އީރާނުން އަތުލައިގަތް އެމެރިކާގެ ކަނޑުއަޑީގެ ޑްރޯން "ރިވާސް އިންޖިނިއަރ" ކުރުމުގެ މަސައްކަތް ފަށައިފި

އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކަނޑުގެ ސިފައިން އަތުލައިގަތް އެމެރިކާގެ ކަނޑުއަޑީގެ ޑްރޯން "ރިވާސް އިންޖިނިއަރ" ކުރުމުގެ ނުވަތަ އެ އުފައްދާފައިވާ ގޮތް ބަލައި، އެފަދަ އާލާތްތައް އަމިއްލައަށް އުފެއްދުމުގެ މަސައްކަތް އީރާނުން ފަށާނެ ކަމަށް އެ ފައުޖުގެ ތަރުޖަމާނު ވިދާޅުވެއްޖެ އެވެ.

އަންގާރަ ދުވަހު ޝާއިއުކުރި އިންޓަވިއުއެއްގައި ބްރިގޭޑިއަރ ޖެނެރަލް ހުސައިން މުހިއްބީ ވަނީ، ދާދިފަހުން އެމެރިކާ އާއި އިސްރާއީލުން ހިންގި އުދުވާނުތަކުގައި، އެމެރިކާގެ ކުރިއަރާފައިވާ އަސްކަރީ ވަސީލަތްތަކާ ދެކޮޅަށް އީރާނުގެ ހަތިޔާރު އެޅި ފައުޖުތަކުން ދެއްކި ހުނަރުވެރިކަމާ ގުޅޭގޮތުން ވާހަކަދައްކަވާފަ އެވެ.

Advertisement

މުހިއްބީ ވިދާޅުވީ، އެމެރިކާގެ އަސްކަރީ އަދި ދިފާއީ ސިނާއަތުގައި ބޭނުންކުރާ އެންމެ ޒަމާނީ ޓެކްނޮލޮޖީތައް އީރާނުގެ ކޮންޓްރޯލްގެ ދަށަށް އައިސްފައިވާކަން މި ހަނގުރާމައިން ސާބިތުވެފައިވާ ކަމަށެވެ.

މީގެ މުހިންމު މިސާލެއްގެ ގޮތުން އޭނާ ފާހަގަކުރެއްވީ އެމެރިކާގެ އެފް-35 މަރުކާގެ ފައިޓަރ ޖެޓެވެ. އޭނާ ވިދާޅުވި ގޮތުގައި މި ބޯޓަކީ އޭގެ ބޮޑީ އެލޯއި ނުވަތަ ބޯޓު ހަދާފައިވާ މާއްދާތަކާއި، ރާޑަރުތަކަށް ނުފެނި ދަތުރުކުރުމުގެ ގާބިލުކަމާއި، އުދުހޭ އުސްމިނުގެ އިތުރުން ހަތިޔާރު އުފުލުމުގެ ގާބިލުކަމުގައި ވެސް އެންމެ ފަހުގެ ޓެކްނޮލޮޖީ ބޭނުންކޮށްފައިވާ ބޯޓެކެވެ.

އައި.އާރް.ޖީ.ސީ ގެ ތަރުޖަމާނު ވިދާޅުވި ގޮތުގައި، އެންމެ ފަހުގެ ޓެކްނޮލޮޖީ ބޭނުންކޮށްފައިވާ އެފް-35 މަރުކާގެ ބޯޓަށް އަމާޒުކޮށް ހަމަލާދީފައިވަނީ އައި.އާރް.ޖީ.ސީ އެއަރޯސްޕޭސް ފޯސްގެ އާ އަދި ކުރިއަރާފައިވާ ވައިގެ ދިފާއީ ނިޒާމުތަކުންނެވެ.

މީގެ އިތުރުން، އައި.އާރް.ޖީ.ސީ ގެ ކަނޑުގެ ސިފައިން އަތުލައިގަތް އެމެރިކާގެ ކަނޑުއަޑީގެ އުޅަނދާ ބެހޭގޮތުން މުހިއްބީ ވިދާޅުވީ، އެ އުޅަނދުގައި ހުރި ކުރިއަރާފައިވާ ޓެކްނޮލޮޖީތައް މިހާރު އީރާނުގެ ސިފައިންގެ އަތްދަށަށް އައިސްފައިވާ ކަމަށެވެ.

