ލިތުއޭނިޔާގެ ވައިގެ ސަރަހައްދަށް ވަން ޑްރޯނެއް ނޭޓޯގެ ޖެޓުތަކުން ވައްޓާލައިފި
15 ސެޕްޓެމްބަރު 2026 | އަންގާރަ 08:06ބެލަރޫސް މަގުން ލިތުއޭނިޔާގެ ވައިގެ ސަރަހައްދަށް ވަން ޑްރޯނެއް ނޭޓޯގެ އަސްކަރީ މަތިންދާބޯޓުތަކުން ވައްޓާލުމާ ގުޅިގެން، އެ ގައުމުގެ ބައެއް ސިޓީތަކުގައި ނުރައްކަލުގެ އިންޒާރު ނެރެފި. ރަޝިޔާ-ޔޫކްރެއިން ހަނގުރާމައާ ގުޅިގެން މި ފަދަ ހާދިސާތައް އިތުރުވަމުންދާތީ، ބޯލްޓިކް ސަރަހައްދުގެ ސަލާމަތީ ކަންކަން ވަރުގަދަކޮށް ނޭޓޯގެ އަސްކަރިއްޔާއިން އަންނަނީ ފާރަވެރިވަމުން
ނޭޓޯގެ މެންބަރު ގައުމަކަށް ނިސްބަތްވާ އަސްކަރީ މަތިންދާބޯޓެއް | ގެޓީ އިމޭޖަސް
ލިތުއޭނިޔާގެ ވައިގެ ސަރަހައްދަށް ރޭގަނޑުގެ ވަގުތެއްގައި ވަން ޑްރޯނެއް، ނޭޓޯގެ އަސްކަރީ މަތިންދާބޯޓުތަކުން ބަޑިޖަހައި ވައްޓާލާފައިވާ ކަމަށް އެ ގައުމުގެ ރައީސް ގިތަނަސް ނައުސެދާ ވިދާޅުވެއްޖެ އެވެ. އެ ގައުމުގެ ވައިގެ ސަރަހައްދަށް ވަން އެ ޑްރޯން، ނޭޓޯގެ އަސްކަރީ މަތިންދާބޯޓުތަކުން ހަމަލާދީ ނައްތާލާފައިވާ ކަމަށް އެކްސްގައި ކުރެއްވި ޕޯސްޓެއްގައި ރައީސް ނައުސެދާ ވަނީ ކަށަވަރުކޮށްދެއްވާފަ އެވެ.
ޑްރޯން ވަން ސަރަހައްދާއި ނުރައްކަލުގެ އިންޒާރު
އަންގާރަ ދުވަހުގެ މެންދަމުން އަލިވި ފަހުން މި ޑްރޯން ލިތުއޭނިޔާގެ ވައިގެ ސަރަހައްދަށް ވަދެފައި ވަނީ އަވަށްޓެރި ބެލަރޫސް މަގުން ކަމަށް ކަމާބެހޭ އިދާރާތަކުން ބުނެ އެވެ. މި ޑްރޯން ފެނިފައި ވަނީ ލިތުއޭނިޔާގެ ދެވަނައަށް އެންމެ ބޮޑު ސިޓީ ކަމަށްވާ ކައުނަސްއާ ކައިރިން، އެ ގައުމުގެ ދެކުނު ސަރަހައްދުންނެވެ. ލިތުއޭނިޔާގެ ދެކުނު އަދި އިރުމަތީ ބޯޑަރުގެ ބޮޑު ބައެއް ހިއްސާކުރަނީ ރަޝިޔާގެ ގާތް ބައިވެރިއެއް ކަމަށްވާ ބެލަރޫސްއާ އެވެ. ނަމަވެސް، އެއީ ކޮން ގައުމެއްގެ ނުވަތަ ކޮން ފަރާތެއްގެ ޑްރޯނެއްކަން އަދި މިހާތަނަށް ދެނެގަނެވިފައި ނުވާ ކަމަށް ލިތުއޭނިޔާގެ ނޭޝަނަލް ކްރައިސިސް މެނޭޖްމަންޓް ސެންޓަރުގެ ތަރުޖަމާނު ވިދާޅުވި އެވެ.
