އިޓަލީވިލާތުގެ މަދަރުސާތަކުގައި ބުރުގާއާއި ހިޖާބު މަނާކޮށް، ބޭރު ދަރިވަރުންގެ އަދަދު މަދުކުރަނީ
21 ސެޕްޓެމްބަރު 2026 | ހޯމަ 05:11އިޓަލީގެ މަދަރުސާތަކުގައި ބުރުގާއާއި ހިޖާބު އެޅުން މަނާކޮށް، ކްލާސްތަކުގައި ބޭރު ދަރިވަރުން ތިބެވޭނެ ވަކި އަދަދެއް ކަނޑައެޅުމަށް އެ ގައުމުގެ ސަރުކާރުން ދަނީ ތައްޔާރުވަމުން. މީގެ އިތުރުން، އިޓަލީ ބަހަށް ނުފަރިތަ ދަރިވަރުންގެ ބެލެނިވެރިން އެ ބަސް ދަސްކުރުން ލާޒިމުކުރުމަށް ނިންމާފައިވާއިރު، މިއީ ގައުމީ ވަންތަކަން ދެމެހެއްޓުމަށް އަޅާ ފިޔަވަޅެއް ކަމަށް ބޮޑުވަޒީރު މެލޯނީ ވިދާޅުވި
ވިލާތުގެ ގައުމެއްގެ މަގެއްގެ މަތިން ބުރުގާ އަޅައިގެން ތިބި ދެ އަންހެނަކު ހިނގާފައި ދަނީ | ރޮއިޓާސް
އިޓަލީވިލާތުގެ މަދަރުސާތަކުގައި ތައުލީމު ހާސިލުކުރާ ބޭރު ގައުމުތަކުގެ ދަރިވަރުންގެ އަދަދަށް ގާނޫނީ ލިމިޓެއް ކަނޑައެޅުމަށާއި، އެ ތަންތަނުގައި ބުރުގާއާއި ހިޖާބު އެޅުން މަނާކުރުމަށް ފިޔަވަޅުތަކެއް އެކުލަވައިލަމުން ގެންދާ ކަމަށް، އެ ގައުމުގެ ބޮޑުވަޒީރު ޖޯޖިޔާ މެލޯނީ ހާމަކުރައްވައިފި އެވެ.
މެލޯނީ ނިސްބަތްވެވަޑައިގަންނަވާ 'ބްރަދާސް އޮފް އިޓަލީ' (އެފްޑީއައި) ޕާޓީގެ ޒުވާނުންގެ ގޮފިން އިންތިޒާމުކުރި ގައުމީ ފެސްޓިވަލް، 'ފީނިކްސް' ގައި ވާހަކަފުޅު ދައްކަވަމުން މެލޯނީ ވިދާޅުވީ، "ކްލާސްރޫމްތަކުގައި ތިބޭ އިޓަލީގެ ދަރިވަރުންނަށް އެ ކުދިންނަކީ މައިނޯރިޓީއޭ ހިތަށް އެރުމުގެ ފުރުސަތު އޮވެގެން ނުވާނެ" ކަމަށެވެ. އަދި، "އިޓަލީގެ ކްލާސްރޫމެއްގައި، އިޓަލީގެ ކުދިން އެއީ މައިނޯރިޓީއަށްވެ، އެ ކުދިން ދަށްކޮށްލެވުމަކީ އެއްވެސް ހާލެއްގައި ހިތަށް ގެނެވޭނެ މަންޒަރެއް ނޫން. އެކަމެއް ނުކުރެވޭނެ،" މެލޯނީ ވިދާޅުވި އެވެ.
