އިމްރާން ޚާން ސިއްހީ ފަރުވާއަށް ޖަލުން ހޮސްޕިޓަލަށް ބަދަލުކޮށްފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ސިއްހީ ހާލަތު ގޯސްވުމާ ގުޅިގެން، ފަރުވާ ދިނުމަށްޓަކައި ވެރިރަށް އިސްލާމްއާބާދުގައި ހުންނަ ހޮސްޕިޓަލަކަށް ބަދަލުކޮށްފި އެވެ.

އިމްރާން ޚާންގެ ޕާޓީން ބުނި ގޮތުގައި، އޭނާ ބަންދުކޮށްފައި ހުރި އަޑިއާލާ ޖަލުން ޝިފާ އިންޓަނޭޝަނަލް ހޮސްޕިޓަލަށް ގެންގޮސްފައިވަނީ ސަލާމަތީ ވަރުގަދަ ފިޔަވަޅުތަކަކާއެކުގަ އެވެ. ނަމަވެސް، އޭނާ ހޮސްޕިޓަލަށް ބަދަލުކުރިކަން ސަރުކާރުގެ ރަސްމީ އިދާރާތަކުން އަދި ކަށަވަރުކޮށްދީފައެއް ނުވެ އެވެ.

ކުރިން ކްރިކެޓް ކުޅުންތެރިއެއްގެ ގޮތުގައި މަޝްހޫރުވި ސިޔާސީ ލީޑަރު އިމްރާން ޚާން ހޮސްޕިޓަލަށް ބަދަލުކޮށްފައިވަނީ، 48 ގަޑިއިރުގެ ތެރޭގައި އޭނާ ޑޮކްޓަރުންނަށް ދައްކައި ބެލުމަށް ޕާކިސްތާނުގެ ސުޕްރީމް ކޯޓުގެ ތިން ފަނޑިޔާރުންގެ ބެންޗަކުން ކުރި އަމުރާ ގުޅިގެންނެވެ.

ކޮރަޕްޝަނުގެ ދައުވާތަކެއްގައި 2023 ވަނަ އަހަރު އިމްރާން ޚާން ޖަލަށްލީ ފަހުން، ކޯޓަކުން އޭނާއަށް ލިބުނު އެންމެ ބޮޑު ލުޔަކީ މިއެވެ. އޭނާގެ މައްޗަށް އުފުލާފައިވާ ދައުވާތަކަކީ ސިޔާސީ މަގްސަދެއްގައި އުފުލާފައިވާ ދައުވާތަކެއް ކަމަށް އޭނާ ވިދާޅުވަމުން ގެންދަވަ އެވެ.

އިމްރާން ޚާން ހޮސްޕިޓަލަށް ބަދަލުކުރުމުގެ އިތުރުން، އެތައް މަސްތަކެއް ވަންދެން އޭނާގެ އާއިލާއާ ބައްދަލުނުވެ އޮތް އޮތުން ނިމުމަކަށް ގެނެސް، އާއިލާއާ ބައްދަލުކުރުމުގެ ފުރުސަތު ދިނުމަށްވެސް ކޯޓުން ވަނީ އަމުރުކޮށްފަ އެވެ. އެގޮތުން، އަންގާރަ ދުވަހުގެ ރޭ އޭނާގެ އަންހެން ކޮއްކޮ ވަނީ ޖަލަށް ގޮސް އޭނާއާ ބައްދަލުކޮށްފަ އެވެ.

އިމްރާން ޚާންގެ ޕާޓީ، ތަހްރީކޭ އިންސާފް (ޕީ.ޓީ.އައި) އިން އާންމުކޮށް އޭނާއާ ދެކޮޅަށް ނިންމާ ނިންމުންތަކަކީ ސިޔާސީ ނިންމުންތަކެއް ކަމަށް ބުނި ނަމަވެސް، ސުޕްރީމް ކޯޓުގެ މި ނިންމުމުގެ ފަހަތުގައި ސިޔާސީ ކަންތައްތަކެއް ހިނގަމުންދާ ކަމަށް ދެކެވޭ ވާހަކަތަކާ ގުޅޭގޮތުން އެ ޕާޓީން ރަސްމީކޮށް އެއްޗެއް ބުނެފައެއް ނުވެ އެވެ.

ޝިފާ އިންޓަނޭޝަނަލް ހޮސްޕިޓަލް ހިމެނޭ ސަރަހައްދު ފުލުހުން މިހާރު ވަނީ ބަންދުކޮށްފަ އެވެ. އެ ސަރަހައްދުގައި ފުލުހުންގެ ވޭންތަކާއި ގިނަ އަދަދެއްގެ ފުލުހުން ހަރަކާތްތެރިވަމުންދާއިރު، މަގުތައް ހުސްކުރުމަށްޓަކައި ކްރޭން ބޭނުންކޮށްގެން ކާރުތައް ނަގަމުންދާ މަންޒަރާއި، ފުލުހުންގެ ބަހާދަރު އުޅަނދުތައް އެ ސަރަހައްދުގައި ފޯރިމަރަމުންދާ މަންޒަރު ބީ.ބީ.ސީ އިން ވަނީ ރިޕޯޓުކޮށްފަ އެވެ.

