ޕާކިސްތާނުގެ މިސްކިތަކަށް ދިން ބޮމުގެ ހަމަލާއެއްގައި 21 މީހުން މަރުވެއްޖެ
19 ސެޕްޓެމްބަރު 2026 | ހޮނިހިރު 06:24ޕާކިސްތާނުގެ ޚައިބަރު ޕަޚްތޫންޚާގައި ހުންނަ ފުލުހުންގެ މަރުކަޒަކަށް އަމާޒުކޮށް ތަހްރީކް ތާލިބާން ޕާކިސްތާނުން ދިން ކާރު ބޮމުގެ ހަމަލާ ބައިނަލްއަގުވާމީ މުޖުތަމައުން ހަރުކަށި އިބާރާތުން ކުށްވެރިކޮށްފި. މި ހަމަލާއާ ގުޅިގެން ރައީސް އާސިފް އަލީ ޒަރުދާރީ ވަނީ ޓެރަރިޒަމް މުޅިން ނައްތާލުމަށް ގޮވާލައްވާފައި. އަފްޣާނިސްތާނުގެ އެހީތެރިކަމާއެކު މި ފަދަ ހަމަލާތައް އިތުރުވަމުންދާ ކަމަށް ޕާކިސްތާނުން ތުހުމަތުކުރި ނަމަވެސް، ތާލިބާން ސަރުކާރުން އެކަން ދޮގުކުރޭ
ޕާކިސްތާނުގައި ކާރުބޮމެއް ގޮއްވާލައިގެން ދިން ބޮމުގެ ހަމަލާ ހިނގި ސަރަހައްދަށް އެމްބިއުލާންސްތައް ޖަމާވެފައި | އީޕީއޭ
ޕާކިސްތާނުގެ ހުޅަނގުއުތުރުގައި ހުންނަ ފުލުހުންގެ މަރުކަޒެއްގެ އެތެރޭގައި ހުރި މިސްކިތަކަށް އަމާޒުކޮށް ކާރު ބޮމެއް ގޮއްވާލައިގެން ދިން ހަމަލާއެއްގައި، 21 މީހުން މަރުވެ 100 އަށްވުރެ ގިނަ މީހުން ޒަޚަމްވެފައިވާ ކަމަށް އޮފިޝަލުން ހާމަކޮށްފި އެވެ.
ޕާކިސްތާނުގެ އޭޕީޕީ ނޫސް އޭޖެންސީން ރިޕޯޓްކޮށްފައިވާ ގޮތުގައި، ޚައިބަރު ޕަޚްތޫންޚާ ޕްރޮވިންސްގެ ކޯހަތު ސިޓީގައި ހުންނަ ފުލުހުންގެ މަރުކަޒަށް ހަތިޔާރު އެޅި ބަޔަކު ބަޑިން ހަމަލާދިނުމުގެ އިތުރުން ކާރުބޮމެއް ގޮއްވައިލައިގެން ދިން މި ހަމަލާގައި މަރުވި މީހުންގެ ތެރޭގައި ފުލުހުންގެ 15 އޮފިސަރުންނާއި ހަތަރު އަހަރުގެ ކުޑަކުއްޖަކު ހިމެނެ އެވެ. ފުލުހުން ބުނީ، ގޮވާތަކެތި ބަރުކޮށްފައިވާ ކާރެއް މިސްކިތުގެ ދޮރާށީގައި ޖައްސައި ގޮއްވާލާފައިވަނީ ހުކުރު ނަމާދު ކުރަމުން ދަނިކޮށް، އެ ގައުމުގެ ގަޑިން މެންދުރުފަހު 1:15 ހާއިރު ކަމަށެވެ.
ޚައިބަރު ޕަޚްތޫންޚާ ފުލުހުންގެ ތަރުޖަމާނަކު ވިދާޅުވީ، ބޮން ގޮއްވާލުމަށްފަހު ހިނގި ކުރިމަތިލުންތަކުގައި ހަމަލާދިން މީހުންގެ ތެރެއިން މަދުވެގެން ހަ މީހަކު މަރުވެފައިވާ ކަމަށެވެ. ބީބީސީ ވެރިފައިއިން ހޯދާފައިވާ ވީޑިއޯތަކުން ފެންނަ ގޮތުގައި، ހަމަލާ ދިން ސަރަހައްދު ވަނީ ކުނިބުނިތަކުން ފުރިފަ އެވެ. އަދި، އެތަނުގައި ތިބި މީހުން ދަނީ އަނިޔާވި މީހުންނަށް އެހީތެރިކަން ފޯރުކޮށްދެމުންނެވެ.
