އީރާނާ ދެކޮޅަށް އެމެރިކާއިން އަމިއްލައަށް އަޅާފައިވާ ދަތިކުރުމުގެ ފިޔަވަޅުތަކަށް ތަބާނުވާނެ ކަމަށް ޕާކިސްތާނުން ބުނެފި

އީރާނާ ދެކޮޅަށް އެމެރިކާއިން އަމިއްލައަށް އަޅާފައިވާ ދަތިކުރުމުގެ ފިޔަވަޅުތަކަށް ތަބާނުވާނެ ކަމަށާއި، ތެހެރާނާއެކު އޮންނަ ވިޔަފާރީގެ ގުޅުންތައް ކުރިއަށްގެންދާނެ ކަމުގެ ޔަގީންކަން ޕާކިސްތާނުން ދީފި އެވެ.

ބައިނަލްއަގުވާމީ ގާނޫނުތަކާ އެއްގޮތްވާ ގޮތުގެ މަތިން އީރާނާއެކު އޮންނަ ދެފަރާތުގެ ވިޔަފާރީގެ ގުޅުން ދެމެހެއްޓުމަށް ޕާކިސްތާނުން ކުރާ މަސައްކަތްތައް އެ ގައުމުން އަލުން ކަށަވަރުކޮށްދީފައިވަނީ، އީރާނާ ދެކޮޅަށް އެމެރިކާއިން ކުރަމުންދާ އިގްތިސާދީ ހަނގުރާމައާ ގުޅޭގޮތުން އީރާނުގެ "އިރްނާ" ނިއުސް އެޖެންސީން ކުރި ސުވާލަކަށް ޖަވާބު ދެއްވަމުންނެވެ. އިސްލާމްއާބާދުގައި ބުރާސްފަތި ދުވަހު ބޭއްވި ހަފްތާގެ ނޫސްވެރިންގެ ބައްދަލުވުމުގައި މިކަން ހާމަކުރެއްވީ ޕާކިސްތާނުގެ ފޮރިން މިނިސްޓްރީގެ ތަރުޖަމާނު ތާހިރު އަންދްރާބީ އެވެ.

އަންދްރާބީ ވިދާޅުވީ، އެއްވެސް ގައުމަކުން އަމިއްލައަށް އިސްނަގައިގެން އަޅާ މިފަދަ ފިޔަވަޅުތަކާ ޕާކިސްތާނުން އަބަދުވެސް ދެކޮޅު ހަދާ ކަމަށާއި، އެމެރިކާގެ މި ނިންމުންތައް ބަލައިނުގަންނާނެ ކަމަށެވެ.

މީގެ އިތުރުން، މިފަދަ ދަތިކުރުމުގެ ފިޔަވަޅުތަކުގެ ސަބަބުން ނޭދެވޭ ނަތީޖާތަކެއް ނުކުންނަކަން ފާހަގަކުރައްވައި، ބައިނަލްއަގުވާމީ ގާނޫނުތަކުގެ ދަށުން ޕާކިސްތާނުން އެ ފިޔަވަޅުތައް ގަބޫލުނުކުރާނެ ކަމަށް އޭނާ ވިދާޅުވި އެވެ.

އީރާނާ ދެކޮޅަށް ކުރިއަށްގެންދާ އިގްތިސާދީ ހަނގުރާމައަކީ ތެހެރާނާއި ވޮޝިންގްޓަނާ ދެމެދު އޮތް ބޮޑު ހަމަނުޖެހުމުގެ ބައެއްގެ ގޮތުގައި ސިފަކުރައްވައި، ޑިޕްލޮމެސީ އާއި މަޝްވަރާގެ މަރުހަލާގެ ތެރެއިން މައްސަލަތައް ހައްލުކުރުމުގެ މުހިންމުކަމަށް ތަރުޖަމާނު ބާރުއެޅުއްވި އެވެ.

