ދެކުނު ކޮރެޔާގެ ރައީސް ގޮވާލެއްވީ އުތުރު ކޮރެޔާއާ ދެކޮޅަށް އަޅާފައިވާ ފިޔަވަޅުތައް ލުއިކޮށްދޭން
22 ސެޕްޓެމްބަރު 2026 | އަންގާރަ 06:45އުތުރު ކޮރެޔާއިން ނިއުކްލިއާ ހަތިޔާރު އުފެއްދުން ހުއްޓާލުމުގެ ބަދަލެއްގެ ގޮތުން، އެ ގައުމަށް ދީފައިވާ އަދަބުތަކަށް ލުއިދިނުމަށް ދެކުނު ކޮރެޔާގެ ރައީސް ލީ ޖޭ މަޔޮންގް އެމެރިކާއަށް ގޮވާލައްވައިފި. އުތުރު ކޮރެޔާގެ ހަތިޔާރުގެ ގާބިލުކަން އިތުރުވަމުންދާތީ، މަޝްވަރާގެ މޭޒަށް ދިއުމަކީ ސަރަހައްދީ ސުލްހައަށް މުހިންމު ކަމެއް ކަމަށް އޭނާ ވިދާޅުވި. އަދި، މި މައްސަލައިގައި ދެ ގައުމުގެ ދެމެދުގައި އޮތް ނުތަނަވަސްކަން ކުޑަކުރުމަށް އދ. މެދުވެރިކޮށް ހާއްސަ ތަސައްވުރެއް ހުށަހެޅުއްވުމަށް ވެސް ލީ ވަނީ ނިންމަވާފައި
ދެކުނު ކޮރެޔާގެ ރައީސް ލީ ޖޭ މަޔޮންގް ބައްދަލުވުމެއްގައި ވާހަކަފުޅު ދައްކަވަނީ | ރޮއިޓާސް
އުތުރު ކޮރެޔާގެ ނިއުކްލިއާ ހަތިޔާރު އުފެއްދުމުގެ ޕްރޮގްރާމް ހުއްޓުމަކަށް ގެނައުމަށް ޕިޔޮންގޔަންގާއެކު ވެވޭ އެއްބަސްވުމެއްގެ ބަދަލެއްގެ ގޮތުން، އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމަށް ދެކުނު ކޮރެޔާގެ ރައީސް ލީ ޖޭ މަޔޮންގ އެމެރިކާއަށް ގޮވާލައްވައިފި އެވެ.
"ކޮންމެއަކަސް އެހާ ބޮޑު އަސަރެއް ނުކުރާ ދަތިކުރުމުގެ ފިޔަވަޅުތަކާއި، އިތުރު ނިއުކްލިއާ ހަތިޔާރާއި ދުރު ބައްރުތަކަށް ދަތުރުކުރެވޭ ބެލިސްޓިކް މިސައިލް ޓެކްނޮލޮޖީ އުފެއްދުން ހުއްޓާލުމާ ދެމެދު ކުރެވޭ މުއާމަލާތުގައި ބޮޑު އަގެއް އޮތް ކަމަށް އަޅުގަނޑު ގަބޫލުކުރަން،" ލީ ވިދާޅުވި އެވެ. މީގެއިތުރުން، މިހާރު އޮތް ހާލަތުގެ ދަށުން ނިއުކްލިއާ ހަތިޔާރު އެއްކޮށް ނައްތާލުމަށް މަސައްކަތް ކުރުމަކީ އެއްވެސް ނަތީޖާއެއް ހާސިލުވާނެ ކަމެއް ނޫން ކަމަށް ވެސް ލީ ވިދާޅުވި އެވެ.
ނިއުކްލިއާ ހަތިޔާރު އުފެއްދުން މަޑުޖައްސާލުމުގެ އެއްބަސްވުމަކަށް އާދެވިއްޖެ ނަމަ، ދެ ފަރާތުން ބަދަލުގައި ދޭ އިނާޔަތްތަކާއި ދޫދިނުންތަކުގެ ޒަރިއްޔާއިން އިތުބާރު ބިނާކުރެވިދާނެ ކަމަށް ލީ ވިދާޅުވި އެވެ. އަދި، އޭގެ ސަބަބުން ނިއުކްލިއާ ހަތިޔާރުގެ މިންވަރު މަދުކުރުމަށް އުތުރު ކޮރެޔާއަށް ވިސްނައިދިނުމުގެ ފުރުސަތު ފަހިވެގެންދާނެ ކަމަށް ވެސް އޭނާ ފާހަގަކުރެއްވި އެވެ.
