވާލި ބޯޅަ އެވެ. އެ މެޗުން އާޖެންޓީނާ 2-1 އިން މޮޅުވިއިރު، މެޗަށް ފަހު ނޫސްވެރިންނާ ވާހަކަ ދައްކަމުން މަރަޑޯނާ ބުނެފައި ވަނީ އެ ލަނޑަކީ ކޮންމެ ވެސް ވަރަކަށް މަރަޑޯނާގެ ބޮލާއި، އަދި ކޮންމެ ވެސް ވަރަކަށް "ހޭންޑް އޮފް ގޯޑް" އިން ޖެހި ލަނޑެއް ކަމަށެވެ.

އެމެރިކާގެ ހެރިޓޭޖް އޮކްޝަންސްގައި މިދިޔަ ހޮނިހިރު ދުވަހު ބޭއްވި ނީލަމުގައި މި ބޯޅަ 2.5 މިލިއަން ޕައުންޑަށް ވިކުނު ނަމަވެސް، ނީލަން ފެށުމުގެ ކުރިން ބެލެވިފައި އޮތީ މި ބޯޅަ ގާތްގަނޑަކަށް 7.3 މިލިއަން ޕައުންޑަށް، ނުވަތަ 10 މިލިއަން ޑޮލަރަށް ވިކޭނެ ކަމަށެވެ. ހެރިޓޭޖް އޯކްޝަންސްގެ އެކްސްޕާޓެއް ކަމަށްވާ މައިކް ޕްރޮވެންޒޭލް ރޮއިޓާސް އަށް މައުލޫމާތު ދެމުން ބުނީ، މިއީ ދުނިޔޭގައި އޮތް ފުޓުބޯޅައާ ގުޅުންހުރި އެންމެ މުހިންމު އެއް ތާރީޚީ ތަކެތީގެ ތެރެއިން އެކަތި ކަމަށެވެ.

މި ބޯޅަ އަކީ 1986 ވަނަ އަހަރުގެ އެ މެޗު ރެފްރީކަން ކުރި ޓިއުނީޝިއާގެ އަލީ ބިން ނާސިރު، މެޗު ނިމުމުން އޭނާގެ ބެލުމުގެ ދަށަށް ގެންގޮސް، ވޭތުވެ ދިޔަ 30 އަށް ވުރެ ގިނަ އަހަރު އޭނާގެ އަތުގައި ރައްކާ ކޮށްފައި އޮތް "އެޑިޑާސް އަޒްޓެކާ" މާކުގެ ބޯޅަ އެކެވެ. މިއީ އެ މެޗުގައި ބޭނުންކުރި ހަމައެކަނި ބޯޅަ ކަމަށް ބުނެ، 2023 ވަނަ އަހަރު އޭނާ ވަނީ ލިޔުމެއްގައި ސޮއި ވެސް ކޮށްފައި އެވެ. އަދި މިކަން މިނިވަން ތަހުގީގުތަކުން ވެސް ވަނީ ކަށަވަރު ކޮށްދީފައި އެވެ.

އަލީ ބިން ނާސިރު މި ބޯޅަ އެންމެ ފުރަތަމަ ވިއްކާލީ، 2022 ވަނަ އަހަރު 1.74 މިލިއަން ޕައުންޑަށެވެ. އޭގެ ފަހުން ބޯޅަ ގަތް ފަރާތުން 2023 ވަނަ އަހަރު އަލުން ނީލަމަށް ހުށަހެޅި ނަމަވެސް، އެ ފަހަރު ކަނޑައެޅި އެންމެ ކުޑަ އަގަށް ވުރެ ދަށުން ބިޑުތައް ހުރުމުގެ ސަބަބުން ބޯޅަ ވިކިފައިނުވެ އެވެ.

މަރަޑޯނާ އެ މެޗުގައި ޖެހި ދެވަނަ ލަނޑަކީ އިންގްލެންޑުގެ ފަސް ކުޅުންތެރިން ކައިރިން ނައްޓާލުމަށް ފަހު ޖެހި، "ގޯލް އޮފް ދަ ސެންޗަރީ" ގެ ގޮތުގައި މަޝްހޫރުވި ލަނޑެވެ. ފާހަގަ ކޮށްލެވޭ ގޮތުގައި، އެ މެޗުގައި މަރަޑޯނާ ލައިގެން ކުޅުނު ޖާޒީ 2022 ވަނަ އަހަރު ބޭއްވި ނީލަމެއްގައި ވަނީ 7.1 މިލިއަން ޕައުންޑަށް ވިއްކާލާފައި އެވެ.