ޔަމަނުގައި ހަނގުރާމަ ފުޅާވެ ސައުދީގެ ވަރުގަދަ ހަމަލާތަކެއް، 24 ގަޑިއިރުތެރޭ 26 ތަނަށް ބޮންއެޅި

ޔަމަނުގައި ހިނގަމުންދާ ދާޚިލީ ހަނގުރާމަ އިތުރަށް ވަރުގަދަވެފައިވާ ދަނޑިވަޅެއްގައި، ވޭތުވެދިޔަ 24 ގަޑިއިރު ތެރޭގައި އެ ގައުމުގެ 26 ސަރަހައްދަކަށް ސައުދީ އަރަބިއްޔާއިން ހަމަލާދީފައިވާ ކަމަށް ޔަމަނުގެ ހޫޘީ ހަނގުރާމަވެރިން ބުނެފި އެވެ. ދެ ފަރާތުގެ މެދުގައި ހަމަލާ ބަދަލުކުރުން މިހާރު ވަރަށް ބޮޑަށް އިތުރުވެފައިވާ ކަމަށް ރިޕޯޓުތައް ބުނެ އެވެ. ހޫޘީންގެ ކޮންޓްރޯލް އޮންނަ އެކި ސަރަހައްދުތަކުގައި ހުރި އެ ޖަމާއަތުގެ މަގާމުތަކަށް އަމާޒުކޮށް، ހަމައެކަނި ވޭތުވެދިޔަ ހަފުތާގެ ތެރޭގައި ވެސް ސައުދީ އަރަބިއްޔާއިން 300 އަށްވުރެ ގިނަ ހަމަލާ ދީފައިވާ ކަމަށް އެ ޖަމާއަތުން ހުކުރު ދުވަހު ބުނެފައިވާ ކަމަށް އޭއެފްޕީން ރިޕޯޓްކުރެ އެވެ.

މި ހަފުތާގެ ތެރޭގައި ހަނގުރާމަ ވަރުގަދަވި އެތައް ފްރަންޓެއްގެ ތެރެއިން އެއް ސަރަހައްދު ކަމަށްވާ ތާއިޒް ޕްރޮވިންސްގެ އަލް-ވަޒީއިއްޔާ ސަރަހައްދުގައި ހިނގި ކުރިމަތިލުންތަކުގައި، ހޫޘީންގެ 30 ހަނގުރާމަވެރިން މަރާލައި، 60 އަށްވުރެ ގިނަ މީހުން ޒަޚަމްކޮށްލާފައިވާ ކަމަށް ސައުދީ އަރަބިއްޔާގެ އެހީތެރިކަން ލިބޭ ޔަމަނުގެ ސަރުކާރުން ހުކުރު ދުވަހު ވަނީ ހާމަކޮށްފަ އެވެ. ދެ ފަރާތުގެ މެދުގައި މި ގޮތަށް ހަމަލާތައް ބަދަލުކުރަން ފަށާފައި މި ވަނީ، ޔަމަނުގެ ސަރުކާރުގެ އަސްކަރިއްޔާއާއި ހޫޘީ ހަނގުރާމަވެރިންނާ ދެމެދު ކުރިއަށްދާ ހަނގުރާމަ މުޅި ގައުމަށް ފެތުރި، މަސްރަހު ގޯސްވެފައި ވަނިކޮށެވެ. މީގެ އިތުރުން، މި ހަފުތާގެ ކުރީކޮޅު ސަރުކާރާއި ހޫޘީންނާ ދެމެދު ބަދަލުކުރި ވަރުގަދަ ހަމަލާތަކުގައި، ތިން ކުޑަކުދިން ހިމެނޭހެން މަދުވެގެން ފަސް މީހުން މަރުވެފައިވާ ކަމަށް ދެ ފަރާތުގެ ރިޕޯޓްތަކުން ކަށަވަރުކޮށްދެ އެވެ.

Advertisement

ހޫޘީން ފޮނުވާލި ޑްރޯންއެއް ވައްޓާލުމުގެ ތެރޭގައި ތާއިފް ގަވަރުނަރޭޓުން އެކަކު މަރުވެފައިވާ ކަމަށް ސައުދީ އަރަބިއްޔާއިން ވަނީ ބުނެ އެވެ. ހަމަމިއާއެކު، ސައުދީ އަރަބިއްޔާއިން ތާއިޒް އަދި އަބްސް އަވަށަށް ދިން ހަމަލާތަކުގައި ބަޔަކު މަރުވެފައިވާ ކަމަށް ހޫޘީންނާ ގުޅުންހުރި މީޑިއާތަކުން ރިޕޯޓްކޮށްފައިވެ އެވެ.

