ރަޝިއާއާއި އުތުރު ކޮރެއާ ބުރިޖަކުން ގުޅާލައިފި، ވިޔަފާރީގެ ގުޅުންތައް އިތުރަށް ފުޅާވާނެ!

ރަޝިއާއާއި އުތުރު ކޮރެއާ އެއްގަމު މަގުން ގުޅުވައިދޭ ފުރަތަމަ ބްރިޖް ރަސްމީކޮށް ހުޅުވައިފި އެވެ. ޓުމެން ކޯރު ހުރަސްކޮށް ބިނާކޮށްފައިވާ މި ބްރިޖުގެ ސަބަބުން ދެ ގައުމުގެ ބޯޑަރު ހުރަސްކޮށް މުދަލާއި ފަސިންޖަރުން އުފުލުމަށް ބޮޑެތި ފަސޭހަތަކެއް ލިބިގެންދާނެ އެވެ. މިއީ، އެއްގަމު ދަތުރުފަތުރުގެ ދާއިރާއިން ދެ ގައުމު ގުޅުވައިދިން އެންމެ ފުރަތަމަ މަގު ބްރިޖެވެ. އުތުރު ކޮރެއާގެ ދައުލަތުގެ މީޑިއާއިން ބުނީ، މި ބްރިޖް މައިގަނޑު ގޮތެއްގައި ބޭނުންކުރާނީ ތިން ކަމަކަށް ކަމަށެވެ. އެއީ، ދެ ގައުމުގެ ދެމެދުގައި މީހުން ދަތުރުފަތުރު ކުރުމަށާއި، ފަތުރުވެރިކަމުގެ އިތުރުން ވިޔަފާރީގެ މުއާމަލާތްތައް ހިންގުމަށެވެ. ރަޝިއާގެ ދައުލަތުގެ ނޫސް އޭޖެންސީ 'ޓާސް' އިން ވެސް ވަނީ މި ބްރިޖާ ބެހޭ ތަފާސްހިސާބުތައް ހާމަކޮށްފަ އެވެ. އެ އޭޖެންސީން ރިޕޯޓްކުރާ ގޮތުގައި، މި ބްރިޖުން ކޮންމެ ދުވަހަކު 300 އުޅަނދަށް ދަތުރުކުރެވޭނެ އެވެ. އަދި، ކޮންމެ ދުވަހަކު 2،323 މީހުންނަށް ދަތުރުކުރެވޭނެ ކަމަށް ވެސް އެ އޭޖެންސީން ރިޕޯޓްކުރެ އެވެ.

މި އަހަރުގެ މޭ މަހު ބީބީސީން ވަނީ މި ބްރިޖު ތަރައްގީކުރުމުގެ މަސައްކަތް ކުރިއަށްދިޔަ ސަރަހައްދުގެ ސެޓެލައިޓް ފޮޓޯތަކެއް އާންމުކޮށްފަ އެވެ. އެ ފޮޓޯތަކުން ފެންނަ ގޮތުގައި، އެއް ކިލޯމީޓަރުގެ ދިގު މި ބްރިޖާއެކު އާ މަގުތަކެއް ވަނީ ހަދާފަ އެވެ. އަދި ބޯޑަރު ޗެކްޕޮއިންޓަކާއި، ސަޕޯޓް އިންފްރާސްޓްރަކްޗާގެ އިތުރުން ޕާކިން ފެސިލިޓީތައް ވެސް ވަނީ ގާއިމުކޮށްފަ އެވެ. ރޮއިޓާސްއިން ރިޕޯޓްކުރާ ގޮތުގައި، މީގެ ކުރިން ދެ ގައުމުގެ ދެމެދުގައި ދަތުރުކުރެވެނީ ވައިގެ މަގުންނާއި ރޭލު މަގުންނެވެ. އެ ދުވަސްވަރު އެއްގަމު މަގުން ދަތުރުކުރަން އޮތް ހަމައެކަނި ގޮތަކީ ރޭލު ބްރިޖްގެ މަތީގައި ލަކުޑި ފިލާ އަޅައިގެން ވަގުތީ ގޮތުން ކާރު ދުއްވުމެވެ.

