ޕެނަލްޓީގައި ނިއު ރޭޑިއަންޓް ބަލިކޮށް، މާޒިޔާ އިން ކަޕް ވިނާސް ކަޕް ކާމިޔާބުކޮށްފި

ގިނަ އަހަރުތަކެއްގެ މެދުކެނޑުމަކަށް ފަހު ބޭއްވި ކަޕް ވިނާސް ކަޕްގެ ފައިނަލްގައި ނިއު ރޭޑިއަންޓް ސްޕޯޓްސް ކުލަބު ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަން އިން މުބާރާތުގެ ޗެމްޕިއަންކަން ހޯދައިފި އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގެ ފުރިހަމަ ވަގުތު ނިމުނީ ދެ ޓީމު 2-2 އިން އެއްވަރު ވެގެންނެވެ. އެއާ އެކު މެޗުގެ ނަތީޖާ ނެރުމަށް ޕެނަލްޓީ ޖެހިއިރު، މާޒިޔާ އިން ވަނީ ނިއު ރޭޑިއަންޓުގެ މައްޗަށް ކުރި ހޯދައިފަ އެވެ.

މެޗު ފަށައިގެން ހަތަރު ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޒުވާން ކުޅުންތެެރިޔާ މުހައްމަދު އިލާން އިމްރާން އެވެ. ނަމަވެސް މެޗުގެ 16 ވަނަ މިނެޓުގައި އަލީ ފާސިރު (ސެންޓޭ) ވަނީ ލަނޑު ޖަހައި ނިއު ރޭޑިއަންޓަށް ނަތީޖާ ހަމަހަމަ ކޮށްދީފައި އެވެ.

މެޗުގައި މާޒިޔާ އިން ދެ ވަނަ ފަހަރަށް ލީޑު ނެގީ 28 ވަނަ މިނެޓުގައި އަހުމަދު އައިހަމް ޖެހި ލަނޑުންނެވެ. ފުރަތަމަ ހާފު ނިމުމުގެ ކުރިން ސެންޓޭ ވަނީ ދެ ވަނަ ލަނޑެއް ޖަހައި، ދެ ވަނަ ފަހަރަށް ނިއު ރޭޑިއަންޓަށް ނަތީޖާ ހަމަހަމަ ކޮށްދީފައި އެވެ. އޭގެ ފަހުން މެޗުގެ ދެ ވަނަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފައި އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި މާޒިޔާ އިން ވަނީ ހަތަރު ޕެނަލްޓީ ވެސް ކާމިޔާބު ކޮށްފައި އެވެ. އެއީ އިލާން އާއި، އިބްރާހީމް އައިސަމް އާއި، ހައިސަން ހަސަން އަދި ބެންޖަމިން ތޯމަސް ކުކޫގެ ޕެނަލްޓީ އެވެ. ނިއު ރޭޑިއަންޓަށް ކާމިޔާބު ކުރެވުނީ ލުއިސް ގޯމޭސް ޑަ ސިލްވާ އަދި، އަޙުމަދު އަބްދުﷲ ގެ ޕެނަލްޓީ އެވެ. އެ ޓީމުގެ ބްރެޒިލްގެ ޑޮރިއެލްޓަން ގޯމޭސް (ޑޯރީ) އަދި މޫސާ ޔާމީންގެ ޕެނަލްޓީ ވަނީ ނާކާާމިޔާބުވެފައި އެވެ.

މިއީ މާޒިޔާ އިން ކަޕް ވިނާސް ކަޕްގެ ޗެމްޕިއަންކަން ހޯދި ފުރަތަމަ ފަހަރެވެ. މިފަހަރުގެ ސީޒަން ފެށުމުގެ ގޮތުން ކުޅުނު ޗެރިޓީ ޝީލްޑު މެޗުގައި ވެސް މާޒިޔާ އިން ވަނީ ޕެނަލްޓީ ޖަހައިގެން ނިއު ރޭޑިއަންޓް ބަަލިކޮށްފައި އެވެ.