މަޝްވަރާތަކަށް އެނބުރި އައުމުގެ "ދޮރު އީރާނަށް ހުޅުވިފައި": އެމެރިކާ

މެދުއިރުމަތީގައި އެމެރިކާއިން އިސްވެ ފެށި ޣައިރުގާނޫނީ ހަނގުރާމަ ނިމުމަކަށް ގެނައުމަށް ޓަކައި އަލުން މަޝްވަރާތަކަށް އެނބުރި އައުމުގެ "ދޮރު އީރާނަށް ހުޅުވިފައި" ވާ ކަމަށް އދ. އަށް އެމެރިކާއިން ކަނޑައަޅާފައި ހުންނަވާ ސަފީރު މައިކް ވޮލްޓްޒް އާދީއްތަ ދުވަހު ވިދާޅުވެއްޖެ އެވެ.

އދ. ގެ އާންމު މަޖިލީހުގެ ހަވާސާގައި، ނިއު ޔޯކްގައި ބޭއްވި އޭއައި-މޮނިޓާ ލައިވް ހަރަކާތެއްގައި ވާހަކަފުޅު ދައްކަވަމުން ވޮލްޓްޒް ވިދާޅުވީ، ފެބުރުވަރީ 28 ގައި އީރާނާ ދެކޮޅަށް ފެށި ހަނގުރާމައިގައި ވަގުތު އޮތީ އެމެރިކާގެ ފަޅީގައި ކަމަށް ރައީސް ޑޮނަލްޑް ޓްރަމްޕްގެ ސަރުކާރުން ގަބޫލުކުރައްވާ ކަމަށެވެ. މި ހަމަނުޖެހުމުގައި ވަގުތު އޮތީ އެމެރިކާގެ ފަޅީގައި ކަމަށް ވޮޝިންގޓަން އިން ގަބޫލުކުރޭތޯ އޭއައި-މޮނިޓާގެ ސީނިއާ އެޑްވައިޒަރު އެންޑްރޫ ޕެރެސިލީޓީ ސުވާލު ދެންނެވުމުން، "އަޅުގަނޑު ގަބޫލުކުރަނީ ހަގީގަތަކީ އެއީ،" ކަމަށް ވޮލްޓްޒް ވިދާޅުވި އެވެ.

Advertisement

މިއާއެކު، "މަޝްވަރާގެ މޭޒަށް އެނބުރި އައުމަށް އީރާނަށް ދޮރު ހުޅުވިފައިވާ،" ކަމަށް އޭނާ ވިދާޅުވި އެވެ. ނަމަވެސް، މަޝްވަރާތައް އަލުން ފެށުމުގެ ޝަރުތެއްގެ ގޮތުން އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމަށާއި ގެއްލުމުގެ ބަދަލު ދިނުމަށް ތެހެރާނުން ޑިމާންޑްކުރާ ކަމަށް ބުނެ ދެކެވޭ ވާހަކަތަކަކީ "ޚިޔާލީ" ވާހަކަތަކެއްގެ ގޮތުގައި ސިފަކުރައްވައި، އޭނާ ވަނީ އެ ވާހަކަތައް ދޮގުކުރައްވާފަ އެވެ.

އިގްތިސާދީ ފިއްތުންތަކާއި އީރާނުގެ ފައިސާގެ އަގު ވެއްޓިފައިވާ މައްސަލައަށް އަލިއަޅުއްވާލައްވަމުން، "1979 ގެ ފަހުން އީރާނުގެ ސަރުކާރު އެންމެ ބަލިކަށި ހާލަތަކަށް ވެއްޓިފައިވަނީ މިހާރު، އަދި އެ ގައުމު ދަނީ އިތުރަށް ބަލިކަށިވަމުން" ކަމަށް ވޮލްޓްޒް ވިދާޅުވި އެވެ. އަދި، "އެ މީހުން [މަޝްވަރާތަކަށް] އެނބުރި އަންނާނެ ކަމަށާއި، އަޅުގަނޑު އުންމީދު ކުރަނީ ސުލްހަވެރި އަދި ޑިޕްލޮމެޓިކް ހަމަތަކުގެ ތެރެއިން ކަމަށް،" ވެސް އޭނާ ފާހަގަކުރެއްވި އެވެ.

