އިރާނުން އެމެރިކާގެ އެމް.ކިއު-1 މަރުކާގެ ޑްރޯންއެއް އަނެއްކާވެސް ވައްޓާލައިފި

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އެއަރޯސްޕޭސް ފޯސް އިން، ހުރްމުޒް ކަނޑުއޮޅި މަތިން ދަތުރުކުރަމުންދިޔަ އެމެރިކާ އަސްކަރިއްޔާގެ އެމް.ކިއު-1 މަރުކާގެ އިތުރު ޑްރޯންއެއް ހުއްޓުވައި ގޮއްވާލައިފި އެވެ.

މިކަމާ ގުޅޭގޮތުން އައި.އާރް.ޖީ.ސީ އިން ހޯމަ ދުވަހު ނެރުނު ބަޔާނެއްގައި ބުނެފައިވަނީ، އެމެރިކާގެ މި އުޅަނދު ވައްޓާލާފައިވަނީ އިރާނުގެ އިންޓަގްރޭޓެޑް އެއަރ-ޑިފެންސް ނެޓްވޯކުގެ ދަށުން ހިންގާ އެއަރޯސްޕޭސް ފޯސްގެ އާ ވައިގެ ދިފާއީ ނިޒާމެއް ބޭނުންކޮށްގެން ކަމަށެވެ.

Advertisement

މެދު މިންވަރެއްގެ އުސްމިނެއްގައި ގިނަ ވަގުތު އުދުހުމުގެ ގާބިލުކަން ލިބިފައިވާ މި ޑްރޯންއަކީ، އަފްޣާނިސްތާނުގެ މަތިން 20،000 ގަޑިއިރުގެ އުދުހުންތައް ފުރިހަމަކޮށް "ބުޗަރ އޮފް ކަންދަހާރު" ނުވަތަ ކަންދަހާރުގެ ގާތިލުގެ ނަމުން މަޝްހޫރުވެފައިވާ އުޅަނދެކެވެ.

އެމެރިކާގެ ކަނޑުގެ ސިފައިންނާއި ވައިގެ ސިފައިން ބޭނުންކުރާ އުޅަނދުތަކުގެ ތެރެއިން މި މަރުކާގެ ޑްރޯންތައް މީގެ އަހަރުތަކެއް ކުރިން އުނިކޮށް، އޭގެ ބަދަލުގައި އެމް.ކިއު-9 މަރުކާގެ ޑްރޯންތައް ވަނީ ބޭނުންކުރަން ފަށާފަ އެވެ.

އެމެރިކާގެ އަސްކަރިއްޔާއިން އަލުން މި ޑްރޯން ބޭނުންކުރަން ފަށާފައިވަނީ، އިރާނުގެ ދިފާއީ ހަމަލާތަކުގައި އެމެރިކާގެ އެމް.ކިއު-9 މަރުކާގެ ގިނަ އަދަދެއްގެ ޑްރޯންތަކެއް ސުންނާފަތިވުމާ ގުޅިގެން ކަމަށް ބެލެވެ އެވެ.

އެމެރިކާގެ ކޮންގްރެޝަނަލް ބަޖެޓް އޮފީހުން ކަށަވަރުކޮށްދީފައިވާ ގޮތުގައި، އެމެރިކާ އާއި އިސްރާއީލުން އިރާނާ ދެކޮޅަށް ފަހުގެ އުދުވާނުތައް ފެށި ފެބްރުއަރީ މަހުގެ 28 ވަނަ ދުވަހުން ފެށިގެން މިހާތަނަށް އެމް.ކިއު-9 ރީޕަރ މަރުކާގެ މަދުވެގެން 24 ޑްރޯން ވަނީ ގެއްލިފަ އެވެ. އެ އޮފީހުން އާންމުކުރި ހިސާބުތަކަށް ބަލާއިރު، މި ގެއްލުންތަކުގެ އަގު ގާތްގަނޑަކަށް 720 މިލިއަން އެމެރިކާ ޑޮލަރަށް އަރަ އެވެ.