އިސްތިރާޖީ ގޮތުން މުހިންމު ބާބު އަލް-މަންދަބް ކަނޑުއޮޅި ހިމެނޭހެން، ޔަމަނުގެ ރަތް ކަނޑުގެ އައްސޭރިފަށުގެ ބޮޑު ސަރަހައްދެއް ހޫޘީންގެ ބާރުގެ ދަށަށް ގެންގޮސްފައިވާ ދަނޑިވަޅެއްގައި، އީރާނުގެ މަދަދު ލިބޭ އެ ޖަމާއަތަށް ތާއީދުކޮށް އަދި ސައުދީ އަރަބިއްޔާއާ ދެކޮޅަށް އަޑުއުފުލުމަށް ހުކުރު ދުވަހު ވެރިރަށް ސަންޢާގެ މަގުތަކަށް އެތައް ހާސް ބަޔަކު ވަނީ ނުކުމެ އެވެ.

މި ހަމަލާތައް ވަރުގަދަވުމާ ގުޅިގެން، ބޭނުން ނުވި ނަމަވެސް އެމެރިކާއަށް ވެސް ވަނީ މި މައްސަލައިގެ ތެރެއަށް ވަންނަން މަޖުބޫރުވެފަ އެވެ. ހޫޘީން ހޯދަމުންދާ އަވަސް ކުރިއެރުންތަކާއެކު، ދުނިޔޭގެ ވިޔަފާރީގެ މުހިންމު މަގަކަށްވާ ބާބު އަލް-މަންދަބް ކަނޑުއޮޅިން ދަތުރުކުރާ އުޅަނދުތަކަށް ނުރައްކާވެދާނެތީ، އެމެރިކާގެ އޮފިޝަލުން ވަނީ އޮމާންގެ ވެރިރަށް މަސްގަތުގައި ހުންނަ އެމެރިކާ އެމްބަސީގައި ހޫޘީންގެ މަންދޫބުންނާ މިދިޔަ ހަފުތާ ބަންދުގައި ބައްދަލުކޮށްފަ އެވެ. މި ބައްދަލުވުމުގައި، ސައުދީ އަރަބިއްޔާއާ ގުޅުމެއް ނެތް އުޅަނދުތަކަށް ހަމަލާ ނުދޭނެ ކަމުގެ ޔަގީންކަން ހޫޘީން އެމެރިކާއަށް ދީފައިވާ ކަމަށް ރިޕޯޓްތައް ބުނެ އެވެ.

ހޫޘީންނަށް ސީދާ ހަމަލާ ދިނުމަށް ސައުދީ އަރަބިއްޔާއިން އެމެރިކާގެ ރައީސް ޑޮނަލްޑް ޓްރަމްޕްގެ އަރިހުން އެދެމުންދިޔަ ނަމަވެސް، އީރާނާއެކު ބޮޑު ހޭދައެއް ހިނގާ ހަނގުރާމައެއް ކުރަމުންދާ މި ދަނޑިވަޅުގައި އިތުރު ފްރަންޓެއް ހުޅުވަން ބޭނުން ނުވާތީ، ވައިޓް ހައުސްއިން މިހާތަނަށް ވަނީ އެ ކަމަށް ފަސްޖެހިފަ އެވެ.

މި ދަނޑިވަޅުގައި، ރަތް ކަނޑުގެ މަސްރަހު ގޯސްވަމުންދާތީ އެ ސަރަހައްދުގައި ހަރަކާތްތެރިވާ ވިލާތުގެ އިއްތިހާދުގެ (އީޔޫ) ކަނޑުގެ ސިފައިންގެ މިޝަން "އޮޕަރޭޝަން 'އޭސްޕީޑީސް' ގެ އެލާޓް ލެވެލް ނުވަތަ ތައްޔާރީ ހާލަތު މަތިކޮށްފައިވާ ކަމަށް އެ އިއްތިހާދުގެ ޚާރިޖީ ސިޔާސަތާ ބެހޭ ވެރިޔާ ކާޔާ ކައްލާސް ހުކުރު ދުވަހު ވިދާޅުވި އެވެ. "ސައުދީ އަރަބިއްޔާއަށް ހޫޘީން ދޭ ހަމަލާތަކަކީ ބަލައިގަނެވޭނެ ކަންކަމެއް ނޫން، އަދި، މިއީ ދުނިޔޭގެ އިގްތިސާދަށް ދޭ ގެއްލުމެއް،" ކައްލާސް ވިދާޅުވި އެވެ.

މީގެ އިތުރުން، ޔަމަނުގެ ހަނގުރާމަ ހުއްޓުވުމަށް ކުރެވޭ ސިޔާސީ މަސައްކަތްތަކާ ބެހޭގޮތުންނާއި، ހުރްމުޒް ކަނޑުއޮޅީގައި ދަތުރުފަތުރުގެ މިނިވަންކަން އަލުން ގާއިމުކުރުމާ ގުޅޭގޮތުން ސައުދީ އަރަބިއްޔާގެ ޚާރިޖީ ވަޒީރު އަމީރު ފައިސަލް ބިން ފަރްހާން އަލް ސައޫދާ ވާހަކަފުޅު ދައްކަވާފައިވާ ކަމަށް ވެސް ކައްލާސް ވިދާޅުވި އެވެ.