ޖަޕާނުގައި އުމުރުން 100 އަހަރުން މަތީގެ އާބާދީ ފުރަތަމަ ފަހަރަށް 100,000 އަށްވުރެ މައްޗަށް އަރައި އާ ރެކޯޑެއް
15 ސެޕްޓެމްބަރު 2026 | އަންގާރަ 08:38ޖަޕާނުގައި އުމުރުން 100 އަހަރުން މަތީގެ މީހުންގެ އަދަދު ލައްކައަކަށްވުރެ މައްޗަށް އަރައި އާ ރެކޯޑެއް ގާއިމުވެފައިވާއިރު، މީގެ ތެރޭގައި ގިނައީ އަންހެނުން. ދިގު އުމުރުގެ މީހުން ގިނަވުމަކީ އެ ގައުމުގެ ސިއްހީ ނިޒާމާއި ކާނާގެ ފެންވަރު ރަނގަޅުވުމުގެ ނަތީޖާ ނަމަވެސް، މަސައްކަތްކުރާ އުމުރުގެ މީހުން މަދުވެ އިގްތިސާދީ ގޮންޖެހުންތަކެއް ވަނީ ކުރިމަތިވެފައި
ޖަޕާނުގެ އޮސާކާގައި އުމުރުން ދުވަސްވީ ބަޔަކު ގިނަ އަދަދެއްގެ ފިހާރަތަކެއް ހުރި މަގެއްގައި ވިޔަފާރި ކުރަނީ | ގެޓީ އިމޭޖަސް
ފާއިތުވި އަހަރުތަކުގެ ތެރޭގައި ޖަޕާނުގެ އާބާދީ ދަށަށް ދިއުމުގެ މައްސަލަ ބޮޑުވެފައިވީ ނަމަވެސް، އެ ގައުމުގެ ވަކި އުމުރުފުރައެއްގެ މީހުންގެ އަދަދު އަންނަނީ ރެކޯޑް މިންވަރަކަށް އިތުރުވަމުންނެވެ. މި ގޮތުން، ދިގު އުމުރުގެ މީހުން ގިނަ ގައުމެއްގެ ގޮތުގައި މަޝްހޫރުވެފައިވާ ޖަޕާނުގައި، އުމުރުން 100 އަހަރުން މަތީގެ މީހުންގެ އަދަދު ފުރަތަމަ ފަހަރަށް 100,000 އަށްވުރެ މައްޗަށް އަރައި، މިހާރު ވަނީ އާ ރެކޯޑެއް ގާއިމުވެފަ އެވެ.
ސެޕްޓެންބަރު މަހުގެ ނިޔަލަށް އެ ގައުމުގައި އުމުރުން 100 އަހަރުން މަތީގެ މީހުންގެ އަދަދު 107,677 އަށް އަރާފައިވާ ކަމަށް، ޖަޕާނުގެ ސިއްހަތާ ބެހޭ ވުޒާރާއިން މިދިޔަ އަންގާރަ ދުވަހު އާންމުކުރި ތަފާސްހިސާބުތަކުން ދައްކަ އެވެ. މިއީ، ޖެހިޖެހިގެން މި އަދަދު އިތުރުވި 56 ވަނަ އަހަރު ކަމަށްވާއިރު، މިއީ އޭގެ ކުރީ އަހަރާ އަޅާބަލާއިރު ގާތްގަނޑަކަށް 8,000 މީހުންގެ އިތުރުވުމެއް ކަމަށް އެ ވުޒާރާއިން ބުނެ އެވެ. މީގެ އިތުރުން، މި އުމުރުފުރައިގެ ބޮޑު ބަޔަކީ އަންހެނުން ކަމަށާއި، ޖުމްލަ އާބާދީގެ 88 އިންސައްތަ ނުވަތަ 94,298 މީހުންނަކީ އަންހެނުން ކަމަށް ވެސް އެ ތަފާސްހިސާބުތަކުން ދައްކަ އެވެ.