ރަޝިއާ ސަރުކާރުން ބުނީ، މި ބްރިޖް ފުރަތަމަ ބޭނުންކުރާނީ މުދާ އުފުލަން ކަމަށެވެ. އަދި، މި އަހަރުގެ ފަހުކޮޅު ފަސިންޖަރުންނަށް ވެސް ބްރިޖް ހުޅުވާލާނެ ކަމަށް ރަޝިއާ ސަރުކާރުން ބުނެފައިވެ އެވެ. މި ބްރިޖް އެޅުމުގެ މަސައްކަތް ފަށާފައިވަނީ 2025 ވަނަ އަހަރު އެވެ. މިއީ، 2024 ވަނަ އަހަރު ރަޝިއާގެ ރައީސް ވްލަޑިމިއާ ޕުޓިން އުތުރު ކޮރެއާއަށް ކުރެއްވި ދަތުރުފުޅުގައި ވެވުނު އެއްބަސްވުމުގެ ދަށުން ހިންގި މަޝްރޫއެކެވެ. ބައެއް ލަސްތަކަކަށްފަހު، މި ބްރިޖްގެ މަސައްކަތް ނިންމާލެވުނީ 495 ދުވަހުން އެވެ.

މި ބްރިޖް ހުޅުވާފައި ވަނީ ޔޫކްރެއިން ހަނގުރާމަ ފެށުނު ފަހުން ރަޝިއާއާއި އުތުރު ކޮރެއާގެ ގުޅުން ވަރަށް ބޮޑަށް ބަދަހިވެފައިވާ ދަނޑިވަޅެއްގަ އެވެ. ރަޝިއާގެ ރައީސް ޕުޓިންއާއި އުތުރު ކޮރެއާގެ ލީޑަރު ކިމް ޖޮންގް އުން ވަނީ މީގެ ކުރިން މުހިންމު ކަމަކަށް އެއްބަސްވެވަޑައިގެންފަ އެވެ. އެއީ، ދެ ގައުމުން ކުރެ ގައުމަކަށް ބޭރުގެ އުދުވާނެއް ކުރިމަތިވެއްޖެ ހާލަތެއްގައި އެއް ގައުމުން އަނެއް ގައުމަށް އެހީތެރިވުމަށެވެ.

ވީޑިއޯ ލިންކް މެދުވެރިކޮށް ބްރިޖު ހުޅުވުމަށް ބޭއްވި ރަސްމިއްޔާތުގައި ރަޝިއާގެ ބޮޑުވަޒީރު މިޚައިލް މިޝުސްޓިން މި ބްރިޖް ސިފަކުރެއްވީ އެކުވެރިކަމުގެ "އާ ރަމްޒެއް" ގެ ގޮތުގަ އެވެ. އަދި، އުތުރު ކޮރެއާގެ ބޮޑުވަޒީރު ޕަކް ތައޭ ސޮންގް ބުނީ، މިއީ "ތާރީޚީ ހަރަކާތެއް" ކަމަށެވެ. ބޮޑުވަޒީރު މިޝުސްޓިން ވިދާޅުވީ، ދެ ގައުމުގެ ގުޅުން މިހާރު އޮތީ "މީގެ ކުރިން ދުވަހަކު ވެސް ބަދަހިނުވާ ފަދަ މަތީ ދަރަޖައެއްގައި" ކަމަށެވެ. އަދި، ވިޔަފާރިއާއި، އިގްތިސާދާއި، ސައިންސާއި، ޓެކްނޮލޮޖީގެ އިތުރުން ސަގާފީ ގުޅުންތައް ބަދަހިކުރުމަށް މި ބްރިޖުގެ ސަބަބުން "ވަރުގަދަ ބާރެއް" ލިބޭނެ ކަމަށް ވެސް އޭނާ ވިދާޅުވި އެވެ.

މި ބްރިޖުގެ ސަބަބުން އެންމެ އަވަހަށް ފެނިގެންދާނެ ނަތީޖާއަކީ ރަޝިއާއަށް ހަތިޔާރު އެކްސްޕޯޓްކުރާ މިންވަރު އިތުރުވުން ކަމަށް ހުޅަނގާއި ޔޫކްރެއިންގައި ތިބި ރަޝިއާއާ ދެކޮޅު ފަރާތްތަކުން ތުހުމަތު ކުރެ އެވެ. ޔޫކްރެއިންގެ ތަހުގީގީ އިދާރާއެއް ކަމަށްވާ 'ޓްރުތު ހައުންޑްސް' އިން ބުނީ، މި ބްރިޖް އެޅުމުގެ މައިގަނޑު މަގްސަދަކީ ޔޫކްރެއިން ހަނގުރާމައިގައި ރަޝިއާއަށް އެހީތެރިވުން ކަމަށެވެ. އެއީ، އެ ކަމަށް ޓަކައި ސިއްރު އަސްކަރީ ލޮޖިސްޓިކްސް ކޮރިޑޯއެއް ގާއިމުކުރުން ކަމުގައި އެ ޖަމުއިއްޔާއިން ތުހުމަތު ކުރެ އެވެ.

