ޔޫކްރެއިންގެ ވައިގެ ދިފާއު ވަރުގަދަކުރަން އެމެރިކާއިން 2.68 ބިލިއަން ޑޮލަރުގެ އަސްކަރީ ސާމާނު ވިއްކަނީ
19 ސެޕްޓެމްބަރު 2026 | ހޮނިހިރު 05:08ޔޫކްރެއިނުން އެދިފައިވާ މިސައިލް ސިސްޓަމްތަކާއި ރޭޑާ ހިމެނޭހެން 2.68 ބިލިއަން ޑޮލަރުގެ އަސްކަރީ ސާމާނު ވިއްކުމަށް އެމެރިކާގެ ޚާރިޖީ ވުޒާރާއިން ވަނީ ހުށަހަޅާފައި. މި މުއާމަލާތުގެ ސަބަބުން އެ ސަރަހައްދުގެ އަސްކަރީ ބާރުވެރިކަމަށް ބަދަލެއް ނައި ނަމަވެސް، ޔޫކްރެއިންގެ ދިފާއީ ގާބިލުކަން އިތުރުވެ އެމެރިކާގެ ގައުމީ ސަލާމަތުގެ މަގްސަދުތަކަށް އެހީތެރިކަން ލިބިގެންދާނެ ކަމަށް އެ ވުޒާރާއިން ބުނޭ
ޔޫކްރެއިނުން ރަޝިޔާގެ އަމާޒުތަކަށް ހަމަލާދޭ މަންޒަރުތައް ފެންނަ ވީޑިއޯއެއް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ހިއްސާކުރައްވާފައި | އެކްސް/ޒެލެންސްކީ
ޔޫކްރެއިންގެ ވައިގެ ދިފާއީ ނިޒާމު ތަރައްގީކޮށް ވަރުގަދަކުރުމަށް ބޭނުންވާ ސާމާނާއި ޚިދުމަތްތައް ހިމެނޭހެން، 2.68 ބިލިއަން ޑޮލަރުގެ އަސްކަރީ ސާމާނު އެ ގައުމަށް ވިއްކުމުގެ ފުރުސަތު އެބައޮތް ކަމަށް އެމެރިކާގެ ޚާރިޖީ ވުޒާރާއިން ހުކުރު ދުވަހު ހާމަކޮށްފި އެވެ.
އެމެރިކާގެ ގާނޫނުހަދާ މަޖިލީހަށް ފޮނުވި ނޯޓިފިކޭޝަނާ ހަވާލާދީ އެ އިދާރާއިން ބުނީ، ޔޫކްރެއިނުން ވަނީ އެސް-300 ކްލޯން މިސައިލާއި، ޖީއޭއެމް-67 މިސައިލާއި، ރޭންޖް އިތުރުކޮށްފައިވާ ލޭޒާ-ގައިޑެޑް ރޮކެޓް މިސައިލް ސިސްޓަމްތައް ހޯދުމަށް އެދިފަ އެވެ. މީގެ އިތުރުން، ލޯންޗަރު މޮޑިފިކޭޝަން ކިޓްތަކާއި ޑްރޯންތަކާ ދެކޮޅަށް ބޭނުންކުރާ ރޭޑާ ހޯދުމަށް ވެސް އެ ގައުމުން އެދިފައިވެ އެވެ.
މި އެހީގެ ޕެކޭޖުގެ ތެރޭގައި މާސްޓް ޓްރެއިލަރުތަކާއި މަރާމާތަށް ބޭނުންވާ އިތުރު ސާމާނުގެ އިތުރުން، ސޮފްޓްވެއާ އަދި އިންޖިނޭރުންނާއި ލޮޖިސްޓިކްސް ސަޕޯޓް ވެސް ހިމެނެނޭ ކަމަށް އެ ވުޒާރާއިން ބުނެ އެވެ.
މި މުއާމަލާތަށް މަޖިލީހުގެ ރުހުން ލިބިއްޖެނަމަ، ޔޫކްރެއިނުން މި ކަމަށް ޚަރަދުކުރާނީ ވިލާތުގެ ގައުމުތަކުން ދޭ އެހީއާއި، އެމެރިކާގެ ކުރީގެ ސަރުކާރުން ކަނޑައަޅާފައިވާ ފޮރިން މިލިޓަރީ ފައިނޭންސިންގެ ދަށުން ކަމަށް އެމެރިކާގެ ޚާރިޖީ ވުޒާރާއިން ބުނެ އެވެ. އަދި، މި ފައިސާ ބެލެވޭނީ "ޔޫކްރެއިން ރީކޮންސްޓްރަކްޝަން އިންވެސްޓްމަންޓް ފަންޑަށް" އެމެރިކާއިން ދޭ އެހީއެއްގެ ގޮތުގަ އެވެ.
"މި ހުށަހެޅިފައިވާ ވިޔަފާރީގެ ސަބަބުން ވިލާތުގެ ސިޔާސީ އަދި އިގްތިސާދީ ކުރިއެރުމަށް މަސައްކަތްކުރާ ބައިވެރި ގައުމެއްގެ ސަލާމަތީ ކަންކަން ވަރުގަދަވެ، އެމެރިކާގެ ޚާރިޖީ ސިޔާސަތާއި ގައުމީ ސަލާމަތުގެ މަގްސަދުތަކަށް އެހީތެރިކަން ލިބިގެންދާނެ،" އެ ވުޒާރާގެ ބަޔާނުގައި ބުނެފައިވެ އެވެ.
މި ސާމާނުތަކުގެ ސަބަބުން މިހާރު ކުރިމަތިވަމުންދާ އަދި ކުރިއަށް އޮތް ތަނުގައި ކުރިމަތިވެދާނެ ނުރައްކާތަކާ ކުރިމަތިލުމުގެ ގާބިލުކަން ޔޫކްރެއިނަށް އިތުރުވެގެންދާނެ ކަމަށް އެ ވުޒާރާއިން ބުނެ އެވެ. ނަމަވެސް، މީގެ ސަބަބުން އެ ސަރަހައްދުގެ އަސްކަރީ ބާރުވެރިކަމަށް ބަދަލެއް ނާންނާނެ ކަމަށާއި، މި ކަމާ ގުޅިގެން އެމެރިކާގެ އިތުރު ސިފައިން ޔޫކްރެއިނަށް ފޮނުވަން ނުޖެހޭނެ ކަމަށް ވެސް ޚާރިޖީ ވުޒާރާއިން ބުނެފައިވެ އެވެ.
މަސްދަރު: އަނަދޯލް އޭޖެންސީ
