ފަހު ވަގުތު އެލްޗޭ އަތުން ރެއާލް އަށް އުނދަގޫ މޮޅެއް

ސްޕެނިޝް ލީގުގައި އެލްޗޭއާ ދެކޮޅަށް ކުޅުނު މެޗުން، ފަހު ވަގުތު ރެއާލް މެޑްރިޑަށް އުނދަގޫ މޮޅެއް ލިބިއްޖެ އެވެ.

އެލްޗޭގެ އަމިއްލަ ދަނޑުގައި އަންގާރަ ދުވަހުގެރޭ ދަންވަރު ކުޅުނު މެޗު ރެއާލް އިން ކާމިޔާބު ކުރީ 3-2 އިންނެވެ. މެޗުގައި ރެއާލް އިން ދެ ލަނޑުގެ ލީޑެއް ނަގާފައި ވަނިކޮށް، އެލްޗޭ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތު ލަނޑު ޖަހައިގެން ރެއާލް ވަނީ މެޗުން މޮޅުވެފަ އެވެ.

މެޗު ފަށައިގެން 25 ވަނަ މިނެޓުގައި ރެއާލް އަށް ލީޑު ލިބުނީ އެލްޗޭގެ މަތިއަސް ޑިޓޫރޯ އަތުން ބައި ކޮޅަށް ވަން ލަނޑުންނެވެ. އޭގެ އަށް މިނެޓު ފަހުން ފްރާންސްގެ ކެޕްޓަން ކީލިއަން އެމްބާޕޭ ވަނީ ރެއާލްގެ ދެ ވަނަ ލަނޑު ޖަހައި ލީޑު ފުޅާކޮށްފަ އެވެ.

މެޗުގެ ދެ ވަނަ ހާފުގެ 71 ވަނަ މިނެޓުގައި އަބިއެލް އޮސޯރިއޯ ވަނީ އެލްޗޭގެ ފުރަތަމަ ލަނޑު ޖަހައި ފަރަގު ކުޑަކޮށްފައި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް، އެ ޓީމަށް ނަތީޖާ ހަމަހަމަ ކޮށްދިނީ ފެނާންޑޯ ނީނޯ އެވެ. 

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ރެއާލް މޮޅުވީ ކާލޯސް އެސްޕީ ޖެހި ލަނޑުންނެވެ. މެޗުގައި އޭނާ ކުޅެން ނުކުތީ ވެސް ބަދަލު ކުޅުނތެރިޔެއްގެ ގޮތުގައި އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އެމްބާޕޭ އެވެ. 

މެޗުން މޮޅުވެ ރެއާލް ދެ ވަނައިގައި އޮތީ މިހާތަނަށް ކުޅެފައިވާ ހަ މެޗުން 15 ޕޮއިންޓާ އެކު އެވެ. މި ފަހަރުގެ ލީގުގައި ރެއާލް ވަނީ އެއް މެޗުން ބަލިވެފަ އެވެ.