ނަމަވެސް، އިރާނުގެ އައި.އާރް.ޖީ.ސީ އިން ހާމަކުރާ ގޮތުގައި އެމެރިކާއަށް ގެއްލުނު ޑްރޯންތަކުގެ އަދަދު އުޅެނީ 53 ގަ އެވެ.

މީގެ އިތުރުން، އެމް.ކިއު-4ސީ ޓްރައިޓަން މަރުކާގެ ޑްރޯންއެއްވެސް ގޮއްވާލާފައިވާކަން އެމެރިކާގެ ބަޖެޓް އޮފީހުން ވަނީ ކަށަވަރުކޮށްދީފަ އެވެ. މި އުޅަނދު ހަލާކުވުމުން ލިބުނު ގެއްލުން ގާތްގަނޑަކަށް 150 މިލިއަން ޑޮލަރަށް އަރާނެ ކަމަށް ލަފާކުރެވެ އެވެ.

މި ރިޕޯޓާ ގުޅޭގޮތުން ދިރާސާކުރާ ފަރާތްތަކުން ބުނާ ގޮތުގައި، އެމެރިކާގެ ޑިޕާޓްމަންޓް އޮފް ވޯ އަށް ޑްރޯންތަކުގެ ދާއިރާއިން މިހާ ބޮޑު ގެއްލުމަކާ ކުރިމަތިލާން ޖެހުނީ، އިރާނުގެ ވައިގެ ސަރަހައްދު ހިމާޔަތްކުރުމުގައި އެ ގައުމުން ހޯދާފައިވާ ބޮޑު ކާމިޔާބީގެ ސަބަބުންނެވެ.

އެމް.ކިއު-1 މަރުކާގެ ޑްރޯން ވައްޓާލާފައި މިވަނީ، ހުރްމުޒް ކަނޑުއޮޅި މަތިން ދަތުރުކުރި އެމެރިކާގެ ކުރިއަރާފައިވާ "އޯބިޓަރ" ރިކޮނަސަންސް ޑްރޯންއެއް ގޮއްވާލާފައިވާ ކަމަށް އިރާނުގެ އަސްކަރިއްޔާއިން އާދީއްތަ ދުވަހު އިއުލާނުކޮށްފައި ވަނިކޮށެވެ.

އިރާނުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އޯބިޓަރ ޑްރޯންއަށް ހަމަލާދީ ބިމާ ހަމަކޮށްލާފައިވަނީ އިރާނުގެ އިރުދެކުނު ސަރަހައްދުގައި ގާއިމުކޮށްފައިވާ އެ ގައުމުގެ އަމިއްލަ އުފެއްދުމެއް ކަމަށްވާ ވައިގެ ދިފާއީ ނިޒާމުތަކުން ކަމަށެވެ.

އެމެރިކާއިން ހިންގާ އުދުވާނުތަކާއި ބައިނަލްއަގުވާމީ ގާނޫނުތަކާ ޚިލާފު އަމަލުތަކަށް ރައްދު ދިނުމުގެ ގޮތުންނާއި، އުދުވާނު ހިންގާ ފަރާތްތަކަށް އެހީތެރިވާ ފަރާތްތަކާ ދެކޮޅަށް ފިޔަވަޅު އެޅުމުގެ ގޮތުން އިރާނުން ވަނީ އެ ސަރަހައްދުގެ ކަނޑުގެ މަގުތައް ބަންދުކޮށްފަ އެވެ.

އިރާނުން ބުނެފައިވަނީ، ސަރަހައްދީ ކަނޑުގެ ކަންކަމުގެ ތެރެއަށް އެމެރިކާއިން ވަދެގަތުން ހުއްޓާލަންދެން، އެ ގައުމުން ބަންދުކޮށްފައިވާ ކަނޑުގެ މަގުތައް އެގޮތުގައި ދަމަހައްޓާނެ ކަމަށެވެ.