ބެޓިސް އިން ރެއާލް ބަލިކޮށްފި

ސްޕެނިޝް ލީގުގައި ރެއާލް ބެޓިސްއާ ދެކޮޅަށް ކުޅުނު މެޗުން ބަލިވެ، ރެއާލް މެޑްރިޑަށް ސީޒަންގެ ފުރަތަމަ ބައްޔާ ކުރިމަތިލާން ޖެހިއްޖެ އެވެ.

ހޮނިހިރު ދުވަހުގެރޭ ދަންވަރު ބެޓިސްގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 1-0 އިން ރެއާލް ބަލިކޮށްފައި އެވެ. މެޗުގައި ބެޓިސް އިން ލަނޑު ޖެހީ ވެސް ދެ ވަނަ ހާފުގަ އެވެ. 

މެޗުގެ ދެ ވަނަ ހާފުގެ 81 ވަނަ މިނެޓުގައި ޓްރޯއީ ޕަރޯޓް ވަނީ ލަނޑު ޖަހައި ބެޓިސް އަށް ލީޑު ނަގައިދީފައި އެވެ. އޭގެ ފަހުން ރެއާލް އަށް ނަތީޖާ ހަމަހަމަ ކޮށްދޭން 87 ވަނަ މިނެޓުގައި ކާލޯސް އެސްޕީ  ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.

ދެ ވަނަ ފަހަރަށް ރެއާލް އަށް ނަތީޖާ ހަމަހަމަ ކޮށްދޭން ރަނުގެ ފުރުސަތެއް ލިބުނީ ކީލިއަން އެމްބާޕޭ އަށެވެ. އެގޮތުން މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގައި ރެއާލް އަށް ލިބުނު ޕެނަލްޓީ އެމްބާޕޭ ފޮނުވާލި ނަމަވެސް، ބެޓިސްފެ ގޯލު ކީޕަރު ވަނީ އެ ޕެނަލްޓީ މަތަކޮށްފަ އެވެ.

މީގެ ކުރިން ލީގުގައި ކުޅޫނު ތިން މެޗުން ވެސް ރެއާލް މޮޅުވެފައިވާއިރު، ބެޓިސް އަތުން ބަލިވެ އެ ޓީމަށް މި ވަނީ ފުރަތަމަ ބައްޔާ ކުރިމަތިލާން ޖެހިފަ އެވެ. އެއާ އެކު، އެއް ވަނައިގައި ތިން ޕޮއިންޓުގެ ލީޑު ނެގުމުގެ ފުރުސަތު މިހާރު ޗެމްޕިއަން ބާސެލޯނާ އަށް އޮންނާނެ އެވެ.