ބޮޑު މޮޅާ އެކު ބާާސެލޯނާ އަށް ދެ ޕޮއިންޓުގެ ލީޑެއް

ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަނައިގައި ދެ ޕޮއިންޓުގެ ލީޑެއް ނަގައިފި އެވެ. 

ވެލެންސިއާގެ އަމިއްލަ ދަނޑުގައި އާދިއްތަ ދުވަހުގެރޭ ކުޅުނު މެޗު ބާސެލޯނާ އިން ކާާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ދެ ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ހަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ލަމީން ޔަމާލް އެވެ. އޭގެ ދެ މިނެޓު ފަހުން ޔަމާލް ދެ ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. މެޗުގެ ފުރަތަމަ ހާފުގެ 22 ވަނަ މިނެޓުގައި ބާސެލޯނާގެ ލީޑު ފުޅާކޮށްދިނީ ފާމިން ލޮޕޭޒް އެވެ. އެއީ އެންތަނީ ގޯޑަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ބާސެލޯނާގެ ކެޕްޓަން ރަފީނިއާ ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ. އެ ލަނޑު ޖަހަން ރަފީނިއާ އަށް ފުރުސަތު ތަނަވަސްކޮށްދިނީ ލޮޕޭޒް އެވެ. ބާސެލޯނާ އިން މެޗުގައި ރަނގަޅަށް ކުޅުނުއިރު، މެޗުގެ 79 ވަނަ މިނެޓުގައި އެ ޓީމުގެ ހަތަރު ވަނަ ލަނޑު ޖެހީ ޕެޑްރީ އެވެ. މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް ބާސެލޯނާގެ ފަހު ލަނޑު ޖެހީ ޔަމާލް އެވެ.

މޮޅާ އެކު ބާސެލޯނާ އިން ވަނީ އެއް ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ ހަތަރު މެޗުން ވެސް މޮޅުވެ ބާސެލޯނާ އެއް ވަނައިގައި އޮތީ 12 ޕޮއިންޓުގެ ލީޑަކުންނެވެ. ދެ ވަނައިގައި އޮތް ޑިޕޯޓިވޯ އަލަވޭސް އަށް 10 ޕޮއިންޓު ލިބޭއިރު، ތިން ވަނައިގައި އޮތް ރެއާލް މެޑްރިޑަށް ލިބެނީ ނުވަ ޕޮއިންޓެވެ.