ޚައިބަރު ޕަޚްތޫންޚާގެ ފުލުހުން ތުހުމަތުކުރާ ގޮތުގައި، މި ހަމަލާ ދީފައިވަނީ ޕާކިސްތާނީ ތާލިބާނުންގެ ނަމުން މަޝްހޫރުވެފައިވާ ތަހްރީކް ތާލިބާން ޕާކިސްތާންގެ ގޮތްޕަކުންނެވެ. ފުލުހުން ބުނީ، ޕާކިސްތާނީ ތާލިބާނުންގެ ނުބައި ރޭވުންތައް ނާކާމިޔާބު ކޮށްލުމަށް ފުލުހުން ސާބިތުކަމާއެކު ދެމިތިބި ކަމަށެވެ. ވަކި ސަރުކާރެއް ގާއިމުކުރުމުގެ މަގްސަދުގައި 2007 ވަނަ އަހަރު އުފެއްދި މި ޖަމާއަތަކީ އަލް-ގާއިދާއާއި އަފްޣާނިސްތާނުގެ ތާލިބާނުންނާ ގުޅުން އޮންނަ ބައެކެވެ.
ޕާކިސްތާނުގެ ރައީސް އާސިފް އަލީ ޒަރުދާރީ ނެރުއްވި ބަޔާނެއްގައި، މި ގޮވުމުގައި ޒަޚަމްވި މީހުންނަށް އަވަސް ޝިފާއަކަށް އެދިވަޑައިގަންނަަވައި، ބޭރުގެ އެހީތެރިކަން ލިބިގެން ހަރަކާތްތެރިވާ ޓެރަރިސްޓުން މުޅިން ނައްތާލުމަށް ގޮވާލެއްވި އެވެ. އދ. ގެ ތަރުޖަމާނަކު ވިދާޅުވީ، ސެކްރެޓަރީ ޖެނެރަލް އެންޓޯނިއޯ ގުތެރޭޝް މި ހަމަލާ "ހަރުކަށި އިބާރާތުން ކުށްވެރިކުރައްވާ" ކަމަށާއި، އާންމު ރައްޔިތުންނާއި އަޅުކަންކުރާ ތަންތަނަށް އަމާޒުކޮށްދޭ ހަމަލާތަކަކީ ބަލައިގަނެވޭނެ ކަންކަމެއް ނޫން ކަމަށެވެ. މީގެއިތުރުން، ޓެރަރިޒަމާ ދެކޮޅަށް ކުރާ މަސައްކަތުގައި އެ ޕްރޮވިންސުން ބޮޑެތި ގުރުބާނީތަކެއް ވަމުންދާ ކަމަށް ޚައިބަރު ޕަޚްތޫންޚާގެ ގަވަރުނަރު ފައިސަލް ކަރީމް ކުންޑީ ހުކުރު ދުވަހު ވިދާޅުވި އެވެ.
މިދިޔަ ފެބުރުވަރީ މަހު، އިސްލާމްއާބާދުގެ ޝިއައީ މިސްކިތަކަށް ދިން ހަމަލާ ހިމެނޭހެން، އެ ގައުމުގައި ދިން ސިލްސިލާ ހަމަލާތަކުގެ ފަހަތުގައި ވަނީ ޕާކިސްތާނީ ތާލިބާނުން ކަމަށް އޮފިޝަލުން ވަނީ ތުހުމަތުކުރައްވާފަ އެވެ. އެ ހަމަލާތަކުގައި 30 އަށްވުރެ ގިނަ މީހުން މަރުވި އެވެ. ފަހަކަށް އައިސް ޕާކިސްތާނުގެ ބޯޑަރު ސަރަހައްދުތަކުގައި ހަތިޔާރު އެޅި ޖަމާއަތްތަކުން ސިފައިންނާއި ފުލުހުންނަށް އަމާޒުކޮށްދޭ ހަމަލާތައް ވަނީ ވަރަށް ބޮޑަށް އިތުރުވެފަ އެވެ. އިސްލާމްއާބާދުން ތުހުމަތުކުރާ ގޮތުގައި، ހަނގުރާމަވެރިން އަފްޣާނިސްތާނަކީ ރައްކާތެރި މަންޒިލެއްގެ ގޮތުގައި ބޭނުންކޮށްގެން، ޕާކިސްތާނަށް ހަމަލާދިނުމަށް ތަމްރީނުތައް ހޯދައި ރޭވުންތައް ރާވަމުންދެ އެވެ. ނަމަވެސް، އަފްޣާނިސްތާނުގެ ތާލިބާން ސަރުކާރުން މި ތުހުމަތުތައް ދޮގުކުރެ އެވެ. އެ ސަރުކާރުން ބުނީ ހަނގުރާމަވެރި ޖަމާއަތްތަކުގެ މައްސަލައަކީ ޕާކިސްތާނުގެ ދާޚިލީ މައްސަލައެއް ކަމަށެވެ.
މަސްދަރު: ބީބީސީ