މި ހާދިސާއާ ގުޅިގެން އަންގާރަ ދުވަހުގެ ކުރީކޮޅު، ލިތުއޭނިޔާގެ ވެރިރަށް ވިލްނިއަސާއި އެ ސިޓީގެ ވަށައިގެންވާ ސަރަހައްދުތަކުގައި ޑްރޯންގެ ނުރައްކާ އޮތްކަމުގެ އިންޒާރުގެ ރަނގަބީލު ވަނީ ޖަހާފަ އެވެ. އެ ގައުމުގެ ގަޑިން މެންދަމުން އަލިވިތަނާހެން، އެ ސަރަހައްދުގެ މީހުންގެ ފޯނުތަކަށް ވަނީ އިންޒާރުގެ މެސެޖުތައް ފޮނުވާފަ އެވެ. އެ މެސެޖުތަކުގައި ޑްރޯނެއް ވައިގެ ސަރަހައްދަށް ވަދެފައިވާކަމުގެ އިންޒާރުދީ، ރައްކާތެރި ތަންތަނަށް ވަނުމަށާއި، ނުރައްކާ ފިލައިދިޔަކަން އަންގަންދެން މަޑުކުރުމަށް ވަނީ އަންގާފަ އެވެ.
އަސްކަރީ އިޖާބައާއި ދިފާއީ ތައްޔާރީތައް
ވައިގެ ސަރަހައްދަށް ވަން ޑްރޯނާ ދެކޮޅަށް ލިތުއޭނިޔާގެ އަސްކަރިއްޔާއާއި ނޭޓޯގެ އެއާ ޑިފެންސް މިޝަންގައި ހަރަކާތްތެރިވާ އިޓަލީވިލާތުގެ ޕައިލެޓުން ދެއްކީ ވަރަށް ހަލުވި އަދި ޒިންމާދާރު އިޖާބައެއް ކަމަށް ލިތުއޭނިޔާގެ ޑިފެންސް މިނިސްޓްރީން ބުނެ އެވެ.
ރައީސް ނައުސެދާގެ ސޯޝަލް މީޑިއާ ޕޯސްޓުގައި އިތުރަށް ވިދާޅުވީ، ރަޝިޔާއިން ޔޫކްރެއިނަށް ދެމުންދާ ހަމަލާތައް ވަރުގަދަކުރަމުންދާ ދަނޑިވަޅެއްގައި، މި ފަދަ ތައްޔާރީ ހާލަތެއްގައި އޮތުމަކީ އެ ސަރަހައްދަށް ނުހަނު މުހިންމު ކަމެއް ކަމަށެވެ. އަދި، ނޭޓޯގެ ބައިވެރިންނާއެކު ލިތުއޭނިޔާގެ ވައިގެ ސަރަހައްދު އެ ގައުމުން ދިފާއުކުރާނެ ކަމަށް ވެސް އޭނާ ވިދާޅުވި އެވެ. މި ހާދިސާއާ ގުޅޭގޮތުން ރަޝިޔާގެ ސަރުކާރުން އަދި އެއްވެސް އެއްޗެއް ބުނެފައެއް ނުވެ އެވެ.
ފާއިތުވި ދުވަސްތަކުގައި ހިނގި ހާދިސާތައް
މިދިޔަ އާދިއްތަ ދުވަހު ވެސް ލިތުއޭނިޔާގެ ވައިގެ ސަރަހައްދުން ޑްރޯން ފެނިފައިވާ ކަމުގެ ރިޕޯޓުތައް ވަނީ ލިބިފަ އެވެ. އެ ދުވަހު ބެލަރޫސް މަގުން ވަން އެއްޗެއް ލިތުއޭނިޔާގެ ވައިގެ ސަރަހައްދު ހުރަސްކޮށް ރަޝިޔާގެ ވައިގެ ސަރަހައްދަށް ދަތުރުކޮށްފައިވާ ކަމަށް ކްރައިސިސް މެނޭޖްމަންޓް ސެންޓަރުން ބުނެފައިވެ އެވެ. ނަމަވެސް، ސެޕްޓެމްބަރު 13 ގައި ހިނގި އެ ހާދިސާއާ ގުޅިގެން ވައިގެ ނުރައްކަލުގެ އިންޒާރު ދީފައެއް ނުވެ އެވެ.