އޭނާ ވިދާޅުވީ، އައި.އާރް.ޖީ.ސީ ގެ ކަނޑުގެ ސިފައިންގެ އަތްދަށަށް އައި ކަނޑުއަޑީގެ އުޅަނދުގައި ހުރި މި ޒަމާނީ ޓެކްނޮލޮޖީތައް ދެނެގަތުމަށްޓަކައި "ރިވާސް އިންޖިނިއަރިންގ" ގެ މަސައްކަތް ވަރަށް އަވަހަށް ފަށާނެ ކަމަށެވެ.

އީރާނުގެ އަތުގައި ތަފާތު ވައްތަރުގެ މަތިންދާބޯޓުތަކާއި، ކަނޑުއަޑީގެ އުޅަނދުތަކާއި، އިންސާނަކާ ނުލައި ދުއްވާ އުޅަނދުތައް ހުރިކަން ފާހަގަކުރައްވަމުން ތަރުޖަމާނު ވިދާޅުވީ، މިއަދު އީރާނުގެ އަތުގައި ހަނގުރާމަވެރި، އެހީތެރިކަން ފޯރުކޮށްދޭ، މުދާ އުފުލާ އަދި ޖާސޫސީ މައުލޫމާތު އެއްކުރާ ތަފާތު ގިނަ އުޅަނދުތަކެއް އެބަހުރި ކަމަށެވެ.

ރޮއިޓާސް އިން ރިޕޯޓްކޮށްފައިވާ ގޮތުގައި، އަތުލައިގަތް ކަނޑުއަޑީގެ ޑްރޯންގެ ސަބަބުން އީރާނަށް އަސްކަރީ ގޮތުން ބޮޑު ކުރިއެރުމެއް ލިބުމަކީ ދުރު ކަމެއް ކަމަށް މުހައްލިލުން ބުނެ އެވެ. ނަމަވެސް، މިއީ ޓެކްނޮލޮޖީގެ ގޮތުން ކުރިއަރާފައިވާކަން ދެއްކުމަށް ވޮޝިންގޓަނުން ކުރަމުންދާ މަސައްކަތަށް ކުރިމަތިވި ލަދުވެތި ހުރަހެއް ކަމަށް އެ ފަރާތްތަކުން ދެކެއެވެ.

މިދިޔަ ސެޕްޓެމްބަރު މަހުގެ ކުރީކޮޅު އައި.އާރް.ޖީ.ސީ ގެ ކަނޑުގެ ސިފައިން ވަނީ، ހުރްމުޒް ކަނޑުއޮޅިން އެމެރިކާގެ އިންސާނަކާ ނުލައި ދުއްވާ، ނުހަނު ކުރިއަރާފައިވާ ކަނޑުއަޑީގެ އުޅަނދެއް ކާމިޔާބުކަމާއެކު ހުއްޓުވައި އަތުލައިގަނެފައިވާކަން އިއުލާންކޮށްފަ އެވެ.

އައި.އާރް.ޖީ.ސީ ގެ ކަނޑުގެ ސިފައިން ބުނި ގޮތުގައި، މި އުޅަނދު އަތުލައިގަތީ ޖާސޫސީ އަދި އޮޕަރޭޝަނަލް ގޮތުން ހިންގި ވަރަށް ކޮމްޕްލެކްސް ނުވަތަ އުނދަގޫ ހަރަކާތްތަކަކަށް ފަހުގަ އެވެ.

އެ ފައުޖުން ނެރުނު ބަޔާނުގައި ބުނެފައިވަނީ، ދުނިޔޭގެ އެންމެ ކުރިއަރާފައިވާ ކަނޑުއަޑީގެ ޓެކްނޮލޮޖީ ބޭނުންކޮށްފައިވާ މި އުޅަނދަކީ 2025 ވަނަ އަހަރު އެމެރިކާގެ ޓެރަރިސްޓް އަސްކަރިއްޔާއާ ހަވާލުކުރި އުޅަނދެއް ކަމަށެވެ.

އަތުލައިގަތް އެމެރިކާގެ މި ވަސީލަތުގެ ފޮޓޯތަކާއި ތަފްސީލީ ވީޑިއޯ ކުރިއަށް އޮތް ގަޑިތަކުގެ ތެރޭގައި އާންމުކުރާނެ ކަމަށް އައި.އާރް.ޖީ.ސީ އިން ވަނީ ބުނެފަ އެވެ.

