ހޫޘީން ސައުދީއަށާއި ކަނޑު އުޅަނދުފަހަރަށް ދޭ ހަމަލާތައް އދގެ ސަލާމަތީ މަޖިލީހުން ކުށްވެރިކޮށްފި
19 ސެޕްޓެމްބަރު 2026 | ހޮނިހިރު 04:48ޔަމަނުގެ ހޫޘީން ސައުދީ އަރަބިއްޔާއަށާއި ރަތް ކަނޑުގެ އުޅަނދުފަހަރަށް ދޭ ހަމަލާތައް އދ. ގެ ސަލާމަތީ މަޖިލީހުން ކުށްވެރިކޮށް، އެ ގައުމުގެ އިންސާނީ ހާލަތު ގޯސްވަމުންދާތީ ކަންބޮޑުވުން ފާޅުކޮށްފި. މި މައްސަލައަށް ސިޔާސީ ހައްލެއް ހޯދުމަށް ގޮވާލައި، ހައްޔަރުކޮށްފައިވާ އދ. ގެ މުވައްޒަފުން މިނިވަންކުރުމަށާއި ހޫޘީންނަށް ހަތިޔާރު ލިބޭ މަގުތައް ބަންދުކުރުމަށް ވެސް އެ މަޖިލީހުން ވަނީ ބާރުއަޅާފައި
ޔަމަނުގެ ހޫޘީން ދިންކަމަށް ބުނާ ހަމަލާއެއްގައި އިމާރާތެއްގައި ރޯވި އަލިފާންގަނޑު ނިއްވައިލަން އަލިފާން ނިއްވާ ޓީމުތަކުން މަސައްކަތް ކުރަނީ | އެކްސް
ޔަމަނުގެ ހަތިޔާރުއެޅި ހޫޘީ ޖަމާއަތުން ސައުދީ އަރަބިއްޔާގެ އާންމުންނަށާއި ހަކަތަ އުފައްދާ މަރުކަޒުތަކަށް އަމާޒުކޮށް ދެމުންދާ ހަމަލާތައް، އދ. ގެ ސަލާމަތީ މަޖިލީހުން ކުށްވެރިކޮށްފަ އެވެ. އަންހެނުންނާއި ކުޑަކުދިން ހިމެނޭހެން އާންމުންގެ އެތައް ބަޔަކަށް އެކިވަރުގެ އަނިޔާތައް ލިބިފައިވާ މި ހަމަލާތައް ވަގުތުން ހުއްޓާލުމަށް ވެސް އެ މަޖިލީހުން ވަނީ ގޮވާލާފަ އެވެ.
މިދިޔަ އޯގަސްޓް މަހުގެ 7 ވަނަ ދުވަހު ނެރުނު ބަޔާނުގައި ވެސް ހޫޘީން ސައުދީ އަރަބިއްޔާއަށް ދޭ މިސައިލް ހަމަލާތަކާއި ވިޔަފާރި އުޅަނދުފަހަރަށް ދޭ ހަމަލާތައް ކުށްވެރިކޮށްފައިވާނެ ކަން މެންބަރުން ފާހަގަކުރެއްވި އެވެ. އަދި ރަތް ކަނޑާއި ބާބު އަލް-މަންދަބު ސަރަހައްދުން ދަތުރުކުރާ އުޅަނދުފަހަރަށް ދޭ ހަމަލާތަކާއި ކުރިމަތިކުރާ ބިރުދެއްކުންތައް ތަކުރާރުކޮށް ކުށްވެރިކުރައްވަމުން، އުޅަނދުފަހަރާއި އޭގެ ފަޅުވެރިންގެ ސަލާމަތްތެރިކަން ކަށަވަރުކުރުމުގެ މުހިންމުކަމުގެ މައްޗަށް މެންބަރުން ބާރުއެޅުއްވި އެވެ.
ހޫޘީން ކުރިއަށްގެންދާ "އަސްކަރީ ހަރަކާތްތައް ވަގުތުން ހުއްޓާލުމަށާއި" އާންމުންނަށާއި އާންމު ތަންތަނަށް ގެއްލުންވާ ގޮތަށް ދޭ ހަމަލާތައް ހުއްޓާލުމަށް ސަލާމަތީ މަޖިލީހުން ގޮވާލި އެވެ. ހަމަމިއާއެކު، މަޖިލީހުގެ މެންބަރުން ވަނީ ސައުދީ އަރަބިއްޔާއާއެކު ސާބިތުކަމާއެކު ތިބިކަން ހާމަކުރައްވައި، ބައިނަލްއަގުވާމީ ގާނޫނުތަކުގެ ދަށުން އަމިއްލަ ނަފްސުގެ ދިފާއުގައި ފިޔަވަޅު އެޅުމުގެ ހައްގު އެ ގައުމަށް ލިބިގެންވާކަން ކަށަވަރުކޮށްދެއްވާފަ އެވެ.