އުތުރު ކޮރެޔާއިން އަހަރަކު އިތުރު 10 އާއި 20 އާ ދެމެދުގެ އަދަދަކަށް ނިއުކްލިއާ ހަތިޔާރު އުފެއްދުމުގެ ގާބިލުކަން މިހާރު ލިބިފައިވާ ކަމަށް ނުވަތަ މިހާރު ވެސް އުފައްދަމުންދާ ކަމަށް ދެކުނު ކޮރެޔާގެ ދިރާސާތަކުން ދައްކާ ކަމަށް ލީ ވިދާޅުވި އެވެ. އެހެންކަމުން، މިހާރު އުފެދިފައިވާ މި މައްސަލަ އެ ގޮތުގައި ކުރިއަށް ދިޔުމަށް ދޫކޮށްލުމަކީ ނުރައްކާ އިންތިހާއަށް ބޮޑު ކަމެއް ކަމަށް އޭނާ ބަޔާންކުރެއްވި އެވެ. "އެ ޤައުމުގެ ދެމިއޮތުން ކަށަވަރުކުރެވޭ ވަރަށް ނިއުކްލިއާ ހަތިޔާރާއި މިސައިލް އެއްކުރެވިއްޖެ ކަމަށް ގަބޫލުކުރެވޭ ހިސާބުން، ފައިސާ ހޯދުމަށް ޓަކައި އެ ތަކެތި ބޭރުކުރުމުގެ ވަސްވާސް އެ ޤައުމަށް ވަންނާނެ،" ލީ ވިދާޅުވި އެވެ. "އެއީ ހަގީގަތުގައި ވެސް ނުރައްކާތެރި ވަގުތުކޮޅަކަށް ވާނެ."
ދެކުނު ކޮރެޔާއިން އުތުރު ކޮރެޔާއާ މެދު ގެންގުޅޭ ސިޔާސަތު "ފުރަތަމަ ނިއުކްލިއާ ހަތިޔާރު ނައްތާލުން" މި އުސޫލުން ބަދަލުކޮށް، "ފުރަތަމަ ސުލްހަ" ގާއިމުކުރުމުގެ މިސްރާބަކަށް ބަދަލުކުރަމުންދާ ކަމަށް އެ ޤައުމުގެ އޮފިޝަލުން ވަނީ ވިދާޅުވެފަ އެވެ. މި ގޮތުން، އުތުރު ކޮރެޔާގެ ނިޒާމަށް އިހުތިރާމްކުރުމަށާއި، ޕިޔޮންގޔަންގއާއެކު ސުލްހަވެރިކަމާ އެކު އެކުގައި އުޅުމަށް މަސައްކަތް ކުރައްވާނެ ކަމަށް ވޭތުވެދިޔަ އަހަރު ލީ ވަނީ ވައުދުވެވަޑައިގަންނަވާފަ އެވެ.
ނަމަވެސް، ދެ ކޮރެޔާގެ މެދުގައިވާ ގުޅުން އަދިވެސް އޮތީ ހީނަރުވެ، ކުރިއަށް ނުގޮސް ހުއްޓިފަ އެވެ. އުތުރު ކޮރެޔާގެ ލީޑަރު ކިމް ޖޮންގް އުން ވަނީ ޕިޔޮންގޔަންގއިން ދެ ކޮރެޔާ އެއްބައިވަންތަކުރުމަށް ގެންގުޅުނު ސިޔާސަތު ދޫކޮށްލައްވައި، ދެކުނު ކޮރެޔާއަކީ އެ ޤައުމުގެ އެންމެ ބޮޑު ދުޝްމަނުގެ ގޮތުގައި ސިފަކުރައްވާފަ އެވެ. އަދި، ކުރީ ސަފުގެ ދިފާއީ އައްޑަނަތައް ވަރުގަދަކުރުމަށް ވެސް އޭނާ ވަނީ އަމުރުކުރައްވާފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ކިމްއާއެކު އާ ބައްދަލުވުމެއް ބޭއްވެވުމަށް މަސައްކަތް ކުރައްވަމުން ގެންދަވާ އިރު، މި މަޝްވަރާތައް ބޭއްވުމަށް ވަރަށް ބޮޑަށް އެދިވަޑައިގަންނަވާ ކަމަށް ދެކުނު ކޮރެޔާގެ ރައީސް ވަނީ ވިދާޅުވެފަ އެވެ. މީގެއިތުރުން، މި ހަފުތާގައި ބާއްވާ އދ. ގެ އާންމު މަޖިލީހުގައި، ކޮރެއަން ޕެނިންސިއުލާގައި ސުލްހައާއި ސުލްހަވެރިކަމާއެކު އެކުގައި އުޅުމާ ގުޅޭ ގޮތުން ގެންގުޅުއްވާ ތަސައްވުރު އދ. އަށް ހުށަހެޅުއްވުމަށް ލީ ވަނީ ގަސްދުކުރައްވާފަ އެވެ.
މަސްދަރު: ސީއެންއޭ
