ފަހަތުން އަރައި ވަޔެކާނޯ ބަލިކޮށް، ބާސެލޯނާގެ މޮޅުވުމުގެ ސިލްސިލާ ކުރިއަށް

ސްޕެނިޝް ލީގުގައި ރަޔޯ ވެޔެކާނޯއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ބާސެލޯނާގެ އަމިއްލަ ދަނޑުގައި ހޯމަ ދުވަހުގެރޭ ދަންވަރު ކުޅުނު މެޗު އެ ޓީމުން ކާާމިޔާބު ކުރީ 5-2 އިންނެވެ. މެޗުގައި ވަޔެކާނޯ އިން ލަނޑު ޖަހައި ލީޑު ހޯދާފައި ވަނިކޮށް، ބާސެލޯނާ އިން ވަނީ ފަހަތުން އަރައި މޮޅުވެފަ އެވެ.

މެޗު ފަށައިގެން 12 ވަނަ މިނެޓުގައި ސާޖިއޯ ކަމެލޯ ޖެހި ލަނޑުން ވަޔެކާނޯ ވަނީ ލީޑު ނަަގައިފަ އެވެ. އޭގެ ފަހުން މެޗުގެ 19 ވަނަ މިނެޓުގައި ބާސެލޯނާ އަށް ނަތީޖާ ހަމަހަމަ ކޮށްދިނީ ރަފީނިއާ އެވެ. އޭގެ ދެ މިނެޓު ފަހުން ލަމީން ޔަމާލް ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާކޮށްފަ އެވެ. 

މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ބާސެލޯނާގެ ތިން ވަނަ ލަނޑަކީ ވަޔެކާނޯގެ ފްލޯރިއަން ލެޖޫން އަތުން ބައި ކޮޅަށް ވަތް ލަނޑެކެވެ. އޭގެ އަށް މިނެޓު ފަހުން ކަމެލޯ ވަނީ ވަޔެކާނޯގެ ދެ ވަނަ ލަނޑު ޖަހައިފަ އެވެ. މެޗުގެ 71 ވަނަ މިނެޓުގައި ބާސެލޯނާގެ ހަތަރު ވަނަ ލަނޑު ޖެހީ ރަފީނިއާ އެވެ. އަދި މެޗުގައި ބާސެލޯނާގެ ފަހު ލަނޑު 90 ވަނަ މިނެޓުގައި ޖެހީ ޔަމާލް އެވެ.

މެޗުން މޮޅުވެ ބާސެލޯނާ އިން ވަނީ ތިން މެޗުން ނުވަ ޕޮއިންޓު ހޯދައިފަ އެވެ. ލީގުގައި ބާސެލޯނާ އަށް ދެން އޮންނާނީ ރަށުން ބޭރުގައި ވެލެންސިއާއާ ދެކޮޅަށް ކުޅޭ މެޗެވެ.