ވަދާއީ މެޗެއް ކުޅުމަށް އާޖެންޓީނާ ޤައުމީ ޓީމުން މެސީ އަށް ފުރުސަތު ދީފި

ބައިނަލްއަޤުވާމީ ފުޓުބޯޅަ އިން ރިޓަޔާކުރުމަށްފަހު، ލިއޮނަލް މެސީގެ ވަދާއީ މެޗުގައި ކުޅުމަށް އާޖެންޓީނާގެ ޤައުމީ ސްކޮޑުން އޭނާ އަށް ފުރުސަތު ދީފި އެވެ.

ދުނިޔޭގައި އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާ، އުމުރުން 39 އަހަރުގެ މެސީ ބައިނަލްއަޤުވާމީ ފުޓުބޯޅަ އިން ރިޓަޔާކުރިކަން އިއުލާންކުރީ މިއަހަރުގެ ފީފާ ވޯލްޑް ކަޕް ފައިނަލުގައި ސްޕެއިން އަތުން އާޖެންޓީނާ ބަލިވިތާ ދެ މަސް ފަހުންނެވެ.

ނަމަވެސް، އާޖެންޓީނާގެ ފުޓުބޯޅަ އެސޯސިއޭޝަން (އޭއެފްއޭ) ގެ ރައީސް ކްލައުޑިއޯ ޓަޕިއާ އަންގާރަ ދުވަހު ސޯޝަލް މީޑިއާގައި ހާމަކުރެއްވި ގޮތުގައި، އަންނަ އޮކްޓޫބަރު މަހުގެ ހަ ވަނަ ދުވަހު ބެނިންއާ ދެކޮޅަށް ކުޅޭ މެޗުގައި މެސީ ފެނިގެންދާނެ އެވެ.

ޓަޕިއާ ވިދާޅުވީ، ދުނިޔޭގެ އެންމެ މޮޅު ކުޅުންތެރިޔާ އަދި އާޖެންޓީނާގެ ކެޕްޓަން މެސީ އަށް ހައްގުވާ ފަދަ ވަދާއީ މެޗެއް އަމިއްލަ ޤައުމުގައި ދިނުމަށްޓަކައި އެ މެޗުގައި ކުޅުމަށް އޭނާ އަށް ދައުވަތު ދީފައިވާ ކަމަށެވެ. ބުއެނޯސް އައިރިސްގެ އެސްޓާޑިއޯ މޮނިއުމެންޓަލް ސްޓޭޑިއަމްގައި ކުޅޭ މި މެޗަކީ މެސީ ޤައުމީ ޖާޒީގައި ފެންނާނެ ފަހު ފަހަރެވެ.

ވޯލްޑް ކަޕް ފައިނަލަށް ފަހު އާޖެންޓީނާ ކުޅޭ ފުރަތަމަ މެޗު އޮންނާނީ ސެޕްޓެމްބަރު މަހުގެ 30 ވަނަ ދުވަހު ކޯޑޯބާގެ މާރިއޯ ކެމްޕެސް ސްޓޭޑިއަމްގައި ބޮލީވިއާއާ ދެކޮޅަށެވެ. އޭގެ ފަހުން އޮކްޓޫބަރު ތިން ވަނަ ދުވަހު ބުއެނޯސް އައިރިސްގައި ބުރުކީނާ ފާސޯއާ ދެކޮޅަށް އެ ޤައުމުން މެޗެއް ކުޅޭނެ އެވެ.

ބޮލީވިއާއާ ދެކޮޅަށް ކުޅޭ މެޗުގައި ސްޓޭޑިއަމްގެ ޖާގަ 50 އިންސައްތަ އަށް މަދުކުރުމަށް ފީފާ އިން ވަނީ އަންގާފަ އެވެ. އެއީ މިއަހަރުގެ ވޯލްޑް ކަޕްގެ ތެރޭގައި ހިނގައި ދިޔަ ބައެއް ހާދިސާތަކާ ގުޅިގެން ފީފާ އިން ދީފައިވާ އަދަބެކެވެ.

މެސީ ވަނީ އާޖެންޓީނާގެ ޤައުމީ ޓީމާ އެކު 2022 ވަނަ އަހަރުގެ ވޯލްޑް ކަޕް ކާމިޔާބު ކުރުމުގެ އިތުރުން، 2014 އަދި 2026 ގެ ވޯލްޑް ކަޕްގެ ފައިނަލްގައި ވެސް ކުޅެފަ އެވެ. ވޯލްޑް ކަޕްގެ އިތުރުން މެސީ ވަނީ އާޖެންޓީނާ އެކު ކޮޕާ އެމެރިކާ ދެ ފަހަރު ކާމިޔާބުކޮށްފަ އެވެ.