ދިއްދޫ އިން ބުރު ސިއްސުވާލައިފި
13 ސެޕްޓެމްބަރު 2026 | އާދީއްތަ 04:10ފުރަތަމަ މެޗުގައި ދިއްދޫ އިން ބުރު ބަލިކުރިއިރު، މިއީ އެ ޓީމުން ދިވެހި ޕްރިމިއާ ލީގުގައި ކުޅުނު ފުރަތަމަ މެޗު.
މެޗުގައި ލަނޑު ޖެހުމަށް ފަހު ދިއްދޫގެ ކުޅުންތެރިން އުފާ ފާޅު ކުރަނީ | އެފްއޭއެމް
ދިވެހި ޕްރިމިއާ ލީގުގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުގައި އެ ޓީމު ބަލިކޮށް، ހއ. ދިއްދޫ އިން ލީގުގެ ފެށުން ރަނގަޅު ކޮށްފި އެވެ.
ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ދިއްދޫ އިން ކާމިޔާބު ކުރީ 1-0 އިންނެވެ. މެޗުގައި ދިއްދޫ އިން ލަނޑު ޖެހީ މެޗުގެ ފުރަތަމަ ހާފުގައި އެވެ.
މެޗު ފަށައިގެން ބުރުން ދިޔައީ ރަނގަޅަށް ކުޅެ، ދިއްދޫގެ ގޯލަށް ނުރައްކާ ކުރުމަށް މަސައްކަތް ކުރަމުންނެވެ. ދިިއްދޫ އިން ވެސް އެ ޓީމަށް ލިބޭ ފުރުސަތު ތަކުގެ ބޭނުން ހިފުމަށް މަސައްކަތް ކުރަމުން ދިޔަ އެވެ. މެޗުގެ 24 ވަނަ މިނެޓުގައި ދިއްދޫ އިން ވަނީ ބުރު ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ދިއްދޫ އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ ގިޑިއެން ޓެޓޭ އެވެ.
ދިއްދޫ އިން ލީޑު ނެގި ފަހުން ބުރަށް ވަނީ މެޗުގެ ނަތީޖާ ހަމަހަމަ ކުރަން ވެސް ފުރުސަތު ލިބިފައި އެވެ. ނަމަވެސް، އެ ޓީމަށް ލިބުނު އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ.
ފުރަތަމަ މެޗުގައި ދިއްދޫ އިން ބުރު ބަލިކުރިއިރު، މިއީ އެ ޓީމުން ދިވެހި ޕްރިމިއާ ލީގުގައި ކުޅުނު ފުރަތަމަ މެޗެވެ. ނޯތު ރީޖަންގެ ޗެމްޕިއަންކަން ހޯދައިގެން ދިއްދޫ އިން ލީގަށް ކޮލިފައިވީއިރު، މިއީ މިފަހަރު ލީގަށް ކޮލިފައިވި ރީޖަން ތަކުގެ ޗެމްޕިއަން ޓީމު ތަކުގެ ތެރެއިން ޓީމަކަށް މޮޅެއް ލިބުނު ފުރަތަމަ ފަހަރެވެ.
