މާޒިޔާގެ އެސިސްޓެންޓް ކޯޗު ސުޒެއިރު ހަމަލާދިން މައްސަލަ، ނިއު ރޭޑިއަންޓް އިން ހުށަހަޅައިފި

މިހާރު ކުރިއަށްދާ ދިވެހި ޕްރިމިއާ ލީގުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އާއި ނިއު ރޭޑިއަންޓް ސްޕޯޓްސް ކުލަބު ބައްދަލުކުރި މެޗުގައި މާޒިޔާާގެ އެސިސްޓެންޓް ކޯޗު އަހުމަދު ސުޒެއިރު ހަމަލާ ދިން މައްސަލަ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހުށަހަޅައިފި އެވެ. 

ނިއު ރޭޑިއަންޓް އިން މި މައްސަލަ އެފްއޭއެމް އަށް ހުށަހަޅާފައި ވަނީ ސެޒެއިރު، ނިއު ރޭޑިއަންޓްގެ އެސިސްޓެންޓް ކޯޗު ލޫޝިއާނޯ ސިގޭރާ ބާބޯސާ އަށް ހަމަލާ ދީފައިވާތީ އެވެ.

މެޗުގައި ހިނގައިދިޔަ ހަމަނުޖެހުމެއްގައި ދެ ޓީމުގެ ކުޅުންތެރިންނާއި އޮފިޝަލުން ބައިވެރިވީއިރު ސުޒެއިރު ވަނީ ނިއު ރޭޑިއަންޓްގެ އެސިސްޓެންޓް ކޯޗު ލޫޝިއާނޯގެ މޫނު މަތީގައި އަތުން ޖަހައިފަ އެވެ. އެ ހަމަ ނުޖެހުންތަކުގެ ތެރެއިން ރެފްރީ ވަނީ ސުޒެއިރު އަށް ރަތް ކާޑު ދައްކައިފަ އެވެ. 

ސުޒެއިރުގެ އިތުރުން މާޒިޔާގެ ހަސަން ޝިފާޒު އާއި ނިއު ރޭޑިއަންޓްގެ އަބްދުﷲ މައިސާން އަށް ވެސް ރަތް ކާޑު ދެއްކި އެވެ. އަދި ނިއު ރޭޑިއަންޓްގެ ޔާޔާ ބިލީޓީ އާއި އީތަން އިބްރާހީމް ޒަކީ އަދި މާޒިޔާގެ އިޔާން އަބްދުލް އަލީމް އަށް ވަނީ ރީނދޫ ކާޑު ދައްކައިފަ އެވެ. 

އެކަމާ ގުޅޭ ގޮތުން ނިއު ރޭޑިއަންޓް އިން ނެރެފައިވާ ބަޔާނެއްގައި ބުނެފައި ވަނީ، ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާ ކަަމަށެވެ. އަދި ޖިސްމާނީ ގޮތުން އަނިޔާ ދިނުމަކީ، ނުވަތަ ހަމަލާ ދިނުމަކީ ފުޓުބޯޅައިގައި ހިނގައިގެން ވާނެ ކަމެއް ނޫން ކަމަށް އެ ކުލަބުން ބުނެފައިވެ އެވެ. އެކަމުގެ ސަބަބުން ފުޓުބޯޅައިގައި އޮންނަން ޖެހޭ ރައްކާތެރިކަން އަދި ސަލާމަތްތެރިކަމަށް ހީނަރުކަން އަންނަ ކަމަށް ވެސް އެ ބަޔާނުގައި ވަނީ ބުނެފައި އެވެ.

ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާކަން ފާާހަގަކޮށް ނިއު ރޭޑިއަންޓް އިން ބުނީ، ސުޒެއިރުއާ ދެކޮޅަށް އެންމެ އެކަށީގެންވާ ފިޔަވަޅު އެޅުމަށް އެ ކުލަބުން ގޮވާލާ ކަމަށެވެ. ހަމައެހެންމެ އެ ޓީމުގެ ކުޅުންތެރިންނާއި އޮފިޝަލުންގެ ރައްކާތެރިކަން ޔަޤީން ކުރަން ބޭނުންވާ ކަމަށް ވެސް ނިއު ރޭޑިއަންޓް އިން ބުނެފައިވެ އެވެ. 

އެ މެޗުގައި ނިއު ރޭޑިއަންޓް އިން ވަނީ 3-2 އިން މާޒިޔާ ބަލިކޮށްފަ އެވެ. މިއީ 2018 ވަނަ އަހަރުގެ ފަހުން ނިއު ރޭޑިއަންޓް އަށް މާޒިޔާ ބަލި ކުރެވުނު ފުރަތަމަ ފަހަރެވެ. ހަމައެހެންމެ، 2022 ވަނަ އަހަރުގެ ލީގުގެ ފަހުން، މާޒިޔާ ލީގުގެ މެޗަކުން ބަލިވި މިއީ ފުރަތަމަ ފަހަރެވެ.