ރަފީނިއާގެ ހެޓްރިކް އިން މޮޅުވެ، ބާސެލޯނާ ފޯމުގައި
20 ސެޕްޓެމްބަރު 2026 | އާދީއްތަ 06:07ސެވިއްޔާ މެޗުގެ ކުރިން ބާސެލޯނާ އިން ލީގުގައި ރޭސިންއާ ދެކޮޅާށް ކުޅުނު މެޗުގައި ވެސް ރަފީނިއާ ވަނީ ހެޓްރިކް ހަދާފައި
މެޗުގައި ލަނޑު ޖެހުމަށް ފަހު ބާސެލޯނާގެ ރަފީނިއާ އުފާ ފާޅުކުރަނީ | ރޮއިޓާސް
ސްޕެނިޝް ލީގުގައި ސެވިއްޔާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެ ޓީމުގެ ފޯމުގައި ކުރިއަށް ޖެހިލައިފި އެވެ.
ސެވިއްޔާގެ އަމިއްލަ ދަނޑުގައި ހޮނިހިރު ދުވަހުގެރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ސެވިއްޔާ އިން ލަނޑު ޖަަހައި ލީޑު ނަގާފައި ވަނިކޮށް، ބާސެލޯނާ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.
މެޗު ފަށައިގެން 19 ވަނަ މިނެޓުގައި ސެވިއްޔާ އަށް ލީޑު ނަގައިދިނީ ޔޫސުފް ފޮފާނާ އެވެ. ނަމަވެސް، އޭގެ ތިން މިނެޓު ފަހުން ރަފީނިއާ ވަނީ ލަނޑު ޖަހައި ބާސެލޯނާ އަށް ނަތީޖާ ހަމަހަމަކޮށްދީފަ އެވެ. މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ރަފީނިއާ ވަނީ ދެ ވަނަ ލަނޑު ޖަހައި ބާސެލޯނާ އަށް ލީޑު ނަގައިދީފަ އެވެ. އެއީ ލަމީން ޔަމާލް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 69 ވަނަ މިނެޓުގައި ރަފީނިއާ ވަނީ އިތުރު ލަނޑެއް ޖަހައި ހެޓްރިކް ހަމަކޮށްފަ އެވެ. އެ ލަނޑު ވެސް އޭނާ ޖެހީ ޔަމާލް ތަނަވަސްކޮށްދިން ފުރުސަތެއްގަ އެވެ.
ސެވިއްޔާ މެޗުގެ ކުރިން ބާސެލޯނާ އިން ލީގުގައި ރޭސިންއާ ދެކޮޅާށް ކުޅުނު މެޗުގައި ވެސް ރަފީނިއާ ވަނީ ހެޓްރިކް ހަދައިފަ އެވެ. އޭނާ އަންނަނީ މި ސީޒަންގައި ބާސެލޯނާގައި މޮޅު ކުޅުމެއް ދައްކަމުންނެވެ. މޮޅާ އެކު ބާސެލޯނާ އެއް ވަނައިގައި އޮތީ މިހާތަނަށް ކުޅެފައިވާ ހަތް މެޗުން ވެސް މޮޅުވެ، 21 ޕޮއިންޓާ އެކު އެވެ.
