އދ. ގެ އާންމު މަޖިލީހުގައި ބައިވެރިވުމަށް އީރާނުގެ ވަފުދަށް އެމެރިކާއިން ވިސާ ދޫކޮށްފި
18 ސެޕްޓެމްބަރު 2026 | ހުކުރު 03:23އދ. ގެ އާންމު މަޖިލީހުގައި ބައިވެރިވާ އީރާނުގެ ވަފުދަށް އެމެރިކާއިން ވިސާ ދޫކުރި ނަމަވެސް، އެ ގައުމުގެ ސިޔާސަތުތަކާ އެއްގޮތަށް ދަތުރުފަތުރު ކުރުމާއި ވިޔަފާރި ކުރުމުގައި ހަރުކަށި ހުރަސްތަކެއް ވަނީ ކުރިމަތިކޮށްފި. ދެ ގައުމުގެ ދެމެދުގައި އަސްކަރީ ނުތަނަވަސްކަން ބޮޑުވެފައިވާ މި ދަނޑިވަޅުގައި، ރައީސް ޕެޒެޝްކިއާން ހިމެނިވަޑައިގަންނަވާ މި ވަފުދަށް ފުރުސަތު ދިނީ އދ. ގެ މައި މަރުކަޒު ހުންނަ ގައުމުގެ ހައިސިއްޔަތުން އުފުލަންޖެހޭ ބައިނަލްއަގުވާމީ ޒިންމާގެ ދަށުން
އީރާނުގެ ރައީސް މަސްއޫދު ޕެޒެޝްކިއާން، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޝްއާ ބައްދަލުކުރައްވަނީ | އަނަދޮލޫ
އަންނަ ހަފުތާގައި އެމެރިކާގެ ނިއު ޔޯކްގައި ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގެ މަތީ ފަންތީގެ ބައްދަލުވުންތަކުގައި ބައިވެރިވުމަށް، އީރާނުގެ ވަފުދަށް އެމެރިކާގެ ސްޓޭޓް ޑިޕާޓްމަންޓުން ވިސާ ދޫކޮށްފި އެވެ. މި ކަން އެ އިދާރާގެ ތަރުޖަމާނަކު ކަށަވަރުކޮށްދެއްވީ ބުރާސްފަތި ދުވަހު އެވެ.
އީމެއިލް މެދުވެރިކޮށް ދެއްވި ބަޔާނެއްގައި ތަރުޖަމާނު ވިދާޅުވީ، އދ. ގެ މައި މަރުކަޒު ހުންނަ ގައުމުގެ ހައިސިއްޔަތުން އުފުލަންޖެހޭ ޒިންމާތަކާ އެއްގޮތްވާ ގޮތުގެ މަތިން، އީރާނު ސަރުކާރުގެ މައި ވަފުދަށް އާންމު މަޖިލީހުގެ މަތީ ފަންތީގެ ހަރަކާތްތަކުގައި ބައިވެރިވުމުގެ ފުރުސަތު ލިބޭނެ ކަމަށެވެ. ޒަމާނުއްސުރެ އަމަލުކުރަމުންދާ އެއްބަސްވުމެއްގެ ދަށުން، އދ. ގެ ބައްދަލުވުންތަކަށް ވަޑައިގަންނަވާ ވަފުދުތަކަށް ވިސާ ދޫކުރުމަކީ މައި މަރުކަޒު ހުންނަ ގައުމުގެ ހައިސިއްޔަތުން އެމެރިކާގެ މައްޗަށް ލާޒިމު ކަމެކެވެ.
ނަން ހާމަނުކުރުމަށް ޝަރުތުކޮށް ތަރުޖަމާނު އިތުރަށް ވިދާޅުވީ، އީރާނުގެ ވަފުދަށް ވިސާ ދޫކުރި ނަމަވެސް ދަތުރުފަތުރު ކުރުމުގައި ހުރަސްތަކެއް ހުންނާނެ ކަމަށެވެ. އަދި، އެމެރިކާގެ ސިޔާސަތުތަކާ އެއްގޮތަށް އަގުބޮޑު މުދަލާއި އެހެނިހެން ތަކެތި ގަތުން އެ ވަފުދުގެ މެންބަރުންނަށް މަނާވާނެ ކަމަށާއި، މިދިޔަ އަހަރާ އަޅާބަލާއިރު މި އަހަރުގެ ވަފުދަކީ ކުޑަ ވަފުދެއްކަން ވެސް އޭނާ ފާހަގަކުރެއްވި އެވެ. ރިޕޯޓްތައް ބުނީ، އީރާނުގެ މި ވަފުދުގައި އެ ގައުމުގެ ރައީސް މަސްއޫދު ޕެޒެޝްކިއާންއާއި ޚާރިޖީ ވަޒީރު އައްބާސް އަރާގިޗީ ހިމެނިވަޑައިގަންނަވާ ކަމަށެވެ.
އދ. ގެ 81 ވަނަ އާންމު މަޖިލީހުގެ މަތީ ފަންތީގެ ބައްދަލުވުންތައް ފެށުމަށް ހަމަޖެހިފައިވަނީ ހުކުރު ދުވަހު އެވެ. މި ބައްދަލުވުންތައް ސެޕްޓެމްބަރު މަހުގެ 28 ވަނަ ދުވަހުގެ ނިޔަލަށް ކުރިއަށްދާނެ އެވެ.
ހުރްމުޒް ކަނޑުއޮޅި އަލުން ހުޅުވާލުމަށާއި، ސަރަހައްދީ ސުލްހައިގެ އެއްބަސްވުމަކަށް މަގުފަހިކުރުމަށް މިދިޔަ ޖޫން މަހު ފަހުމުނާމާއެއްގައި ސޮއިކޮށްފައިވީ ނަމަވެސް، އެމެރިކާއިން އީރާނުގެ ވަފުދަށް ވިސާ މި ދޫކުރީ ދެ ގައުމުގެ ދެމެދުގައި ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.
މިދިޔަ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން ވަނީ އީރާނުގެ ސަރުކާރުގެ އިމާރާތްތަކަށާއި، އަސްކަރީ މަރުކަޒުތަކަށާއި، މިސައިލް އުފައްދާ ތަންތަނުގެ އިތުރުން ވައިގެ ދިފާއީ ނިޒާމުތަކަށް ވަރުގަދަ ހަމަލާތަކެއް ދީފަ އެވެ. މީގެ ރައްދުގައި އީރާނުން ވެސް ވަނީ އިސްރާއީލަށާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކެއް ފޮނުވާލައިފަ އެވެ. އޭގެ ފަހުން މި ހަނގުރާމަ މުޅި ސަރަހައްދަށް ފެތުރިފައިވާއިރު، ހަމަނުޖެހުންތައް ނިމުމަކަށް ގެނައުމަށް ޓަކައި ޚާރިޖީ ގޮތުން ކުރެވޭ މަސައްކަތްތައް އަދިވެސް ދަނީ ކުރިއަށް އެވެ.
މަސްދަރު: އަނަދޯލް އޭޖެންސީ