އީރާނުގެ ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، އަތުލައިގަނެފައިވަނީ "ޑައިވް-އެލްޑީ" (Dive-LD) ނަމަކަށް ކިޔާ ސިސްޓަމެކެވެ. މިއީ އެމެރިކާގެ ޑިފެންސް ޓެކްނޮލޮޖީ ކުންފުންޏެއް ކަމަށްވާ "އެންޑްރިލް އިންޑަސްޓްރީޒް" އިން އުފައްދައި، 2025 ވަނަ އަހަރު އެމެރިކާގެ ކަނޑުގެ ސިފައިންގެ "އަންމޭންޑް އަންޑަސީ ވެހިކަލް ގްރޫޕް 1" އާ ފުރަތަމަ ހަވާލުކުރި، އަމިއްލައަށް ދަތުރުކުރުމުގެ ގާބިލުކަން ލިބިފައިވާ ކަނޑުއަޑީގެ އުޅަނދެކެވެ.

މި އުޅަނދުގެ ދިގުމިނުގައި ގާތްގަނޑަކަށް 5.8 މީޓަރު ހުންނައިރު، ފުޅާމިނުގައި 1.2 މީޓަރު އަދި ބަރުދަނުގައި ގާތްގަނޑަކަށް 2.7 ޓަނު ހުރެ އެވެ.

މި އުޅަނދާ ބެހޭގޮތުން އާންމުކޮށްފައިވާ މައުލޫމާތުތަކަށް ބަލާއިރު، ކަނޑުއަޑީގައި މެދުނުކެނޑި 10 ދުވަސް ވަންދެން އޮތުމުގެ ގާބިލުކަން ލިބިފައިވާ މި އުޅަނދަށް ކަނޑުގެ 6،000 މީޓަރު އަޑިއަށް ފީނުމުގެ ގާބިލުކަން ލިބިގެންވެ އެވެ.

މޮޑިއުލާ އަމިއްލަ ޕްލެޓްފޯމެއްގެ ގޮތުގައި ފަރުމާކޮށްފައިވާ "ޑައިވް-އެލްޑީ" އަކީ ޖާސޫސީ މައުލޫމާތު އެއްކުރުމާއި، ފާރަވެރިވުމާއި، ކަނޑުގެ އަޑީގެ ޗާޓު ކުރެހުމާއި، އިންފްރާސްޓްރަކްޗަރ ބެލެހެއްޓުމުގެ އިތުރުން ކަނޑުއަޑީގެ މައިން ނައްތާލުމުގެ މަސައްކަތްތަކަށް ބޭނުންކުރެވޭ ގޮތަށް ތައްޔާރުކޮށްފައިވާ އުޅަނދެކެވެ.

މި އުޅަނދު އަތުލައިގަނެފައިވަނީ ދުނިޔޭގެ އެންމެ އިސްތިރާޖީ މުހިންމު އެއް ސަރަހައްދު ކަމަށްވާ ހުރްމުޒް ކަނޑުއޮޅީގެ މައްސަލައިގައި އީރާނާއި އެމެރިކާއާ ދެމެދު ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.

ވޭތުވެދިޔަ ދިހަ އަހަރުގެ ތެރޭގައި އީރާނުގެ ފައުޖުތަކުން ވަނީ އެމެރިކާގެ އަގުބޮޑު އެތައް ވަސީލަތްތަކެއް ވައްޓާލައި ނުވަތަ އަތުލައިގަނެފަ އެވެ. އޭގެ ތެރޭގައި އާރް.ކިއު-170 ސެންޓިނަލް ސްޓެލްތު ޑްރޯންއާއި، އެމް.ކިއު-9 ރީޕަރ ޑްރޯންތަކުގެ އިތުރުން، ފާރިސީ ކަނޑުއޮޅިން އަތުލައިގަތް ކަނޑުއަޑީގެ އެކި އުޅަނދުތަކާއި ކަނޑުމަތީގެ އުޅަނދުތައް ހިމެނެ އެވެ.

އަތުލައިގަނެވޭ މިފަދަ ޓެކްނޮލޮޖީތައް ބަލައިގެން އަމިއްލައަށް އުފެއްދުމުގެ މަސައްކަތަކީ، އީރާނުގެ އަމިއްލަ ޑްރޯން އަދި ކަނޑުއަޑީގެ އުޅަނދުތައް އުފެއްދުމުގެ ޕްރޮގްރާމްތައް ހަލުވިކުރުމުގައި ތާރީޚީ ގޮތުން ބޮޑު ދައުރެއް އަދާކޮށްފައިވާ ކަމެކެވެ.