އިންފަންޓީނޯ އަށް ތާއީދު އޮތް ކަމަށް އާޖެންޓީނާ އާއި މެކްސިކޯ އިން ވެސް ބުނެފި
8 އޯގަސްޓު 2026 | ހޮނިހިރު 03:25މިއަހަރުގެ ވޯލްޑް ކަޕް ހޯސްޓު ކުރި އެއް ޤައުމަކީ މެކްސިކޯ ކަމަށްވާއިރު، މެކްސިކޯ ހިމެނޭ ކޮންކާކަފް އިން ވަނީ އިންފަންޓީނޯގެ މައްސަލަ ތަޙުގީގު ކުރުމަށް ގޮވާލާފައި. ނަމަވެސް، އެ ކޮންފެޑެރޭޝަންގެ ނިންމުމާ ޚިލާފަށް، މެކްސިކޯ އިން ވަނީ އިންފަންޓީނޯ އަށް ތާއީދު އޮތް ކަމަށް ހާމަ ކޮށްފައި
ފީފާގެ ރައީސް ޖިއާނީ އިންފަންޓީނޯ އާއި އާޖެންޓީނާ ފުޓުބޯޅަ އެސޯސިއޭޝަންގެ ރައީސް ކްލައުޑިއޯ ޓަޕިއާ | ގެޓީ އިމޭޖަސް
ފީފާ ވޯލްޑް ކަޕް ހިމެނޭހެން، ފީފާގެ މުބާރާތްތަކުގެ ވިޔަފާރީގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ގެންގުޅުއްވި ޕްލޭންއާ ގުޅިގެން ފީފާގެ ރައީސް ޖިއާނީ އިންފަންޓީނޯ އަށް ޕްރެޝަރު ބޮޑުވެފައިވާއިރު، އޭނާ އަށް ތާއީދު އޮތް ކަމަށް އާޖެންޓީނާާ އާއި މެކްސިކޯގެ ފުޓުބޯޅަ އެސޯސިއޭޝަންތަކުން ބުނެފި އެވެ.
މިއަހަރުގެ ވޯލްޑް ކަޕް ހޯސްޓު ކުރި އެއް ޤައުމަކީ މެކްސިކޯ ކަމަށްވާއިރު، މެކްސިކޯ ހިމެނޭ ކޮންކާކަފް އިން ވަނީ އިންފަންޓީނޯގެ މައްސަލަ ތަޙުގީގު ކުރުމަށް ގޮވާލައިފަ އެވެ. ނަމަވެސް، އެ ކޮންފެޑެރޭޝަންގެ ނިންމުމާ ޚިލާފަށް، މެކްސިކޯ އިން ވަނީ އިންފަންޓީނޯ އަށް ތާއީދު އޮތް ކަމަށް ހާމަކޮށްފައި އެވެ.
ބުރާސްފަތި ދުވަހު އެފްރިކާގެ ފުޓުބޯޅަ ކޮންފެޑެރޭޝަން (ކާފް) އިން ވެސް ވަނީ އިންފަންޓީނޯ އަށް ތާއީދު ކުރަން ނިންމައިފަ އެވެ. ނަމަވެސް، ޔޫރަޕުގެ ޤައުމުތައް ހިމެނޭ ޔުއެފާ އިން ބުނަމުން އަންނަނީ، އެ މީހުން އަދިވެސް އޮތީ ވޯލްޑް ކަޕް ބޮއިކޮޓް ކުރުމުގެ ވިސްނުމުގައި ކަމަށެވެ.
ދެކުނު އެމެރިކާގެ ކޮންމެބޯލް އިން ނެރުނު ބަޔާނެއްގައި ބުނެފައި ވަނީ، ފީފާގެ ހުރިހާ މެންބަރު ޖަމިއްޔާތަކުގެ ވޯޓަކާ ނުލައި އިންފަންޓީނޯ މަޤާމުން ވަކި ކުރުމުގެ އެއްވެސް މަސައްކަތެއް ޤަބޫލު ނުކުރާނެ ކަމަށެވެ. މެކްސިކޯ އިން ވެސް ވަނީ އެކަމަށް ތާއީދު ކޮށްފައިފަ އެވެ. މެކްސިކޯ އިން ބުނެފައި ވަނީ، ހުރިހާ އިދާރާތަކެއް ހަމަ ނުވާ ގޮތަށް ކުރިއަށްގެންދާ އެއްވެސް ކަމެއް ޤަބޫލު ނުކުރާނެ ކަމަށާއި، ފީފާގެ ޖަމިއްޔާތަކަށް ފައިދާ ކުރާ ގޮތަށް ފުޓުބޯޅަ ތަރައްޤީ ކުރުމަށް އިންފަންޓީނޯ ކުރައްވާ މަސައްކަތަށް ތާއީދު ކުރާ ކަމަށެވެ.
އާޖެންޓީނާގެ ފުޓުބޯޅަ އެސޯސިއޭޝަން އިން ނެރުނު ބަޔާނެއްގައި ބުނެފައި ވަނީ، ފީފާގެ ރައީސް ކަމުގައި ހުންނަވައި ފާއިތުވި 10 އަހަރުގެ ތެރޭގައި އިންފަންޓީނޯ ކުރައްވާފައިވާ މަސައްކަތަށް ތާއީދު ކުރާ ކަމަށެވެ. އަދި ދުނިޔޭގެ އެކި ކަންކޮޅުތަކުގައި ފުޓުބޯޅަ ވަރުގަދަ ކުރުމާ އެކު، ފުޓުބޯޅައިގެ ފޯރި އިތުރު ކުރުމަށް ކުރި މަސައްކަތްތަކެއް ކަމަށް ވެސް އާޖެންޓީނާ އިން ވަނީ ބުނެފައި އެވެ.
ވޯލްޑް ކަޕްގެ ހިއްސާ ވިއްކާލުމަށް ގެންްގުޅުއްވި ރޭވުން ހޫނުވެ، އެންމެ ފަހުން އިންފަންޓީނޯ ވަނީ އެކަން ހުއްޓާލައްވައިފަ އެވެ. އަދި މިދިޔަ ހަފުތާގެ ތެރޭގައި ބޭއްވި ފީފާގެ ކުއްލި ބައްދަލުވުމެއްގައި އިންފަންޓީނޯ ވަނީ އެކަމަށް މައާފަށް ވެސް އެދިވަޑައިގެންފައި އެވެ. އަންނަ އަހަރުގެ މާޗު މަހު އޮންނަ ފީފާާގެ އިންތިޚާބުގައި ވާދަކުރައްވާނެ ކަމަށް މިހާތަނަށް އިއުލާން ކުރައްވާފައި ވަނީ އިންފަންޓީނޯ އެކަންޏެވެ. ނަމަވެސް، އޭނާއާ ދެކޮޅަށް ކެންޑިޑޭޓަކު ނެރުމުށް ޔުއެފާ ހިމެނޭހެން، ގިނަ އިދާރާތަކަކުން އަންނަނީ މަސައްކަތް ކުރަމުންނެވެ.