އދ. ގެ އޮފީސް ފޯ ދި ކޯޑިނޭޝަން އޮފް ހިއުމަނިޓޭރިއަން އެފެއާޒްއާ (އޯސީއެޗްއޭ) ހަވާލާދީ މަޖިލީހުގެ މެންބަރުން ވިދާޅުވީ، ސެޕްޓެންބަރު މަހުގެ ކުރީކޮޅުން ފެށިގެން ޔަމަނުގެ 125،000 އަށްވުރެ ގިނަ މީހުން ގެދޮރު ދޫކޮށް ގޮސްފައިވާ ކަމަށެވެ. އަދި، އާންމުން މަރުވެ އަނިޔާވަމުންދާ ރިޕޯޓްތަކާ މެދު ކަންބޮޑުވާކަން ހާމަކުރައްވައި، ހަމަލާތައް އިތުރަށް ވަރުގަދަވެއްޖެ ނަމަ އެ ގައުމުގެ އިންސާނީ ހާލަތު މިހާރަށްވުރެ ބޮޑަށް ގޯސްވެގެންދާނެ ކަމުގެ އިންޒާރު މެންބަރުން ދެއްވި އެވެ.
އދގެ ސަލާމަތީ މަޖިލީހުގެ މެންބަރުންގެ ބައްދަލުވުމެއްގެ ތެރެއިން | އަނަދޮލޫ
އިންސާނީ އެހީތެރިކަން ފޯރުކޮށްދިނުމުގައި އެއްވެސް ހުރަހެއް ނެތި، ރައްކާތެރިކަމާއެކު އަވަހަށް އެހީ ފޯރުކޮށްދެވޭނެ މަގު ފަހިކޮށްދިނުމަށް މެންބަރުން ގޮވާލެއްވި އެވެ. މީގެ އިތުރުން، ހައްޔަރުކޮށްފައިވާ އދ. ގެ 73 މުވައްޒަފުންނާއި، މަދަނީ ޖަމުއިއްޔާތަކާއި ޑިޕްލޮމެޓިކް މިޝަންތަކުގެ މުވައްޒަފުން އެއްވެސް ޝަރުތަކާ ނުލައި މިނިވަންކުރުމަށް ވެސް ވަނީ ގޮވާލާފަ އެވެ. އަދި، ހޫޘީންނަށް ހަތިޔާރާއި، ފަންނީ އެހީތެރިކަމާއި، ތަމްރީނާއި އަސްކަރީ ހަރަކާތްތަކަށް ބޭނުންވާ ފައިސާ ލިބުން ހުއްޓުވުމަށް ޓަކައި ޔަމަނުގެ ސަރުކާރާއެކު އަމަލީ ގޮތުން އެއްބާރުލުން ދިނުމަށް ސަލާމަތީ މަޖިލީހުން ގޮވާލުމުގެ އިތުރުން، ހަތިޔާރު އެތެރެކުރުން މަނާކޮށްފައިވާ އުސޫލުތަކަށް ހުރުމަތްތެރިކޮށް ހިތުމަށް ހުރިހާ މެންބަރު ގައުމުތަކަށް ވަނީ ހަނދާންކޮށްދީފަ އެވެ.
ޔަމަނުގެ އެއްބައިވަންތަކަމާއި، މިނިވަންކަމާއި، އިސްތިގުލާލު ދެމެހެއްޓުމަށް މަޖިލީހުން ކުރާ ތާއީދު އާކުރައްވަމުން، ދެމެހެއްޓެނިވި ސުލްހައަކީ "ބާރުގެ ބޭނުންކޮށްގެން ނުވަތަ ބިރުދައްކައިގެން ހާސިލްކުރެވޭނެ އެއްޗެއް ނޫން" ކަމަށް މެންބަރުން ވިދާޅުވި އެވެ. އަދި، ޔަމަނުގެ މައްސަލައަށް ސިޔާސީ ހައްލެއް ހޯދުމަށް އދ. ގެ ހާއްސަ މަންދޫބު ހާންސް ގްރުންޑްބާގް ކުރައްވާ މަސައްކަތްތަކަށް ތާއީދުކުރައްވައި، ހުރިހާ ފަރާތްތަކުން ވެސް އދ. ގެ މަސައްކަތްތަކަށް އެއްބާރުލުން ދިނުމަށް މެންބަރުން އިލްތިމާސްކުރެއްވި އެވެ.
ސަރަހައްދީ ނުތަނަވަސްކަން ބޮޑުވެފައިވާ މި ދަނޑިވަޅުގައި، ފާއިތުވި ދުވަސްތަކުގައި ހޫޘީން ވަނީ ސައުދީ އަރަބިއްޔާއަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ދީފަ އެވެ. އަދި، ޖުލައި މަހުގެ ކުރީކޮޅުން ފެށިގެން ޔަމަނުގެ ސަރުކާރު ފައުޖުތަކާއި ހޫޘީންނާ ދެމެދު ހިނގަމުންދާ ކުރިމަތިލުންތައް ވަނީ ވަރަށް ބޮޑަށް ވަރުގަދަވެފަ އެވެ. މި ކުރިމަތިލުންތައް އަލުން ފެށިފައި މި ވަނީ، އޭޕްރިލް 2022 ގައި އދ. މެދުވެރިވެގެން ގާއިމުކުރި ހަމަލާ ބަދަލުކުރުން ހުއްޓާލުމުގެ އެއްބަސްވުމަށްފަހު ގައުމަށް ލިބިފައިވާ އަމާން ދުވަސްތަކަކަށް ފަހުގަ އެވެ.
މަސްދަރު: އަނަދޯލް އޭޖެންސީ