ދެ ގައުމުގެ ދެމެދުގައި ވެފައިވާ އެއްބަސްވުންތަކާ އެއްގޮތަށް އީރާނާއެކު ވިޔަފާރީގެ މުއާމަލާތްތައް ކުރިއަށް ގެންދިއުމަށް ޕާކިސްތާނުން އޮތް ސާބިތު އަޒުމާއި އިހުލާސްތެރިކަން އަންދްރާބީ ވަނީ ތަކުރާރުކުރައްވާފަ އެވެ.

ޕާކިސްތާނުގެ އޮފިޝަލް މިހެން ވިދާޅުވެފައި މިވަނީ، "އޮޕަރޭޝަން އިކޮނޮމިކް އައުޓްކާސްޓް" ގެ ނަމުގައި އީރާނާ ދެކޮޅަށް ޣައިރު ގާނޫނީ އާ ފިޔަވަޅުތަކެއް އަޅާނެކަން މިދިޔަ ހޯމަ ދުވަހު އެމެރިކާއިން އިއުލާނުކޮށްފައި ވަނިކޮށެވެ. އެމެރިކާގެ އަސްކަރީ ބާރުގެ ބޭނުންކޮށްގެން ކާމިޔާބު ނުކުރެވުނު ކަންކަން އިގްތިސާދީ މަޖުބޫރުކުރުވުމުގެ ތެރެއިން ހާސިލުކުރުމަށް ކުރާ މި މަސައްކަތުގައި، އީރާނާއެކު ވިޔަފާރިކުރާ ކޮންމެ ގައުމަކަށް ނުވަތަ ކުންފުންޏަކަށް އަދަބު ދޭނެ ކަމުގެ އިންޒާރު އެމެރިކާއިން ވަނީ ދީފަ އެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް އިއުލާނު ކުރެއްވި، އީރާނުން ބުނާގޮތުން "އިގްތިސާދީ ޓެރަރިޒަމް" ކެމްޕޭނަކީ ދެވަނަ ބޮޑު ހަނގުރާމައިގެ "ޑީ-ޑޭ" ނޯމަންޑީއަށް އެރުމާ އެއްފަދަ ކަމެއްގެ ގޮތުގައި ވަނީ ސިފަކޮށްފަ އެވެ.

މި ފިޔަވަޅުތަކަކީ މުޅި ދުނިޔޭގައިވާ އީރާނުގެ މާލީ ވިއުގަތަކަށް އަމާޒުކޮށްގެން އަޅާ ފިޔަވަޅުތަކެއް ކަމަށާއި، އެމެރިކާގެ އަތްނުފޯރާނެ އެއްވެސް ބައިވެރިއަކު ނުހުންނާނެ ކަމަށް ބެސެންޓް ވިދާޅުވި އެވެ.

އޭނާ އިތުރަށް ވިދާޅުވީ، އީރާނާއެކު މުއާމަލާތްކުރާ ފަރާތްތައް ޑޮނަލްޑް ޓްރަމްޕްގެ ސަރުކާރުން ދެނެގަނެފައިވާ ކަމަށާއި، އެ ގުޅުންތައް ކަނޑާލުމަށް ވަކި މުއްދަތެއް ދޭނެ ކަމަށެވެ. އަދި އެ މުއްދަތުގައި ގުޅުން ކަނޑާނުލައިފިނަމަ، އެމެރިކާ ޑޮލަރުގެ ނިޒާމުން އެ ފަރާތްތައް ބޭރުކޮށްލާނެ ކަމަށްވެސް އޭނާ ވިދާޅުވި އެވެ.

މިކަމާ ގުޅިގެން ޗައިނާއިން ވެސް ވަނީ އީރާނާއެކު ވިޔަފާރިކުރާ ގައުމުތަކަށް އެމެރިކާއިން ދެމުންދާ އިންޒާރުތަކާ ދެކޮޅު ހަދާފަ އެވެ. ބެއިޖިންގް އިން ބުނީ އީރާނާއެކު ބާއްވާ އެއްބާރުލުމަކީ ބައިނަލްއަގުވާމީ ގާނޫނުތަކާ އެއްގޮތަށް ކުރިއަށްދާ ކަމެއް ކަމަށާއި، އެކަމަށް ހުރަސްއަޅައިގެން ނުވާނެ ކަމަށެވެ.