ޣައްޒާގައި އިސްރާއީލުން ހިންގަމުންދާ ގަތުލުއާންމު

ޣައްޒާގެ މައްސަލައާ ގުޅޭ ގޮތުން ވާހަކަފުޅު ދައްކަވަމުން ވޮލްޓްޒް ވަނީ، އެމެރިކާ ސަރުކާރުން ގެންގުޅޭ ސިޔާސަތަކީ "އާ ބާވަތެއްގެ މަލްޓިލެޓަރަލިޒަމް" އެއްގެ ގޮތުގައި ސިފަކުރައްވާފަ އެވެ. އަދި، ޓްރަމްޕްގެ 20 ނުކުތާގެ ޣައްޒާ ޕްލޭން ތަންފީޒުކުރުމާ ގުޅޭގޮތުން އިސްރާއީލްއާ އެކު ކުރިއަށްދާ މަޝްވަރާތައް، އޮކްޓޫބަރު 27 ގައި ބާއްވާ އިސްރާއީލްގެ ގާނޫނުހަދާ މަޖިލީހުގެ އިންތިޚާބު ނިމި "ހަމަޖެހުމަކަށް އައުމުން ކުރިއަށް ގެންދެވިދާނެ" ކަމަށް އޭނާ ވިދާޅުވި އެވެ.

މި ޕްލޭންގެ ދަށުން ފަލަސްތީނުގައި ޓެކްނޮކްރެޓިކް ސަރުކާރެއް އެކުލަވާލުމާއި، ޣައްޒާ އަލުން އާރާސްތުކުރުމުގެ އިތުރުން ބައިނަލްއަގުވާމީ ހަމަޖެހުމަށް މަސައްކަތްކުރާ ބާރެއް (އިންޓަނޭޝަނަލް ސްޓެބިލައިޒޭޝަން ފޯސް) ގާއިމުކުރުން ހިމެނެ އެވެ. ނަމަވެސް، ފަލަސްތީނުގެ މިނިވަންކަމަށް ޖިހާދުކުރާ ހަމާސް ޖަމާއަތުން ހަތިޔާރު ބެހެއްޓުމަށް މަޖުބޫރުކުރުވުމާއި، ޣައްޒާއަށް އަރައިގަނެފައިވާ އިސްރާއީލްގެ ސިފައިން ފޭބުމާ ގުޅޭ ގޮތުން ކުރެވޭ މަޝްވަރާތައް ހުއްޓުމަކަށް އައިސްފައިވާ ކަން އޭނާ ފާހަގަކުރެއްވި އެވެ.

މި ގޮތުން އިސްރާއީލާއެކު ގުޅުން ބަދަހިކޮށް އާންމު ހާލަތަކަށް ގެނައުމަށް އެކުލަވާލާފައިވާ އެބްރަހަމް އެކޯޑްސްއާ ގުޅުމަށް "ޝައުގުވެރިވާ މެންބަރުންތަކެއް" އެބަތިބި ކަމަށް ވޮލްޓްޒް ވިދާޅުވި ނަމަވެސް، އެއީ ކޮން ގައުމުތަކެއް ކަން އޭނާ ހާމައެއް ނުކުރައްވަ އެވެ. މީގެ އިތުރުން، މި މަހުގެ ކުރީކޮޅު އިސްރާއީލް އަދި މޮރޮކޯއިން ސަފީރުން ބަދަލުކުރުމަށް ނިންމި ނިންމުމަށް ވެސް އޭނާ މަރުހަބާ ވިދާޅުވި އެވެ.

އިރާގާ ގުޅޭ ގޮތުން ވާހަކަފުޅު ދައްކަވަމުން ވޮލްޓްޒް ވަނީ، އީރާނުގެ މަދަދު ލިބޭ ހަނގުރާމަވެރި ޖަމާއަތްތައް ދައުލަތުގެ ބާރުގެ ދަށަށް ގެނައުމަށް އެ ގައުމުގެ ބޮޑުވަޒީރު ޢަލީ އަލް-ޒައިދީ ކުރައްވަމުން ގެންދަވާ މަސައްކަތްޕުޅުތަކަށް ތައުރީފު ކުރައްވާފަ އެވެ. އަދި، އީރާނުގެ "ބަލިކަށިވެފައިވާ ހާލަތުގެ" ސަބަބުން، އެ ޖަމާއަތްތަކުގެ ނުފޫޒު ކުޑަކުރުމަށް ރަނގަޅު ފުރުސަތެއް ތަނަވަސްވެގެންދާނެ ކަމަށް ވެސް އޭނާ ވިދާޅުވި އެވެ.