ތިން އަހަރުގެ އެއްބަސްވުމެއްގެ ދަށުން، ޖީސޫސް ބާސެލޯނާ އަށް ސޮއިކޮށްފި

އާސެނަލް އަށް ކުޅެމުން އައި ބްރެޒިލްގެ ގެބްރިއަލް ޖީސޫސް، ސްޕެއިންގެ ބާސެލޯނާ އަށް ސޮއިކޮށްފި އެވެ.

އުމުރުން 29 އަހަރުގެ ކުޅުންތެރިޔާ ހޯދުމަށް މީގެ ދުވަސް ކޮޅެއް ކުރިން ބާސެލޯނާ އިން އާސެނަލް އާއެކު އެއްބަސްވުމަކަށް އައިއިރު، އަންގާރަ ދުވަހު ޖީސޫސް ވަނީ ރަސްމީކޮށް ބާސެލޯނާ އަށް ސޮއިކޮށްފަ އެވެ. ބާސެލޯނާ އާއެކު ޖީސޫސް ސޮއި ކުރީ ތިން އަހަރު ދުވަހުގެ އެއްބަސްވުމަކަށްވާއިރު، އެ އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. 

ޖީސޫސް އޭނާގެ ސީނިއަރ ކެރިއަރު ފެށި ބްރެޒިލްގެ ކުލަބެއް ކަމަށްވާ ޕަލްމެއިރާސް އިންނެވެ. އެ ކުލަބުގައި ދެ އަހަރު ކުޅުމަށް ފަހު، 2017 ވަނަ އަހަރު އޭނާ ވަނީ މެންޗެސްޓަރ ސިޓީ އަށް ބަދަލުވެފަ އެވެ. ސިޓީގައި ހަ ސީޒަން ހޭދަ ކުރުމަށް ފަހު، 2022 ވަނަ އަހަރު ޖީސޫސް ބަދަލުވީ އާސެނަލް އަށެވެ. އާސެނަލްގައި ހޭދަކުރި ފަސް ސީޒަންގެ ތެރޭގައި ޖީސޫސް ވަނީ އެ ކުލަބަށް ކުޅެދިން 123 މެޗުގައި 32 ލަނޑު ޖަހައިފަ އެވެ. 

އާސެނަލް އާއެކު އޭނާ ވަނީ އިނގިރޭސި ޕްރިމިއާ ލީގު ކާމިޔާބުކޮށްފަ އެވެ. ސިޓީ އާއެކު ހަތަރު ފަހަރު ޕްރިމިއާ ލީގު ކާމިޔާބުކުރިއިރު، އެފްއޭ ކަޕް އާއި ކަރަބޯ ކަަޕް އަދި އެފްއޭ ކޮމިއުނިޓީ ޝީލްޑު ވެސް ޖީސޫސް ވަނީ ކާމިޔާބުކޮށްފަ އެވެ. ޖީސޫސް އަކީ ބްރެޒިލްގެ ޤައުމީ ޓީމަށް ވެސް ކުޅެފައިވާ ކުޅުންތެރިޔެކެވެ. 

ޖީސޫސް ބާސެލޯނާ އަށް ސޮއިކޮށްފައިވާއިރު، އެ ކުލަބުގައި އޭނާ ބޭނުން ކުރާނީ ނުވަ ނަންބަރު ޖާޒީ އެވެ. ބާސެލޯނާގެ ނުވަ ނަންބަރު ޖާޒީގައި އެންމެ ފަހުން ކުޅެފައި ވާނީ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެވެ. ނަމަވެސް މިދިޔަ ސީޒަނަށް ފަހު ލެވަންޑޯސްކީ ވަނީ ބާސެލޯނާ ދޫކޮށްލައިފަ އެވެ. ބާސެލޯނާ އިން ޖީސޫސް ހޯދާފައި ވަނީ، އެ ކުލަބުން ހޯދަން މަސައްކަތް ކުރި އާޖެންޓީނާގެ ހޫލިއަން އަލްވަރޭޒް ގެނެވޭ ގޮތް ނުވުމުންނެވެ.