އިމްރާން ޚާން ހޮސްޕިޓަލުގައި ހުންނަ ހުރުން ސިޔާސީ ކަމަކަށް ނުހެދުމަށް އިންޒާރު ދެމުން، ހޮސްޕިޓަލް ސަރަހައްދުގައި އެއްވެސް ނޫސްވެރިންގެ ބައްދަލުވުމެއް ނުބޭއްވުމަށް ސުޕްރީމް ކޯޓުން ވަނީ ޕީ.ޓީ.އައި އަށް އަންގާފަ އެވެ.

އުމުރުން 73 އަހަރުގެ އިމްރާން ޚާންގެ ލޯފެނުމުގެ މައްސަލަތަކާއި އެހެނިހެން ސިއްހީ މައްސަލަތައް ހުރި ނަމަވެސް، އެކަށީގެންވާ ސިއްހީ ފަރުވާ ލިބެމުން ނުދާ ކަމަށް އޭނާގެ ވަކީލުން ވަނީ ވިދާޅުވެފަ އެވެ.

ޖަލުގެ އިދާރާތަކުން ފަރުވާ ދިނުމަށް އިހުމާލުވުމުގެ ސަބަބުން، އިމްރާން ޚާންގެ ކަނާތު ލޮލުގެ ފެނުން 15 އިންސައްތައަށް ދަށްވެފައިވާ ކަމަށް އޭނާގެ ވަކީލުން ފެބްރުއަރީ މަހު ބުނެފައިވެއެވެ. ނަމަވެސް ސަރުކާރުން ވަނީ އެ ވާހަކަތައް ދޮގުކޮށްފަ އެވެ.

އަންގާރަ ދުވަހު ކޯޓުން ނެރުނު އަމުރުގައި ފަނޑިޔާރުން ވިދާޅުވެފައިވަނީ، ކޮންމެ ގައިދީއެއްގެވެސް ފުރާނައާއި، ސިއްހަތާއި، ކަރާމާތާއި އަދި ރައްކާތެރިކަން ކަށަވަރުކޮށްދިނުމަކީ ގާނޫނުއަސާސީން ލާޒިމްކުރާ ކަމެއް ކަމަށެވެ.

އިމްރާން ޚާންގެ ފަރުވާގެ ކަންކަމުގައި ލޮލުގެ ހާއްސަ ޑޮކްޓަރަކު ބައިވެރިވާނެ ކަމަށް ފަނޑިޔާރުން ވިދާޅުވި އެވެ.

ފަނޑިޔާރުންނާއި ޕީ.ޓީ.އައި ގެ އިސްވެރިން ވަނީ ހޮސްޕިޓަލް ސަރަހައްދަށް ސަޕޯޓަރުން އެއްނުވުމަށް އިންޒާރު ދީފަ އެވެ. އެއީ ކޯޓު އަމުރާ ޚިލާފު ކަމެއްގެ ގޮތުގައި ވަނީ ކަނޑައަޅާފަ އެވެ.

ޕާކިސްތާނުގެ ގައުމީ ކްރިކެޓް ޓީމުގެ ކެޕްޓަންކަން ކުރިން ކުރެއްވި އިމްރާން ޚާން، އެ ގައުމުގެ ބޮޑުވަޒީރުކަން ކުރެއްވީ 2018 އިން 2022 އަށެވެ.

އޭނާ 2023 ވަނަ އަހަރުގެ އޮގަސްޓް މަހު ޖަލަށްލީ ފަހުން، ދައުލަތުގެ ސިއްރުތައް ހާމަކުރުމާއި ދައުލަތަށް ލިބުނު ހަދިޔާތައް ވިއްކާލުން ހިމެނޭހެން 100 އަށްވުރެ ގިނަ މައްސަލައިގައި އޭނާގެ މައްޗަށް ވަނީ ދައުވާ އުފުލާފަ އެވެ. އިމްރާން ޚާން ވިދާޅުވާ ގޮތުގައި މިއީ ސިޔާސީ ގޮތުން އޭނާ ފިއްތުމަށް ކުރާ ކަންކަމެވެ.

ވޭތުވެދިޔަ އަހަރުގެ ފަހުކޮޅު، އިމްރާން ޚާން އާއި އޭނާގެ އަނބިކަނބަލުން ބުޝްރާ ބީބީގެ މައްޗަށް ވަނީ 17 އަހަރުގެ ޖަލު ހުކުމެއް އިއްވާފަ އެވެ.

އޭނާ ޖަލަށްލުމާ ގުޅިގެން ސަޕޯޓަރުން ވަނީ ބޮޑެތި މުޒާހަރާތަކެއް ކޮށްފަ އެވެ. އަދި އެ މުޒާހަރާތައް ހުއްޓުވުމަށް ސަރުކާރުން ވަނީ ހަރުކަށި ފިޔަވަޅުތަކެއް އަޅާފަ އެވެ.

ޖަލުގައި ހުންނެވި ނަމަވެސް، އިމްރާން ޚާނަކީ އަދިވެސް ޕާކިސްތާނުގެ ސިޔާސީ މަސްރަހުގައި ނުފޫޒުގަދަ، އަދި ގިނަ އަދަދެއްގެ ސަޕޯޓަރުން ތާއީދުކުރާ ލީޑަރެކެވެ.