މީގެ އިތުރުން، މެއި މަހު ވެސް ލިތުއޭނިޔާގެ ވެރިރަށް ވިލްނިއަސްގައި ޑްރޯންގެ އިންޒާރު ދިނުމާ ގުޅިގެން، ރައްޔިތުން ވަނީ ރައްކާތެރި ތަންތަނަށް ވަދެފަ އެވެ. އެ ހާދިސާއާ ގުޅިގެން ފްލައިޓްތަކާއި ރޭލު ދަތުރުފަތުރުތައް ވަގުތީ ގޮތުން މެދުކަނޑާލަން ޖެހުނު ކަމަށް ރިޕޯޓުތައް ބުނެ އެވެ.
ސަރަހައްދީ ހާލަތާއި ނޭޓޯގެ ދައުރު
ރަޝިޔާއިން ޔޫކްރެއިނާ ދެކޮޅަށް ހަނގުރާމަ ފެށި ފަހުން، ވިލާތުގެ ގައުމުތަކުގެ ވައިގެ ސަރަހައްދަށް ހުއްދަނެތި އަސްކަރީ ޑްރޯންތައް ވަނުމުގެ ހާދިސާތައް ވަނީ އިތުރުވެފަ އެވެ. ރަޝިޔާގެ ޖެޓް އިންޖީނުއެޅި ޑްރޯންތަކަކުން ޔޫކްރެއިނަށް ހަމަލާދެމުންދާތީ، އެ ކަމަށް ސަމާލުވުމުގެ ގޮތުން ހޯމަ ދުވަހުގެ ރޭ އެ ގައުމުގެ ވައިގެ ސަރަހައްދުގައި "އަސްކަރީ އޮޕަރޭޝަންތަކެއް" ހިންގާފައިވާކަން ޕޮލެންޑުން ވެސް ވަނީ އިއުލާންކޮށްފަ އެވެ. މި ފިޔަވަޅުތަކަކީ ރައްކާތެރިކަމުގެ ގޮތުން އަޅާ ފިޔަވަޅުތަކެއް ކަމަށާއި، އޭގެ ބޭނުމަކީ ވައިގެ ސަރަހައްދު ހިމާޔަތްކުރުން ކަމަށް ޕޮލެންޑުން ބުނެފައިވެ އެވެ.
މިއަހަރުގެ ތެރޭގައި ބޯލްޓިކް ގައުމުތައް ކަމަށްވާ އެސްޓޯނިޔާ އަދި ލެޓްވިޔާގެ ވައިގެ ސަރަހައްދަށް ވަން ޔޫކްރެއިންގެ ޑްރޯންތައް ވައްޓާލުމަށް ނޭޓޯގެ އަސްކަރީ މަތިންދާބޯޓުތަކުން އެތައް ފަހަރަކު ވަނީ ހަރަކާތްތެރިވެފަ އެވެ. ޔޫކްރެއިނުން ބުނީ، މި ޑްރޯންތައް މަގުން ކައްސާލައިގެން ދަނީ ރަޝިޔާގެ "އިލެކްޓްރޯނިކް ވޯފެއާ" ޓެކްނޮލޮޖީގެ ސަބަބުން ކަމަށެވެ. އެއީ، ޑްރޯންތައް ދަތުރުކުރާ މަގު ބަދަލުކޮށްލުމަށް ބޭނުންކުރާ އާލާތްތަކެއް ކަމަށް ވެސް އެ ގައުމުން ބުނެ އެވެ.
ލިތުއޭނިޔާ، އެސްޓޯނިޔާ އަދި ލެޓްވިޔާއިން ނޭޓޯއާ ގުޅުނީ 2004 ވަނަ އަހަރު އެވެ. މި ގައުމުތަކަކީ ނޭޓޯގެ މުއާހަދާގެ 5 ވަނަ މާއްދާގެ ދަށުން، ނޭޓޯގެ އެއް ގައުމަށް ދޭ ހަމަލާއަކީ ހުރިހާ ގައުމަކަށް ދޭ ހަމަލާއެއްގެ ގޮތުގައި ބަލާނެ ކަމަށް އެއްބަސްވެފައިވާ ގައުމުތަކެކެވެ.
މަސްދަރު: ބީބީސީ
