އީޔޫގެ މިޝަނަށް އިންތިޒާރު ނުކޮށް އިޓަލީވިލާތުން ބާބުލް މަންދަބަށް މަނަވަރުތައް ފޮނުވަނީ
18 ސެޕްޓެމްބަރު 2026 | ހުކުރު 04:33ރަތް ކަނޑުގެ ސަލާމަތީ ހާލަތު ވަޒަންކޮށް، އިޓަލީގެ ވިޔަފާރި އުޅަނދުފަހަރަށް ރައްކާތެރިކަމާއެކު ދަތުރުކުރެވޭނެ އަމިއްލަ ޕްލޭނެއް އެކުލަވާލުމަށް އެ ޤައުމުގެ އަސްކަރިއްޔާއަށް މިހާރު ވަނީ އަންގާފައި. ދަތުރުތައް ލަސްވުމުގެ ސަބަބުން އިޤްތިޞާދަށް ލިބޭ ގެއްލުންތައް ކުޑަކުރުމަށް ޓަކައި، ވިލާތުގެ އިއްތިހާދުގެ ނިންމުންތަކަށް އިންތިޒާރު ކުރުމެއް ނެތި މި ފިޔަވަޅު އެޅުމަށް އިޓަލީން ދަނީ ތައްޔާރުވަމުން
އިޓަލީވިލާތުގެ އަސްކަރީ. މަނަވަރެއް | އަނަދޮލޫ
ވިލާތުގެ އިއްތިހާދުގެ (އީޔޫ) ކަނޑުގެ އަސްކަރީ މިޝަނަށް އިންތިޒާރު ކުރުމުގެ ބަދަލުގައި، ބާބުލް މަންދަބު ކަނޑުއޮޅިން އެ ޤައުމުގެ ވިޔަފާރި އުޅަނދުފަހަރަށް ދަތުރުކުރެވޭނެ މަގު ފަހިކުރުމަށް އިޓަލީވިލާތުން އަމިއްލައަށް ފިޔަވަޅު އަޅަން ތައްޔާރަށް އޮތް ކަމަށް، އެ ޤައުމުގެ ދިފާޢީ ވަޒީރު ގުއީޑޯ ކްރޮސެއްޓޯ ބުރާސްފަތި ދުވަހު ހާމަކުރައްވައިފި އެވެ.
އިސްތިރާޖީ ގޮތުން މުހިންމު ރަތް ކަނޑުން ރައްކާތެރިކަމާއެކު ދަތުރުކުރެވޭނެ ޕްލޭނެއް އެކުލަވާލުމަށާއި، ސަލާމަތީ ހާލަތު ވަޒަންކުރުމަށް އަސްކަރީ އިސް އޮފިޝަލުންނަށް އަންގަވާފައިވާނެ ކަމަށް ކްރޮސެއްޓޯ ވިދާޅުވި ކަމަށް އިޓަލީވިލާތުގެ އޭއެންއެސްއޭ ނޫހުން ރިޕޯޓުކުރި އެވެ.
"ޗީފް އޮފް ޖެނެރަލް ސްޓާފާއެކު އަޅުގަނޑުމެން މި ނިންމީ، އުޅަނދުފަހަރަށް ދަތުރުކުރެވޭނެތޯ ނުވަތަ ނޫންތޯ ކަނޑައެޅުމުގައި (އީޔޫގެ ރަތް ކަނޑުގެ އޮޕަރޭޝަން) އޭސްޕުޑީސްއިން ގޮތެއް ނިންމަންދެން އިންތިޒާރު ނުކުރުމަށް،" ކްރޮސެއްޓޯ ވިދާޅުވި އެވެ.
ވިލާތުގެ އިޖުރާތުތަކަށް އިންތިޒާރު ކުރުމެއް ނެތި، އެ ޤައުމުގެ އުޅަނދުފަހަރަށް އަލުން ދަތުރުތައް ފެށޭނެ ފަދަ ފިޔަވަޅުތަކެއް އިޓަލީވިލާތުން އެޅުމުގެ ފުރުސަތު ބޮޑު ކަމަށް ކްރޮސެއްޓޯ ވިދާޅުވި އެވެ. ދަތުރުތައް ލަސްވުމަކީ އިޤްތިޞާދަށް އިތުރު ގެއްލުންތަކެއް ލިބޭނެ ކަމެއް ކަމަށް ވެސް އޭނާ ފާހަގަކުރެއްވި އެވެ.
އިޓަލީވިލާތުގެ އަސްކަރީ މަނަވަރު 'ބާގަމީނީ' މި ވަގުތު އެފްރިކާގެ ޤައުމެއް ކަމަށްވާ ޖިބޫޓީގައި އޮތްއިރު، އިޓަލީވިލާތުގެ ދިދަ ނަގާފައިވާ ނުވަތަ އެ ޤައުމުގެ މިލްކުވެރިކަން އޮތް 12 ވަރަކަށް ވިޔަފާރި އުޅަނދުން ރައްކާތެރިކަމާއެކު ދަތުރުކުރުމަށް އަސްކަރީ އެހީތެރިކަމަށް އެދެމުންދާ ކަމަށް އޭއެންއެސްއޭއިން ރިޕޯޓުކޮށްފައިވެ އެވެ.
ސަރަޙައްދުގައި މިހާރު ވެސް ހަރަކާތްތެރިވަމުންދާ އިޓަލީވިލާތުގެ އަސްކަރީ ވަސީލަތްތައް ވަގުތީ ގޮތުން ޤައުމީ ކޮމާންޑުގެ ދަށަށް ގެނައުމުގެ ހުއްދަ މިހާރު އަމަލުކުރަމުންދާ ޤަވާއިދުތަކުން ލިބޭތޯ، ނުވަތަ ގާނޫނުހަދާ މަޖިލީހުގެ އާ ހުއްދައެއް ހޯދަން ޖެހޭނެތޯ ކަމާބެހޭ އިދާރާތަކުން ބަލަމުންދާ ކަމަށް ވަޒީރު ވިދާޅުވި އެވެ. "ކަނޑުގެ ދަތުރުފަތުރުގެ މަގުތައް ހުއްޓުމަކަށް އައުމުން، މުދާ ލިބުން ލަސްވެ، ޚަރަދުތައް އިތުރުވެ، އާއިލާތަކަށާއި ވިޔަފާރިތަކަށް އުފުލަންޖެހޭ އަގުތައް މައްޗަށް އުފުލިގެންދޭ،" ކްރޮސެއްޓޯ ވިދާޅުވި އެވެ.
މަސްދަރު: އަނަދޯލް އޭޖެންސީ