މިހާ ގިނަ އަދަދެއްގެ ބަޔަކު ދިގު މުއްދަތަކަށް ދުޅަހެޔޮކަމާއި ހަރަކާތްތެރިކަންމަތީ ތިބުމަކީ އުފާކުރައްވާ ކަމެއް ކަމަށް، މި ތަފާސްހިސާބުތަކާ ގުޅިގެން ނޫސްވެރިންނާ ވާހަކަދައްކަވަމުން ސިއްހަތާ ބެހޭ ވަޒީރު ކެނިޗީރޯ އުއެނޯ ވިދާޅުވި އެވެ. ވޯލްޑް ބޭންކުގެ ހިސާބުތަކުން ދައްކާ ގޮތުގައި، 2024 ވަނަ އަހަރު ޖަޕާނު މީހުންގެ އެވްރެޖް އުމުރަކީ 84 އަހަރެވެ. މިއާއެކު، ދުނިޔޭގައި އެންމެ އުމުރު ދިގު މީހުން އުޅޭ ގައުމުތަކުގެ ތެރޭގައި ޖަޕާނު ހިމެނިފައިވާއިރު، އެމެރިކާގައި މީހުންގެ އެވްރެޖް އުމުރަކީ 79 އަހަރު ކަމަށް އެ ހިސާބުތަކުން ފާހަގަކުރެ އެވެ.
ޖަޕާނުގެ ރައްޔިތުންގެ އުމުރު ދިގުވުމުގެ ސިއްރަކީ އެ ގައުމުގެ ސިއްހީ ނިޒާމުގެ ފެންވަރު ރަނގަޅުވުމާއި، ބޭނުންކުރާ ކާނާގެ ބާވަތްތައް ދުޅަހެޔޮވުން ކަމަށް ސައިންސްވެރިން ބުނެ އެވެ. އަދި، ޖަޕާނުގެ ސިޓީތަކުގައި މަސައްކަތުގެ ވަގުތު އިންތިހާއަށް ގިނަ ނަމަވެސް، ދިރިއުޅުމުގައި އުފާވެރިކަމާއި މާނައެއް ހޯދުމަށް ބާރުއަޅާ 'އިކިގާއީ' ފަލްސަފާއަށް ބައެއް މީހުން އަމަލުކުރެ އެވެ. މީގެ އިތުރުން، ދުނިޔޭގެ އެންމެ ދުވަސްވީ ބައެއް މީހުން މިހާރު ދިރިއުޅެނީ ވެސް ޖަޕާނުގަ އެވެ. ސިއްހަތާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުގައި، އޭގެ ތެރޭގައި ކިޔޯޓޯއަށް ނިސްބަތްވާ އުމުރުން 114 އަހަރުގެ ފުޔޯ ކިޝިމޮޓޯއާއި، ކުމޮމޮޓޯއަށް ނިސްބަތްވާ އުމުރުން 112 އަހަރުގެ ހިކިރޫ ކާޓޯ ހިމެނެ އެވެ.
އުމުރުން ދުވަސްވީ މީހުންގެ އާބާދީ އިތުރުވުމުގެ ސަބަބުން، ދުނިޔޭގެ ހަތަރުވަނައަށް އެންމެ ބޮޑު އިގްތިސާދު ކަމަށްވާ ޖަޕާނަށް ވަނީ ބޮޑެތި ގޮންޖެހުންތަކެއް ވެސް ކުރިމަތިވެފަ އެވެ. މި ގޮތުން ދުވަސްވީ މީހުން ބެލެހެއްޓުމުގެ ހަރަދު ބޮޑުވުމާއި، މަސައްކަތްކުރާ އުމުރުގެ މީހުންގެ އަދަދު މަދުވުމުގެ މައްސަލަ ވަނީ ބޮޑުވެފަ އެވެ. އަދި، މީހުން ދިރިއުޅޭ އުމުރު ދިގުވި ނަމަވެސް، ކުދިން އުފަންވާ މިންވަރު ރެކޯޑް މިންވަރަކަށް ދަށަށް ދިއުމުގެ ސަބަބުން، ޖަޕާނުގެ 123 މިލިއަން މީހުންގެ އާބާދީ ދަނީ ދުވަހުން ދުވަހަށް މަދުވަމުންނެވެ.
މި މައްސަލައަށް ހައްލެއް ހޯދުމުގެ ގޮތުން، ފާއިތުވި އަހަރުތަކުގައި ޖަޕާނުން ވަނީ ބޭރުގެ ހުނަރުވެރި މަސައްކަތްތެރިންނަށް އެ ގައުމަށް ހިޖުރަކުރުމުގެ ފުރުސަތުތައް ހުޅުވާލާފަ އެވެ. ނަމަވެސް، ބޭރު މީހުންނާ މެދު އާންމުންގެ މެދުގައި ނުތަނަވަސްކަން އިތުރުވަމުންދާތީ، ސަރުކާރުން މިހާރު ވަނީ ވިސާ ދޫކުރުމުގެ އުސޫލުތައް ކުރިއަށްވުރެ ހަރުކަށިކޮށްފަ އެވެ.
މަސްދަރު: ސީއެންއެން