ދެކުނު ކޮރެއާގެ ޖާސޫސީ އިދާރާގެ ދާރިސުން އަންދާޒާކުރާ ގޮތުގައި، އުތުރު ކޮރެއާއިން މިހާތަނަށް ވަނީ ކަނޑުމަގުން ގިނަ އަދަދެއްގެ ހަތިޔާރު ރަޝިއާއަށް ފޮނުވާފަ އެވެ. އެ ތަކެތީގެ އަގު 7 ބިލިއަނާއި 14 ބިލިއަން އެމެރިކާ ޑޮލަރާ ދެމެދުގެ އަދަދަކަށް އަރާނެ ކަމަށް އެ ފަރާތުން ތުހުމަތު ކުރެ އެވެ. އޭގެ ތެރޭގައި ރޮކެޓާއި، މިސައިލާއި، އާޓިލަރީ ވަޒަން ހިމެނެ އެވެ. އަދި، އުތުރު ކޮރެއާގެ ގާތްގަނޑަކަށް 11،000 ސިފައިން ރަޝިއާގައި ތިބެ ޔޫކްރެއިނާ ދެކޮޅަށް ހަނގުރާމަކުރަމުންދާ ކަމަށް ވެސް ދެކުނު ކޮރެއާއާއި ޔޫކްރެއިންގެ އިތުރުން ހުޅަނގުގެ ބާރުތަކުން ތުހުމަތު ކުރެ އެވެ. ޓްރުތު ހައުންޑްސްއިން ބުނީ، 2024 ވަނަ އަހަރުގެ އިސްތިރާޖީ ގުޅުންތަކުގެ އެއްބަސްވުމުގެ ދަށުން، ސިފައިންނާއި މަސައްކަތްތެރިން އަދި އިސް އޮފިޝަލުން މި ބްރިޖުން ސީދާ ރަޝިއާއަށް ދަތުރުކުރާނެ ކަމަށެވެ. އަދި، ރަޝިއާގެ ޓެކްނޮލޮޖީއާއި ވަސީލަތްތައް އުތުރު ކޮރެއާއަށް ފޮނުވުމަށް ވެސް މަގުފަހިވާނެ ކަމަށެވެ.

އަނެއްކޮޅުން 2024 ވަނަ އަހަރުން ފެށިގެން ރަޝިއާގެ ފަތުރުވެރިން ވަނީ އުތުރު ކޮރެއާއަށް ޒިޔާރަތްކުރަން ފަށާފަ އެވެ. އެހެން ގައުމުތަކަށް ބަންދުކޮށްފައި އޮތް ނަމަވެސް، ރަޝިއާގެ ފަތުރުވެރިންނަށް ޕިއޮންގޔަންގަށާއި ވޮންސަން-ކަލްމާ ބީޗް ރިސޯޓްތަކަށް ދިއުމުގެ ހުއްދަ އޮތީ ދީފަ އެވެ. އަދި، މި ބްރިޖްގެ ސަބަބުން އުތުރު ކޮރެއާގެ މަސައްކަތްތެރިން ރަޝިއާއަށް ފޮނުވުމަށް ވެސް މަގުފަހިވާނެ އެވެ.

ދެކުނު ކޮރެއާގެ އަންދާޒާތަކުން ދައްކާ ގޮތުގައި، އދ. އިން މަނާކޮށްފައި އޮތް ނަމަވެސް، ސްޓޫޑަންޓް ވިސާގައި އެތެރެވާ ގާތްގަނޑަކަށް 10،000 މީހުން ރަޝިއާގެ އިމާރާތްކުރުމާއި ގަސް ކެނޑުމާއި ލަކުޑީގެ ސިނާއަތުގައި މަސައްކަތް ކުރެ އެވެ. ސެންޓާ ފޯ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒްގެ ދާރިސެއް ކަމަށްވާ ވިކްޓާ ޗާ ވިދާޅުވީ، މި ބްރިޖް އަވަހަށް ނިންމާލުމުން ދޭހަވަނީ ދެ ގައުމުގެ ވިޔަފާރި އިތުރުވެފައިވާ މިންވަރު ކަމަށެވެ. މިއީ، ޔޫކްރެއިން ހަނގުރާމައަށް ބޭނުންވާ ސިފައިންނާއި ހަތިޔާރު އަދި މަސައްކަތްތެރިން އުތުރު ކޮރެއާއިން ރަޝިއާއަށް ފޯރުކޮށްދޭތީ އައި ބަދަލެއް ކަމަށް ވެސް އޭނާ ވިދާޅުވި އެވެ. މީގެ ކުރިން މިއީ ދެ ގައުމުގެ ދެމެދުގައި އޮތް އެންމެ ހަރަކާތްތެރިކަން ކުޑަ އެއް ސަރަހައްދު ކަން މަސްރަހު ދިރާސާކުރާ ފަރާތްތަކުން ފާހަގަކުރެ އެވެ.