މަދަރުސާތަކުގައި ބުރުގާއާއި ހިޖާބު އެޅުން ސަރުކާރުން މަނާކުރާނެ ކަމަށް މެލޯނީ ވަނީ ވިދާޅުވެފަ އެވެ. އަދި، މަދަރުސާގެ ނިޒާމުގެ ތެރެއަށް ހޭނުމުގައި ދަތިތައް ކުރިމަތިވާ ބޭރުގެ ދަރިވަރުންގެ ބެލެނިވެރިން، އިޓަލީވިލާތުގެ ބަސް ދަސްކުރުން ލާޒިމުކުރެވޭނެ ކަމަށް ވެސް އޭނާ ފާހަގަކުރެއްވި އެވެ. މި ފިޔަވަޅުތައް ވަރަށް އަވަހަށް ވަޒީރުންގެ މަޖިލީހަށް ހުށަހެޅޭނެ ކަމަށް ވެސް މެލޯނީ ވިދާޅުވި އެވެ.
އާންމު ތަންތަނުގައި މޫނު ނިވާވާ ގޮތަށް ބުރުގާއެޅުން މަނާކުރުމަށް، އިޓަލީ ވިލާތުގެ ކަނާތުފިޔައިގެ ޕޮޕިއުލިސްޓް 'ލެގާ' ޕާޓީން ހުސްވި އަހަރު ވަނީ ހުށަހަޅައިފަ އެވެ.
މެންބަރު ގައުމުތަކުގެ ދައުލަތުގެ އިދާރާތަކުގައި މަސައްކަތްކުރާ މުވައްޒަފުން، ބޮލުގައި އަޅާ ފޮތިގަނޑު (ހެޑްސްކާފް) ފަދަ ދީނީ ރަމްޒުތައް ބޭނުންކުރުން މަނާކުރުމުގެ އިހުތިޔާރު އެ އިދާރާތަކަށް ލިބިގެންވާ ކަމަށް، ވިލާތުގެ އިއްތިހާދުގެ (އީޔޫ) އެންމެ މަތީ ކޯޓުން 2023 ވަނަ އަހަރު ވަނީ ނިންމާފަ އެވެ. ކޯޓް އޮފް ޖަސްޓިސް އޮފް ދި ޔޫރަޕިއަން ޔޫނިއަންއިން (ސީޖޭއީޔޫ) ބުނީ، ވަކި ފަރާތަކަށް ނުޖެހޭ އިދާރީ މާހައުލެއް ގާއިމުކުރުމަށް އަމާޒުކޮށް ހިންގާ ހަރުދަނާ އުސޫލުތަކަކީ، ސައްހަ މަގުސަދެއްގެ މައްޗަށް ބިނާވެގެންވާ އަދި އިންސާފުވެރި ނިންމުމެއް ކަމުގައި ބެލެވިދާނެ ކަމަށެވެ.
މީގެ އިތުރުން، ދީނީ ގޮތުން ފާޅުވާ ރަމްޒުތައް ބޭނުންކުރުމުގެ ހުއްދަ، ވަކި ތަފާތުކުރުމެއް ނެތި އާންމު އުސޫލަކުން ދިނުމަށް ދައުލަތުގެ އެހެން އިދާރާއަކުން ނިންމި ނަމަވެސް، އެ ނިންމުމަކީ ވެސް އިންސާފުވެރި ނިންމުމެއް ކަމަށް އެ ކޯޓުން ވަނީ ބަޔާންކޮށްފަ އެވެ.
ދައުލަތުގެ ޚިދުމަތްތައް ވަކި ފަރާތަކަށް ނުޖެހޭ ގޮތަށް ބައްޓަންކުރުމުގައި މެންބަރު ގައުމުތަކުގެ އިދާރާތަކަށް އިޚުތިޔާރީ ދާއިރާއެއް ލިބިގެންވާ ކަމަށް ކޯޓުން ފާހަގަކުރި އެވެ. ނަމަވެސް، މި އަމާޒަށް ވާސިލުވާންވާނީ އެއްގޮތް އަދި ނިޒާމީ އުސޫލަކުން ކަމަށާއި، އަޅާ ފިޔަވަޅުތައް ވާންވާނީ ކޮންމެހެން އަޅަންޖެހޭ މިންވަރަށް ހަނިކުރެވިފައިވާ ފިޔަވަޅުތަކަކަށް ކަމަށް ވެސް ކޯޓުން ބުނެފައިވެ އެވެ.
މަސްދަރު: ޓީއާރްޓީ ވަރލްޑް
