އުމުރުފުޅުން ހަތަރު އަހަރު ވަންދެން ޓްރަމްޕް ދިރިއުޅުއްވި ގެކޮޅު ދެ މިލިއަން ޑޮލަރަށް ވިއްކާލައިފި
14 ސެޕްޓެމްބަރު 2026 | ހޯމަ 04:18އެމެރިކާގެ މީޑިއާތަކުގައި ބުނެފައިވާ ގޮތުން މި ގެ ވިއްކާލާފައި ވަނީ އެއް މިލިއަން ނުވަ ލައްކަ ތިރީސްހާސް އެމެރިކާާ ޑޮލަރަށް. މިއީ ޓްރަމްޕްގެ އުމުރުން ހަތަރު އަހަރުވަންދެން ދިރިއުޅުއްވި ގެކޮޅު
އެމެރިކާގެ ރައީސް ޑޮނަލްޑް ޓްރަމްޕް ކުޑައިރު އުޅުއްވި ގެކޮޅު | ސޯޝަލް މީޑިއާ
އެމެރިކާގެ ރައީސް ޑޮނަލްޑް ޓްރަމްޕް ކުޑައިރު ދިރިއުޅުއްވި ގެކޮޅު ދެ މިލިއަން އެމެރިކާ ޑޮލަރާ ގާތްކުރާ އަދަދަކަށް ވިއްކާލައިފި އެވެ.
އެމެރިކާގެ މީޑިއާތަކުގައި ބުނެފައިވާ ގޮތުން މި ގެ ވިއްކާލާފައި ވަނީ އެއް މިލިއަން ނުވަ ލައްކަ ތިރީސްހާސް އެމެރިކާާ ޑޮލަރަށެވެ. މިއީ ޓްރަމްޕް އަށް އުމުރުން ހަތަރު އަހަރުވަންދެން ދިރިއުޅުއްވި ގެކޮޅެވެ.
ޓްރަމްޕްގެ ބައްޕަ، ފްރެޑް ޓްރަމްޕް މި ގެ އަޅާފައި ވަނީ 1940 ވަނަ އަހަރު އެވެ. ޖެމެއިކާ އެސްޓޭޓްސް ސަރަހައްދުގައި މި ގެ ބިނާކޮށްފައިވާއިރު، މިދިޔަ ދުވަސްތަކުގައި އެއީ ޓްރަމްޕްގެ އާއިލާގެ ބެލުމުގެ ދަށުގައި ހުރި ގެކޮޅެއް ނޫން ކަމަށް ވެސް ބުނެފައިވެ އެވެ.
މި ގެ ވިއްކި ޓޮމީ ލިން މި ގެ ގަތީ ފާއިތުވި އަހަރު އަށް ލައްކަ ތިރީސް ފަސް ހާސް ޑޮލަރަށް ކަމަށް ބުނެފައިވެ އެވެ. މި ގެއަށް ފާއިތުވި އަހަރުތަކުގައި އެކިވަރުގެ ގެއްލުންތައް ލިބިފައިވާ ކަމަށާއި، ލިން ވަނީ ފަސް ލައްކަ އެމެރިކާ ޑޮލަރު ޚަރަދުކޮށްގެން މި ގެޔަށް އެކި ވަރުގެ ބަދަލުތައް ގެނެސްފައި ކަމަށް ވެސް ބުނެފައިވެ އެވެ.
މިއީ ފަސް ކޮަޓަރި އާއި ތިން ފާޚާނާ ހިމެނޭ ގެޔެކެވެ. ގެޔަށް ބަދަލު ގެނައުމުގެ މަސައްކަތުގެ ތެރޭގައި ވަނީ ކާނާ ތައްޔާރު ކުރާ އައު ބަދިގެއް ހަދައި، ރަނގަޅު ފެންވަރުގެ ސްޕާތަކެއް ހިމަނައިފަ އެވެ.
މީގެ ކުރިން 2017 ވަނަ އަހަރު ޓްރަމްޕް ފުރަތަމަ ދައުރަށް ވެރިކަމަށް ވަޑައިގެންނެވިއިރު، އެ އަހަރު ވެސް މި ގެ ވަނީ ވިއްކާލައިފަ އެވެ. އޭގެ ފަހުން 2019 ވަނަ އަހަރު ވަނީ މި ގެ ނުވަ ލައްކަ އެމެރިކާ ޑޮލަރަށް ވިއްކުމަށް ހުށަހަޅައިފަ އެވެ. ނަމަވެސް، އެ ފަހަރު މި ގެ ވިކިފައި ނުވެ އެވެ.
އުމުރުފުޅުން 80 ވެފައިވާ ރައީސް ޓްރަމްޕް، މެންހެޓަންގައި ޓްރަމްޕް ޓަވަރު ބިނާ ކުރައްވައި، އެތަނުގައި އަހަރުތަކެއް ވަންދެން ދިރިއުޅުއްވި އެވެ. ޓްރަމްޕް އަކީ ރިއަލް އެސްޓޭޓް ވިޔަފާރިން ވަރަށް ބޮޑަށް މުއްސަނދިވެ، ސިޔާސީ ދާއިރާ އަށް ވަޑައިގެންނެވި ބޭފުޅެކެވެ.
